ଖୋର୍ଦ୍ଧା ଅଫିସ,୧୨।୨: ଖୋର୍ଦ୍ଧାରେ ବଢ଼ିଚାଲିଛି ନିଶା କାରବାର। କ୍ରାଇମବ୍ରାଞ୍ଚର ଏସ୍ଟିଏଫ୍, ଅବକାରୀ, ଅବକାରୀ ଗୋଇନ୍ଦା, ଫ୍ଲାଇଂ ସ୍କ୍ବାଡ୍ ଏବଂ ଜିଲା ପୋଲିସ ପକ୍ଷରୁ ବାରମ୍ବାର ଚଢ଼ାଉ ସତ୍ତ୍ୱେ ନିଶା କାରବାର ଥମୁନାହିଁ। ଗତ ୩ବର୍ଷରେ ଏନ୍ଡିପିଏସ୍ରେ ୭୬ଟି ମାମଲା ରୁଜୁ ହୋଇଛି। ଏଥିରେ ସମ୍ପୃକ୍ତି ନେଇ ୧୫୫ଜଣଙ୍କୁ ଗିରଫ କରାଯାଇଛି। ସେଥିରୁ ପୁରୁଷ ୧୩୮ ଓ ମହିଳା ୧୭ ରହିଛନ୍ତି। ୩ବର୍ଷରେ ୮୦୩୬.୩୩ କେଜି ବ୍ରାଉନସୁଗାର ଏବଂ ୭୦୫.୦୭ କେଜି ଗଞ୍ଜେଇ ଜବତ ହୋଇଛି।
୧୮ଟି କେସ୍ରେ ୧୪୮କେଜି ୪ଶହ ଗ୍ରାମ ଗଞ୍ଜେଇ ଜବତ ହୋଇଥିବା ବେଳେ ୫କେଜି ୧୩୬ଗ୍ରାମ୍ ୯୭୦ଏମ୍ଜି ବ୍ରାଉନସୁଗାର ଜବତ କରାଯାଇଛି। ୨୨ଜଣ ପୁରୁଷ ଓ ୩ଜଣ ମହିଳାଙ୍କୁ ଗିରଫ କରାଯାଇଛି। ସେହିପରି ୨୦୨୧ରେ ୨୧ଟି କେସ୍ରେ ୩୧୨.୧୭୫ କେଜି ଗଞ୍ଜେଇ, ୧୨୯୯ ଗ୍ରାମ ୪୯ ଏମଜି ବ୍ରାଉନସୁଗାର ଜବତ ହୋଇଛି। ୩୨ପୁରୁଷ ଓ ୫ ଜଣ ମହିଳାଙ୍କୁ ଗିରଫ କରାଯାଇଛି। ଅଭିଯୁକ୍ତଙ୍କ ଠାରୁ ଟଙ୍କା, ୫ଟି କାର, ୧୫ଟି ମୋବାଇଲ ଫୋନ ଜବତ କରାଯାଇଛି। ୨୦୨୨ରେ ୩୭ଟି କେସ୍ ରୁଜୁ ହୋଇଛି। ୨୪୪.୪୯୫କେଜି ଗଞ୍ଜେଇ ଓ ୧୫୯୯.୮୭୦ ଗ୍ରାମ ବ୍ରାଉନସୁଗାର ଜବତ କରାଯାଇଛି। ଏଥିରେ ୮୪ଜଣ ପୁରୁଷ ଓ ୯ଜଣ ମହିଳାଙ୍କୁ ଗିରଫ କରାଯାଇଛି। ୪ଟି ସ୍କୁଟି, ୩ କାର୍, ୧୦ ମୋବାଇଲ,୧ଲକ୍ଷ ୯୧ହଜାର ଟଙ୍କା, ୫୧୧.୬୭୦ ଗ୍ରାମ ସୁନା, ୮୩୦ ଗ୍ରାମ ରୁପା, ପୋକିଙ୍ଗ ମେଶିନ ଓ ଗୋଟିଏ ଓଜନ ମେଶିନ ଜବତ କରାଯାଇଛି।
ଗଳାବାଟ ଦେଇ ଆସୁୁଛି
କୋଲକାତା, ବାଲେଶ୍ୱର, ଜଳେଶ୍ୱର ଆଦି ଅଞ୍ଚଳରୁ ବିଭିନ୍ନ ଗଳାବାଟ ଦେଇ ଖୋର୍ଦ୍ଧା ସହରକୁ ଆସୁଛି ବ୍ରାଉନସୁଗାର। ଏଠାରୁ ଗ୍ରାମାଞ୍ଚଳ ସମେତ ପଡୋଶୀ ଜିଲାକୁ ପଠାଯାଉଛି। ଖୋର୍ଦ୍ଧା ସହରର ଗୁରୁଜଙ୍ଗ, ସାମନ୍ତରାପୁର, ଠେଙ୍ଗାହାଟ, ବରୁଣେଇ ଶିଳ୍ପାଞ୍ଚଳ ଏବେ ବ୍ରାଉନସୁଗାରର ହବ୍ ପାଲଟିଛି। ନିୟମିତ ବ୍ୟବଧାନରେ ଏଠାରୁ ପୁଳା ପୁଳା ବ୍ରାଉନସୁଗାର ଜବତ କରାଯାଉଛି।
ନିଶା ବଳୟରେ ଯୁବପିଢ଼ି
ସହରର ଏକାଧିକ ଯୁବକ ଏହାକୁ ରୋଜଗାରର ପନ୍ଥା ଭାବେ ଗ୍ରହଣ କରିନେଇଛନ୍ତି। ନିଶା ସେବନକାରୀଙ୍କ ସଂଖ୍ୟା ବଢିବା ସହ ଅସାମାଜିକ କାର୍ଯ୍ୟକଳାପ ମଧ୍ୟ ବଢୁଛି। ସ୍ବଳ୍ପ ସମୟରେ ଅଧିକ ଟଙ୍କା ରୋଜଗାର ଆଶାରେ ଏଥିରେ ପାଦ ଥାପିଥିବା ଯୁବକମାନେ ଏଥିରୁ ବାହାରିବା ପରିବର୍ତ୍ତେ ଏହାକୁ ପେସାଭାବେ ଗ୍ରହଣ କରିନେଇଛନ୍ତି।
ବଢୁଛି ମହିଳାଙ୍କ ସମ୍ପୃକ୍ତି
କେତେକ ଅଞ୍ଚଳରେ ସପରିବାର ଏହି କାରବାରରେ ଲିପ୍ତ ରହୁଥିବା ଜଣାପଡିଛି। କିଛିଦିନ ପୂର୍ବେ ଖୋର୍ଦ୍ଧା ଟାଉନ ପୋଲିସ ଗୋଟିଏ ପରିବାର ସ୍ବାମୀ, ସ୍ତ୍ରୀ, ପୁଅଙ୍କୁ ଗିରଫ କରିଛି। ବିଶେଷକରି ନିଶା କାରବାରରେ ମହିଳାଙ୍କ ସମ୍ପୃକ୍ତି ବଢ଼ିବାରେ ଲାଗିଛି; ଯାହାକୁ ନେଇ ବୁଦ୍ଧିଜୀବୀଙ୍କ ମହଲରେ ଉଦ୍ବେଗ ପ୍ରକାଶ ପାଇଛି।
ଧରାପଡୁନାହାନ୍ତି ମାଷ୍ଟରମାଇଣ୍ଡ
ଚଢ଼ାଉ ବେଳେ ବେପାରୀ ଧରାପଡୁଥିବା ବେଳେ ଏହାର ମାଷ୍ଟରମାଇଣ୍ଡ ଖସିଯାଉଛନ୍ତି। ଯେତିକି ପରିମାଣର ବ୍ରାଉନସୁଗାର ଜବତ କରାଯାଉଛି ତାହା ଦେଖାଯାଉନାହିଁ, ଜାଣିଶୁଣି କମ୍ ପରିମାଣର ଦେଖାଯାଉଥିବା ଚର୍ଚ୍ଚା ହେଉଛି। କେତେକ ସ୍ଥାନରେ ପୋଲିସର ଚଢ଼ାଉ ପୂର୍ବରୁ ଖବର ପହଞ୍ଚି ଯାଉଛି, ଫଳରେ ମାଫିଆ ଖସିଯାଉଛନ୍ତି। ତେବେ ଏହି କାରବାରର ମାଷ୍ଟରମାଇଣ୍ଡ ନିକଟରେ ପୋଲିସ ନ ପହଞ୍ଚିବା ପର୍ଯ୍ୟନ୍ତ ଖୋର୍ଦ୍ଧା ସହର ନିଶା କବଳରୁ ମୁକ୍ତ ହୋଇପାରିବ ନାହିଁ ବୋଲି ସାଧାରଣରେ ମତପ୍ରକାଶ ପାଇଛି।
ପ୍ରଭାବ ପରିବର୍ତ୍ତେ ଦ୍ୱିଗୁଣ ବଢ଼ିଛି
ନିଶା ଯୋଗୁ ଯୁବସମାଜ ବିପଥଗାମୀ ହେଉଥିବା ବେଳେ ମାଫିଆ ଓ ବେପାରୀମାନେ ବିଳାସପୂର୍ଣ୍ଣ ଜୀବନଯାପନ କରୁଛନ୍ତି। ଗତ ବର୍ଷ ଖୋର୍ଦ୍ଧା ପୋଲିସ ସାମନ୍ତରାପୁରର ଜଣେ ନିଶା ବେପାରୀଙ୍କ ୧.୫କୋଟିର ବେଆଇନ ଭାବେ ଗଚ୍ଛିତ କରିଥିବା ସମ୍ପତ୍ତିକୁ ସିଲ୍ କରିଥିଲେ। ତେବେ ଏନେଇ ମାଫିଆଙ୍କ ମହଲରେ ଛନକା ପଶିଥିଲା। ପୋଲିସ ପକ୍ଷରୁ ନିଆଯାଇଥିବା ଏହି ପଦକ୍ଷେପ ପରଠାରୁ ସେଭଳି କୌଣସି ଆଖିଦୃଶିଆ ପଦକ୍ଷେପ ଗ୍ରହଣ କରାଯାଇନାହିଁ। ଲୋକଙ୍କ ଆଶା ରହିଥିଲା ଏଣିକି ମାଫିଆମାନେ ସାବାଡ ହେବେ। ସହରରେ ବ୍ରାଉନସୁଗାର କାରବାର ରୋକଲାଗିବ। ତେବେ ଏଥିରେ କୌଣସି ପ୍ରଭାବ ପଡ଼ି ନ ଥିବା ବେଳେ ଏହା ଦ୍ୱିଗୁଣ ବଢିଛି।
ସ୍ବତନ୍ତ୍ର ଡ୍ରାଇଭ ଚାଲିଛି
ଖୋର୍ଦ୍ଧା ଜିଲା ଆରକ୍ଷୀ ଅଧୀକ୍ଷକ ସିଦ୍ଧାର୍ଥ କଟ୍ଟାରିଆ କୁହନ୍ତି, ନିଶା ସମାଜ ପାଇଁ କଳୁଷିତ ବାତାବରଣ ସୃଷ୍ଟି କରୁଛି। ଜିଲାକୁ ନିଶାକବଳରୁ ମୁକ୍ତ ଲାଗି ଅପରେଶନ ହ୍ବାଇଟ ସ୍ପାଇଡର ଚାଲିଛି। ଏନେଇ ସମସ୍ତ ଥାନା ଅଞ୍ଚଳରେ ଚଢ଼ାଉ ଜାରି ରହିଛି। ନିଶା କାରବାର ଦ୍ୱାରା ବେଆଇନ ଭାବେ ଗଚ୍ଛିତ ସମ୍ପତ୍ତିକୁ ବାଜ୍ୟାପ୍ତ କରାଯାଉଛି। ଚଳିତବର୍ଷ ୩ଜଣ ନିଶା ବେପାରୀଙ୍କ ଘର ଭଙ୍ଗାଯାଇଛି। ଯୁବପିଢ଼ିଙ୍କ ଏଥିରେ ସମ୍ପୃକ୍ତିି ଏକ ଚିନ୍ତାଜନକ ବିଷୟ। ଏଥିଲାଗି ଆଗାମୀ ଦିନରେ ସଚେତନତା କାର୍ଯ୍ୟକ୍ରମ ହାତକୁ ନିଆଯିବ।
