ଜଳେଶ୍ୱର, ୯।୧୧(ଡି.ଏନ.ଏ.): ବାଲେଶ୍ୱର ଜିଲା ଜଳେଶ୍ୱରର ବିଭିନ୍ନ ଅଞ୍ଚଳରେ ଚକଡାପୋକ ବ୍ୟାପିବାରେ ଲାଗିଛି ା ଏ ସମ୍ପର୍କରେ ଧରିତ୍ରୀରେ ପ୍ରକାଶ ପାଇବା ପରେ ମଙ୍ଗଳବାର ଜିଲା କେଭିକେ (କୃଷି ବିଜ୍ଞାନ କେନ୍ଦ୍ର)ର ବୈଜ୍ଞାନିକ ଜଳେଶ୍ୱର ଅଞ୍ଚଳର ବିଭିନ୍ନ ପଞ୍ଚାୟତ ବୁଲି ପରିସ୍ଥିତି ଅନୁଧ୍ୟାନ କରିଛନ୍ତି ା ଅତିଶୀଘ୍ର ନିର୍ଦ୍ଦିଷ୍ଟ କୀଟନାଶକ ଓ କେତେକ ପ୍ରଣାଳୀ ଚାଷୀମାନେ ଆପଣେଇବାକୁ ସେମାନେ ପରାମର୍ଶ ଦେଇଛନ୍ତି। ଅନ୍ୟପକ୍ଷରେ ସେମାନେ ସରକାରଙ୍କୁ ସବିଶେଷ ତଥ୍ୟ ଜଣାଇବେ ବୋଲି ଚାଷୀଙ୍କ ପ୍ରଶ୍ନର ଉତ୍ତରରେ କହିଛନ୍ତି ା
ଜଳେଶ୍ୱରରେ ୨୧ହଜାର ହେକ୍ଟର ଜମିରେ ଧାନ ଚାଷ ହେବ ବୋଲି ଆକଳନ କରାଯାଇଥିଲା। କିନ୍ତୁ ପ୍ରତିକୂଳ ପାଗ ଯୋଗୁ ୧୯୫୦୦ହେକ୍ଟର ଜମିରେ ରୁଆପୋତା ହୋଇଥିଲା। ଏବେ ବାୟୁମଣ୍ଡଳରେ ତାପମାତ୍ର ଆଶାତୀତ ଭାବେ କମି ନ ଥିବାରୁ ତଥା ଅଧିକ ଉତ୍ତାପ ଦେଖାଦେଉଥିବାରୁ ଚକଡାପୋକ ଅଧିକ ମାତ୍ରାରେ ବ୍ୟାପୁଥିବା କେଭିକେ ବୈଜ୍ଞାନିକ ଡ. ସ୍ବାଗତିକା ସାହୁ ଓ ଡ. କମଳାକାନ୍ତ ବେହେରା ସୂଚନା ଦେଇଛନ୍ତି। ସେମାନେ ବର୍ତ୍ତନା, ଖୁଲୁଡା, ଗୋପୀମୋହନପୁର, ଆରୁହା ଓ ପଶ୍ଚିମବାର୍ଡ ପଞ୍ଚାୟତର ବିଭିନ୍ନ ଅଞ୍ଚଳ ବୁଲି ଚକଡାପୋକ ସମ୍ପର୍କରେ ଅନୁଧ୍ୟାନ କରିଥିଲେ ା ପରିସ୍ଥିତି ଦେଖି ସେମାନେ ଚାଷୀମାନଙ୍କୁ ସାନ୍ତ୍ୱନା ଦେବା ସହ ନିର୍ଦ୍ଦିଷ୍ଟ ଗୋଟିଏ ପ୍ରକାର କୀଟନାଶକ ବ୍ୟବହାର କରିବାକୁ ପରାମର୍ଶ ଦେଇଛନ୍ତି ା ଧାଡିକୁ ଧାଡି ପାହି ସୃଷ୍ଟି କରି ସିଞ୍ଚନ ବେଳେ କୀଟନାଶକ ଧାନଗଛର ମୂଳ ଯାଏ ଯେପରି ସ୍ପର୍ଶ କରିବ ସେଥିପ୍ରତି ଗୁରୁତ୍ୱ ଦେବାକୁ ଚାଷୀମାନଙ୍କୁ କହିଛନ୍ତି ା କେତେକ ଚାଷୀ ୩/୪ ପ୍ରକାର ଔଷଧ ମିଶ୍ରଣ କରି ସିଞ୍ଚନ କରୁଥିବାରୁ ଏହାକୁ ସେମାନେ ବାରଣ କରିଛନ୍ତି। ଅନ୍ୟପକ୍ଷରେ ଆବଶ୍ୟକ କୀଟନାଶକ ରିହାତି ମୂଲ୍ୟରେ ଯୋଗାଇ ଦେବାକୁ ବହୁ କୃଷକ ସଂଘ, କୃଷକ ସଭା, ନେତୃମଣ୍ଡଳୀ ଓ ଅଭିଜ୍ଞ କୃଷକମାନେ ଦାବି କରିଛନ୍ତି। ଏ ସମ୍ପର୍କରେ ଜଳେଶ୍ୱର ଗୋଷ୍ଠୀ କୃଷି ଅଧିକାରୀ ସଞ୍ଜୟ ରାଉତଙ୍କୁ ପଚାରିବାରୁ ପ୍ରତି ପଞ୍ଚାୟତରେ ଏ ରୋଗର ପ୍ରାଦୁର୍ଭାବ ଦେଖାଦେଇଥିବା ଓ ନିର୍ଦ୍ଦିଷ୍ଟ ଔଷଧ ସମ୍ପର୍କରେ ପରାମର୍ଶ ଦିଆଯାଇଥିଲେ ମଧ୍ୟ କୃଷକମାନେ ଏକାଧିକ ଔଷଧ ପ୍ରୟୋଗ କରୁଥିବାରୁ ରୋଗ ନିରାକରଣ ହୋଇପାରୁନାହିଁ ବୋଲି କହିଛନ୍ତି। ଅନ୍ୟମାନଙ୍କ ମଧ୍ୟରେ ରାଇବଣିଆ କୃଷି ଅଧିକାରୀ ରାଜଲକ୍ଷ୍ମୀ ମହାନ୍ତି, ସେକ୍ ଅବଦୁଲ ରାଜା, ବୀରେନ୍ଦ୍ର ମଲ୍ଲିକ, ପଦ୍ମଲୋଚନ ବାରିକ ପ୍ରମୁଖ କୃଷିବୈଜ୍ଞାନିକଙ୍କ ସହିତ ବିଭିନ୍ନ ଅଞ୍ଚଳ ପରିଦର୍ଶନରେ ଯାଇଥିଲେ ା
