ହାଇଦ୍ରାବାଦ,୧୭ ।୯: ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ସୁରକ୍ଷାରେ ପୁଣିଥରେ ତ୍ରୁଟି ସାମ୍ନାକୁ ଆସିଛି । ତେଲେଙ୍ଗାନା ମୁକ୍ତ ଦିବସ ଅବସରରେ ହାଇଦ୍ରାବାଦ ପହଞ୍ଚିଥିବା ଅମିତ ଶାହଙ୍କ ଗାଡି ସାମ୍ନାରେ ଟିଆରଏସ ନେତାଙ୍କ କାର ଆସିବା ଘଟଣାକୁ ନେଇ ଟଣାଭିଡା ଆରମ୍ଭ ହୋଇଯାଇଛି । ଏହାପରେ ସୁରକ୍ଷାକର୍ମୀ ହଡବଡେଇ ଯାଇ ଶାହଙ୍କ ଗାଡି ସାମ୍ନାରୁ ଟିଆରଏସ ନେତାଙ୍କ କାରକୁ ହଟାଇ ଦେଇଥିଲେ ।
ସୂଚନାଯୋଗ୍ୟ, ଶାହା ଶୁକ୍ରବାର ବିଳମ୍ବିତ ରାତିରେ ହାଇଦ୍ରାବାଦ ପହଞ୍ଚିଥିଲେ । ମୁକ୍ତି ଦିବସ ଅବସରରେ ସେ କିଛି କାର୍ଯ୍ୟକ୍ରମରେ ଯୋଗ ଦେଇଥିଲେ । ଏହି ସମୟରେ ଶାହାଙ୍କ କାଫିଲା ସାମ୍ନାରେ ଟିଆରଏସ ନେତା ଗୋସୁଲା ଶ୍ରୀନିବାସ ତାଙ୍କ କାର ଠିଆ କରି ଦେଇଥିଲେ । ଏହାକୁ ଦେଖି ସୁରକ୍ଷାକର୍ମୀ ହଡବଡେଇ ଯାଇଥଲେ । ସେମାନେ ତୁରନ୍ତ କାରକୁ ହଟାଇ ଦେଇଥିଲେ ।
ଏହାକୁ ନେଇ ଟିଆରଏସ ନେତା ଗୋସୁଲା ଶ୍ରୀନିବାସ କହିଛନ୍ତି, ମୁଁ ଟେନସନରେ ଥିଲି ସେଥିପାଇଁ କାର ହଠାତ୍ ସେଠାରେ ଅଟକି ଯାଇଥିଲା । ସେମାନେ ମୋ କାରକୁ ଭଙ୍ଗାରୁଜା କରିଛନ୍ତି । ଏହି ମାମଲାକୁ ନେଇ ମୁଁ ପୋଲିସ ଅଧିକାରୀଙ୍କ ସହ କଥା ହେବି । ଏହା ପୂର୍ବରୁ ବି ମୁମ୍ବାଇରେ ଶାହାଙ୍କ ସୁରକ୍ଷାରେ ତ୍ରୁଟି ଦେଖିବାକୁ ମିଳିଥିଲା । ମୁମ୍ବାଇରେ ଜଣେ ବ୍ୟକ୍ତି ଘଣ୍ଟାଏ କାଳ ଶାହାଙ୍କ ନିକଟରେ ଘୁରି ବୁଲିଥିଲେ । ସେ ଆନ୍ଧ୍ର ପ୍ରଦେଶର ଜଣେ ଏମପିଙ୍କ ପିଏ ବୋଲି ନିଜକୁ ପରିଚୟ ଦେଇଥିଲେ । ଏହାପରେ ମୁମ୍ବାଇ ପୋଲିସ ମହାରାଷ୍ଟ୍ରର ଧୁଲେ ଜିଲାରୁ ହେମନ୍ତ ପାୱାରଙ୍କୁ ଗିରଫ କରିଥିଲା । ତାଙ୍କ ନିକଟରେ ସ୍ୱରାଷ୍ଟ୍ର ମନ୍ତ୍ରଣାଳୟର ପରିଚୟ ପତ୍ର ଥିଲା । ସେହି ବ୍ୟକ୍ତି ଜଣକ ମହାରାଷ୍ଟ୍ର ମୁଖ୍ୟମନ୍ତ୍ରୀ ଓ ଉପ ମୁଖ୍ୟମନ୍ତ୍ରୀଙ୍କ ଘର ନିକଟରେ ନଜର ଆସିଥିଲେ ।
