ଶ୍ରୀନଗର,୧୯।୧୦: ଜମ୍ମୁ-କଶ୍ମୀରରେ ଜାରି ରହିଥିବା ଟାର୍ଗେଟ କିଲିଂ ବିରୋଧରେ ମିଳିତ ସୁରକ୍ଷାକର୍ମୀଙ୍କ ପକ୍ଷରୁ ବହୁସ୍ତରୀୟ ରଣନୀତି ପ୍ରସ୍ତୁତ କରାଯାଇଛି। ଖୋଜି ଖୋଜି ଆତଙ୍କବାଦୀଙ୍କୁ ବାହାର କରିବାକୁ ସୁରକ୍ଷାକର୍ମର ତତ୍ପର ହୋଇ ଉଠିଛନ୍ତି। ସୀମା ପାର ହ୍ୟାଣ୍ଡଲରଙ୍କ ନେଟ୍ଓ୍ବାର୍କ ଭାଙ୍ଗିବା ପାଇଁ ଯୋଜନା ହୋଇଛି। ଏହା ସହିତ ହାଇବ୍ରିଡ୍ ଆତଙ୍କବାଦୀ ଏବଂ ସେମାନଙ୍କୁ ସହାୟତା ଯୋଗାଇ ଦେଉଥିବା ଲୋକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ଲାଗି ନିଷ୍ପତ୍ତି ହୋଇଛି।
ସେହିପରି ରାଜ୍ୟରେ ପ୍ରତିବନ୍ଧିତ ହୋଇଥିବା ମୌଳବାଦୀ ସଂଗଠନର କାର୍ଯ୍ୟକଳାପ ଉପରେ ତୀକ୍ଷ୍ଣ ନଜର ରଖାଯାଇଛି। ଇତିମଧ୍ୟରେ ୭୦୦ରୁ ଅଧିକ ସନ୍ଦିଗ୍ଧଙ୍କୁ ରଖି ପଚରାଉଚରା କରାଯାଉଛି। ସୀମାବର୍ତ୍ତୀ ଅଞ୍ଚଳରେ ରହୁଥିବା ଆତଙ୍କବାଦୀ ସହାୟତାକାରୀଙ୍କୁ ବାହାର ଜିଲାକୁ ପଠା ଦିଆଯିବା ଆରମ୍ଭ ହୋଇଛି। ଏହା ଦ୍ୱାରା ସୀମା ପାର୍ ହ୍ୟାଣ୍ଡଲରଙ୍କ ସହିତ ସେମାନଙ୍କର ଯୋଗାଯୋଗ ବିଚ୍ଛିନ୍ନ ହୋଇଯିବ। ଫଳରେ ନେଟ୍ଓ୍ବାର୍କ ଭାଙ୍ଗିବା ସହଜ ହେବ ବୋଲି କଶ୍ମୀର ଜୋନ୍ ପୋଲିସ ପକ୍ଷରୁ କୁହାଯାଇଛି।
ଅପରପକ୍ଷରେ ପଥର ଫିଙ୍ଗା ଘଟଣାରେ ସମ୍ପୃକ୍ତି ଥିବା ଅଭିଯୁକ୍ତଙ୍କୁ ରାଜ୍ୟ ବାହାର ଜେଲକୁ ସ୍ଥାନାନ୍ତର କରାଯାଇଛି। ଟାର୍ଗେଟ କିଲିଂ ଯୋଗୁ ଲୋକଙ୍କ ମଧ୍ୟରେ ବଢୁଥିବା ଆତଙ୍କକୁ କମ୍ କରିବା ଲାଗି ପୋଲିସ ବିଭାଗ ପକ୍ଷରୁ ସ୍ବତନ୍ତ ପଦକ୍ଷେପ ଗ୍ରହଣ କରାଯାଇଛି। ଏଭଳି ଘଟଣାରେ ଆତଙ୍କବାଦୀଙ୍କୁ ପାଣ୍ଠି ଯୋଗାଣ ପ୍ରକ୍ରିୟାରେ ରୋକ ଲଗାଇବା ଲାଗି ପ୍ରତିବନ୍ଧିତ ମୌଳବାଦୀ ସଂଗଠନର ଆକାଉଣ୍ଟ୍ ଯାଞ୍ଚ୍ କରାଯାଉଥିବା ପୋଲିସ ପକ୍ଷରୁ କୁହାଯାଇଛି।
