ନୂଆଦିଲ୍ଲୀ,୧୧।୨(ପି.ଟି.): ଚେନ୍ନାଇରେ ଶନିବାରଠାରୁ ଆରମ୍ଭ ହେବାକୁ ଯାଉଥିବା ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ ପାଇଁ ଭାରତୀୟ ଦଳରେ ଅତିକମ୍ରେ ଗୋଟିଏ ପରିବର୍ତ୍ତନ ହେବା ନିଶ୍ଚିତ ହୋଇଛି। ପ୍ରଥମ ଟେଷ୍ଟରେ ନୌରାଶ୍ୟଜନକ ପ୍ରଦର୍ଶନ କରିଥିବା ନଦିମ ଏହି ମ୍ୟାଚ୍ରୁ ବାଦ୍ ପଡିବେ। ନଦିମଙ୍କ ବଦଳ ଖେଳାଳି ନେଇ ଶୁକ୍ରବାର ନିଷ୍ପତ୍ତି ନିଆଯିବ। ତେବେ ଫିଟ୍ନେସ ହାସଲ କରିଥିବା ସ୍ପିନ ଅଲ୍ରାଉଣ୍ଡର ଅକ୍ଷର ପଟେଲ ନଦିମଙ୍କ ବଦଳରେ ଖେଳିବା ସମ୍ଭାବନା ରହିଛି। ପ୍ରଥମ ଟେଷ୍ଟରେ ଭାରତ ଭ୍ରମଣକାରୀ ଇଂଲଣ୍ଡଠାରୁ ବୃହତ୍ ବ୍ୟବଧାନରେ ପରାସ୍ତ ହୋଇଥିଲା। ଅକ୍ଷରଙ୍କ ଆଣ୍ଠୁରେ ସାମାନ୍ୟ ସମସ୍ୟା ରହିଥିଲା। ନେଟ୍ସରେ ସେ ବ୍ୟାଟିଂ କରିଥିବା ବେଳେ ଆଗାମୀ ଦୁଇ ଦିନରେ ସେ ବୋଲିଂ ଆରମ୍ଭ କରିବେ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ କୁହାଯାଇଛି। ଅକ୍ଷରଙ୍କ ଖେଳିବା ନେଇ ଅଧିନାୟକ ବିରାଟ କୋହଲି, କୋଚ୍ ରବି ଶାସ୍ତ୍ରୀ ଓ କୋଚ୍ ଭରତ ଅରୁଣ ନିଷ୍ପତ୍ତି ନେବେ ବୋଲି କୁହାଯାଇଛି।
ପରାଜୟ ପରେ କୋହଲି ଓ୍ବାଶିଂଟନ ସୁନ୍ଦର ଓ ନଦିମଙ୍କ ପ୍ରଦର୍ଶନରେ ଅସନ୍ତୋଷ ଜାହିର କରିଥିଲେ। ଦ୍ରୁତ ବୋଲର ଯଶପ୍ରୀତ ବୁମ୍ରା, ଈଶାନ୍ତ ଶର୍ମା ଓ ରବିଚନ୍ଦ୍ରନ ଅଶ୍ୱିନଙ୍କୁ ସହାୟତା ଦେବାରେ ଏହି ଦୁଇ ବୋଲର ବିଫଳ ହୋଇଥିଲେ। ପ୍ରଥମ ଟେଷ୍ଟରେ ୪ ଉଇକେଟ ହାସଲ କରିଥିଲେ ମଧ୍ୟ ନଦିମ ୫୯ ଓଭରରେ ୨୩୩ ରନ ବ୍ୟୟ କରିଥିଲେ ଓ ଓଭର ପିଛା ୪ରୁ ଊର୍ଦ୍ଧ୍ୱ ରନ ବ୍ୟୟ କରିଥିଲେ। ସେହିପରି ଓ୍ବାଶିଂଟନ ୨୬ ଓଭରରେ ୯୮ ରନ ବ୍ୟୟ କରିଥିଲେ। ଦ୍ୱିତୀୟ ଇନିଂସରେ ତାଙ୍କୁ ମାତ୍ର ଗୋଟିଏ ଓଭର ବୋଲିଂ କରିବାକୁ ଦିଆଯାଇଥିଲା। ତେବେ ପ୍ରଥମ ଇନିଂସରେ ସେ ବ୍ୟାଟିଂରେ ଦମ୍ଦାର ପ୍ରଦର୍ଶନ କରି ଅପରାଜିତ ୮୫ ରନ ସଂଗ୍ରହ କରିଥିଲେ। ତେଣୁ ଦଳରେ ସେ ସ୍ଥାନ ବଜାୟ ରଖିବା ଆଶା କରାଯାଉଛି।
ପ୍ରଥମ ଟେଷ୍ଟର ଦ୍ୱିତୀୟ ଇନିଂସରେ ଜୋଫ୍ରା ଆର୍ଚରଙ୍କ ଏକ ଶର୍ଟ ବଲ୍ରେ ସାମାନ୍ୟ ଆହତ ହୋଇଥିଲେ ମଧ୍ୟ ଅଶ୍ୱିନ ଫିଟ୍ ଅଛନ୍ତି। ପ୍ରଥମ ଟେଷ୍ଟରେ ଅଶ୍ୱିନ ସବୁଠାରୁ ସଫଳ ବୋଲର ସାବ୍ୟସ୍ତ ହୋଇଥିଲେ।
ପ୍ରଥମ ଟେଷ୍ଟରେ ଟସ୍ ଗୁରୁତ୍ୱପୂର୍ଣ୍ଣ ଥିଲା। ପ୍ରଥମେ ବ୍ୟାଟିଂ କରିବା ଦଳ ଫାଇଦା ହାସଲ କରିଥିଲା। ତେଣୁ ଦ୍ୱିତୀୟ ଟେଷ୍ଟରେ ଏକ ଭିନ୍ନ ଧରଣର ଉଇକେଟ ପ୍ରସ୍ତୁତ କରିବାକୁ କ୍ୟୁରେଟର ଭି. ରମେଶ କୁମାର ଓ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ହେଡ୍ ଅଫ୍ ପିଚେସ୍ ଆଣ୍ଡ ଗ୍ରାଉଣ୍ଡ କମିଟି ତାପସ ଚାଟାର୍ଜୀ ମନ ବଳାଇଛନ୍ତି। ଏହି ପିଚ୍ରେ ଟସ୍ର ଭୂମିକା ଗୌଣ ହେବ ଓ ଏନେଇ ପ୍ରୟାସ କରାଯିବ। ପିଚ୍ରେ ଘାସ ରହିଛି ଓ ଏଥିରେ ବଲ ଟର୍ନ ମଧ୍ୟ ହେବ। ଏକ ଶୁଖିଲା ପିଚ୍ ଉପରେ ଖରା ପଡିଲେ ଏହା ଫାଟିବାର ସମ୍ଭାବନା ରହିବ। ଉଭୟ ବ୍ୟାଟ୍ସମ୍ୟାନ ଓ ବୋଲରଙ୍କୁ ସୁହାଇବା ଭଳି ଏକ ପିଚ୍ ପ୍ରସ୍ତୁତ କରିବାକୁ ପ୍ରୟାସ କରାଯିବ। ପ୍ରଥମ ଟେଷ୍ଟର ତୃତୀୟ ଦିବସରେ ବଲ୍ ଟର୍ନ ହୋଇଥିଲା। ତେବେ ଏହି ନୂଆ ପିଚ୍ରେ ପ୍ରଥମ ଦିନରୁ ହିଁ ବଲ୍ କିଛି ମାତ୍ରାରେ ଟର୍ନ ହେବ ବୋଲି ଆଶା କରାଯାଉଛି।
