ସୋହେଲା,୧୧।୪(ଅଶ୍ବିନୀ ପାତ୍ର):ବରଗଡ଼ ଜିଲା ସୋହେଲାଠାରେ ବରଗଡ଼ ରାୟପୁର ଜାତୀୟ ରାଜପଥ ରେ ଏକ ବଡ଼ ଧରଣର ସଡକ ଦୁର୍ଘଟଣା ଘଟିଯାଇଛି। ଶୁକ୍ରବାର ବିଳମ୍ବିତ ରାତିରେ ରାଉରକେଲାରୁ ରାୟପୁର ଅଭିମୁଖେ ଯାଉଥିବା ଘରୋଇ ବସ (ଲକ୍ଷ୍ମୀ) ସୋହେଲା ଡଙ୍ଗାଘାଟ ନାଲା ପାର ହୋଇ ଏକ ଯାତ୍ରୀଙ୍କୁ ଛାଡିବା ପାଇଁ ବସ ଅଟକାଇ ଥିଲେ। ଏ ସମୟରେ ଏକ ଦ୍ରୁତଗାମୀ ଟ୍ରକ (OD25F6152) ବସକୁ ପଛପଟୁ ଧକ୍କା ଦେବାରୁ ବସ ଭରସାମ୍ୟ ହରାଇ ରାସ୍ତା କଡରେ ଥିବା ବିଦ୍ୟୁତ ଟ୍ରାନ୍ସଫର୍ମରରେ ପିଟିହୋଇଯାଇଥିଲା। ବସରେ ଶିଶୁ, ମହିଳା ଯାତ୍ରୀ ସମେତ ପ୍ରାୟ ୨୫ ଯାତ୍ରୀ ଥିଲେ । ଅତ୍ୟଧିକ କ୍ଷମତା ସଂପନ୍ନ ବିଦ୍ୟୁତ ଟ୍ରାନ୍ସଫର୍ମରରେ ବସ ଜୋରରେ ପିଟି ହେବାରୁ ପ୍ରବଳ ବିସ୍ଫୋରଣ ଶବ୍ଦ ହୋଇଥିଲା। ଫଳରେ ଆଖପାଖର ଲୋକେ ଘରୁ ବାହାରି ଥିଲେ। ବସରେ ଥିବା ଯାତ୍ରୀମାନେ ପ୍ରାଣ ବିକଳରେ ଚିତ୍କାର କରିଥିଲେ। ଦୁର୍ଘଟଣା ଯୋଗୁ ବିଦ୍ୟୁତ ଟ୍ରିପ ହୋଇ ଆପେ କଟିଯାଇଥିଲା।
ସୋହେଲା ପୋଲିସ ଏବଂ ସୋହେଲା ର ସ୍ବେଚ୍ଛାସେବୀ ଯୁବକ ମାନେ ଘଟଣା ସ୍ଥଳକୁ ଯାଇ ସମସ୍ତଙ୍କୁ ଉଦ୍ଧାର କରିଥିଲେ। ୮ଜଣ ଯାତ୍ରୀ ସାମାନ୍ୟ ଆହତ ହୋଇଥିବାବେଳେ ସେମାନଙ୍କୁ ସୋହେଲା ଡାକ୍ତରଖାନାକୁ ନେଇ ପ୍ରାଥମିକ ଚିକିତ୍ସା କରାଯାଇଥିଲା । କିଛି ଯାତ୍ରୀ ଅନ୍ୟ ଏକ ବସ ରେ ନିଜ ଗନ୍ତବ୍ୟସ୍ଥଳକୁ ଯାଇଥିବାବେଳେ କିଛି ଯାତ୍ରୀ ଭୟରେ ନିଜ ଘରକୁ ଫେରିଯାଇଥିଲେ। ରାତିରେ ସ୍ବେଚ୍ଛାସେବୀଙ୍କ ସହଯୋଗରେ ଏକ ହାଇଡ୍ରା ଗାଡି ଆଣି ରାସ୍ତାରୁ ଦୁର୍ଘଟଣା ଗ୍ରସ୍ତ ଟ୍ରକ ଏବଂ ବସକୁ ରାସ୍ତାରୁ ହଟାଇବା ପରେ ଗମନାଗମନ ସ୍ବାଭାବିକ ହୋଇଥିଲା। ଟ୍ରକ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଛି। ପୋଲିସ ବସ ଡ୍ରାଇଭର ଙ୍କୁ ଅଟକ ରଖି ତଦନ୍ତ କରୁଛନ୍ତି।
