ଅନୁଗୋଳ ଅଫିସ, ୩ା୩: ଅନୁଗୋଳ ଜିଲାରେ ସୁରକ୍ଷା ବ୍ୟବସ୍ଥାକୁ ବଢ଼ାଯାଇଛି। ଜିଲାରେ ନୂତନ ଏସ୍ପି ଭାବେ ସୁଧାଂଶୁ ଶେଖର ମିଶ୍ର ଯୋଗଦେବା ପରେ ଏକ ବଡ଼ ଧରଣର ପଦକ୍ଷେପ ଗ୍ରହଣ କରାଯାଇଛି। ଟ୍ରାଫିକ ବ୍ୟବସ୍ଥାରେ ସୁଧାର ଆଣିବା ସହ ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ପ୍ରଥମ ପର୍ଯ୍ୟାୟରେ ଜିଲାର ୩ଟି ଥାନା ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଅନୁଗୋଳ ଥାନା ସମେତ ସଦର ଓ ନାଲ୍କୋ ଥାନା ଅଞ୍ଚଳର ଟ୍ରାଫିକ୍ ଛକ ସହ ଏଟିଏମ୍ ସୁରକ୍ଷା ବ୍ୟବସ୍ଥା ବଢ଼ାଯାଇଛି। ୫୦ ଜଣ କନଷ୍ଟେବଲ ଓ ହୋମଗାର୍ଡଙ୍କୁ କାର୍ଯ୍ୟରେ ନିୟୋଜିତ କରାଯାଇଛି। ୩ଟି ପର୍ଯ୍ୟାୟରେ ପ୍ରତ୍ୟେକ ଛକରେ ୨ ଜଣ ଲେଖାଏ ପୋଲିସ କର୍ମଚାରୀଙ୍କୁ ଦାୟିତ୍ୱ ପ୍ରଦାନ କରାଯାଇଥିବାବେଳେ ସେମାନଙ୍କ କାର୍ଯ୍ୟର ଅନୁଧ୍ୟାନ ପାଇଁ ଏସ୍ଆଇ ଓ ଏଏସ୍ଆଇ ସ୍ତରର ଅଧିକାରୀଙ୍କୁ ଦାୟିତ୍ୱ ବଣ୍ଟନ କରାଯାଇଛି।
୪ଟି ପର୍ଯ୍ୟାୟରେ ୩ଟି ଥାନାର ୫୦ କନଷ୍ଟେବଲ ଓ ହୋମ୍ଗାର୍ଡଙ୍କୁ ଡ଼୍ୟୁଟି ବଣ୍ଟା ଯାଇଥିବାବେଳେ ଏହାକୁ ତଦାରଖ କରିବାକୁ ସମସ୍ତ ଥାନାର ୪ ଜଣ ଅଧିକାରୀଙ୍କୁ ଦାୟିତ୍ୱ ପ୍ରଦାନ କରାଯାଇଛି। ସକାଳ ୮ଟାରୁ ପୂର୍ବାହ୍ନ ୧୧ଟା ପର୍ଯ୍ୟନ୍ତ ପ୍ରଥମ ରାଉଣ୍ଡ, ପୂର୍ବାହ୍ନ ୧୧ଟାରୁ ସନ୍ଧ୍ୟା ୬ ପର୍ଯ୍ୟନ୍ତ ଦ୍ୱିତୀୟ, ସନ୍ଧ୍ୟା ୬ଟାରୁ ରାତି ୯ ପର୍ଯ୍ୟନ୍ତ ତୃତୀୟ ଓ ରାତି ୯ଟାରୁ ସକାଳ ୮ଟା ପର୍ଯ୍ୟନ୍ତ ଚତୁର୍ଥ ରାଉଣ୍ଡ ଡ଼୍ୟୁଟି ବଣ୍ଟାଯାଇଛି। ହୁଲୁରିସିଂହା ବ୍ରିଜ ଠାରୁ ଆରମ୍ଭ କରି ବିଇଡି ଛକ, ଗୀତାଗ୍ରାମ, କାଲଟାକ୍ସ, ହାଟ ଛକ, କଲେଜ ଛକ, ଫରେଷ୍ଟ କଲେଜ ଛକ, ଷ୍ଟାଇଲ ବଜର ଛକ, ବଜାର ଛକ, ମେଡିକାଲ ଛକ, ବାଳିକା ଉଚ୍ଚ ବିଦ୍ୟାଳୟ ଛକ, ଜଗନ୍ନାଥ ମନ୍ଦିର ଛକ, ତାମ୍ରିତ କଲୋନୀ ଛକ, ଇକୋ ପାର୍କ ଛକ, ଟାଉନ ହାଇସ୍କୁଲ ଛକ, ମିଶ୍ରପଡ଼ା ଛକ, ଶିକ୍ଷକପଡ଼ା ଛକ ଆଦି ଅନୁଗୋଳ ଥାନା ଅଞ୍ଚଳରେ ରହିଛି। ସେହିଭଳି ସଦର ଥାନାରେ ମଝିକା ଛକ, ପ୍ରଗତିନଗର, ଛେଳିଆପଡ଼ା, ଡେରଜାଙ୍ଗ ଡ୍ୟାମ୍, କରଡ଼ାଗାଡ଼ିଆ ଛକ ଆଦି ରହିଛି। ନାଲକୋ ଥାନା ଅଧୀନରେ ନାଲକୋ ଆଶ୍ ପଣ୍ଡ ଛକ, ବଳରାମ ପ୍ରସାଦ ଶିବ ମନ୍ଦିର ଛକ, ଗିରାଙ୍ଗ ସେଣ୍ଟ୍ରାଲ ମାର୍କେଟ୍, ନାଲକୋ ଟାଉନଶିପ୍, କନିଆବେଡ଼ା ଶିବ ମନ୍ଦିର ଛକ, କୁଲାଡ଼ ଛକ, କାଣ୍ଡସର ଛକ ଆଦିରେ ପୋଲିସ ମୁତୟନ କରାଯିବ। ଏଥିସହ ରାଜପଥରେ ହୋମଗାର୍ଡ ଓ କନଷ୍ଟେବଳଙ୍କୁ ପାଟ୍ରୋଲିଂ କରିବାକୁ ନିର୍ଦ୍ଦେଶ କରାଯାଇଛି। ସେହିପରି ଅନୁଗୋଳ ଥାନା ଅଧୀନରେ ଥିବା ୨୩ଟି ଏଟିଏମ୍ରେ, ସଦର ଥାନା ଅଧୀନରେ ୮ ଓ ନାଲ୍କୋ ଥାନା ଅଧୀନରେ ଥିବା ୫ ଏଟିଏମ୍କୁ ଜଗିବାକୁ ନିର୍ଦ୍ଦେଶରେ ଉଲ୍ଲେଖ ରହିଛି। ପ୍ରୋବେଶନ୍ ହଷ୍ଟେଲ ସହ ପୋଲିସ ମୁଖ୍ୟାଳୟ ସମ୍ମୁଖରେ ମଧ୍ୟ ପୋଲିସ କର୍ମଚାରୀଙ୍କୁ ମୁତୟନ ପାଇଁ ନିର୍ଦ୍ଦେଶ ଦିଆଯାଇଛି। ଅନୁଗୋଳ ସହରରେ ଥିବା ୧୬ଟି ଟ୍ରାଫିକ ପୋଷ୍ଟ ସହ ସଦର ଥାନା ଅଞ୍ଚଳରେ ଥିବା ୨ଟି ଓ ନାଲ୍କୋ ଥାନା ଅଧୀନରେ ଥିବା ୪ଟି ଟ୍ରାଫିକ୍ ପୋଷ୍ଟରେ କର୍ମଚାରୀଙ୍କୁ ନିୟୋଜିତ କରାଯିବ। କୌଣସି ବ୍ୟକ୍ତିଙ୍କ କାର୍ଯ୍ୟକଳାପ ନେଇ ସନ୍ଦେହ ସୃଷ୍ଟି ହେଲେ ତୁରନ୍ତ ଏହି କର୍ମଚାରୀମାନେ ନିଜ ଅଞ୍ଚଳର ଥାନାକୁ ଅବଗତ କରିବେ ବୋଲି କୁହାଯାଇଛି। ଏ ନେଇ ଅନୁଗୋଳ ଏସ୍ଡିପିଓ ରମାକାନ୍ତ ମହାଳିକ କହିଛନ୍ତି, ଏଭଳି ଏକ ନୂତନ ପଦକ୍ଷେପ ଗ୍ରହଣ କରାଯାଇଛି। ଏହାକୁ ଏସ୍ପି ଅନୁଧ୍ୟାନ କରିବେ। ଆପରାଧିକ କାର୍ଯ୍ୟକଳାପ ସହ ଟ୍ରାଫିକ ବ୍ୟବସ୍ଥା ଉପରେ ଏହାଦ୍ୱାରା ନଜର ରହିବ। ପୋଲିସ ଉପରେ ଲୋକଙ୍କ ଭରସା ମଧ୍ୟ ବଢ଼ିବ ବୋଲି ଏସ୍ଡିପିଓ ପ୍ରକାଶ କରିଛନ୍ତି।
