ଭୁବନେଶ୍ୱର, ୧୦।୧୨(ବ୍ୟୁରୋ): ଉଚ୍ଚଶିକ୍ଷା କ୍ଷେତ୍ରରେ ରାଜ୍ୟ ସରକାରଙ୍କ ଅଜବ ନୀତିକୁ ନେଇ ଏବେ ଚର୍ଚ୍ଚା ଚାଲିଛି। ଡିଗ୍ରୀ କଲେଜରେ ସିଟ୍ ପୂରଣ ହେଉ ନ ଥିବାବେଳେ ଅଧିକାଂଶ ଶିକ୍ଷାନୁଷ୍ଠାନରେ ଆବଶ୍ୟକ ସଂଖ୍ୟକ ଅଧ୍ୟାପକ ଓ ଭିତ୍ତିଭୂମି ନାହିଁ। ଏ ପରିସ୍ଥିତିରେ ନୂଆ ଡିଗ୍ରୀ କଲେଜ ଖୋଲିବାକୁ ଅଣ୍ଟାଭିଡିଛି ଉଚ୍ଚଶିକ୍ଷା ବିଭାଗ। ୨୦୨୦-୨୧ ଶିକ୍ଷାବର୍ଷରେ ଉଚ୍ଚଶିକ୍ଷା ବିଭାଗ ନିଷ୍ପତ୍ତି ନେଇଥିଲା ଯେ, ୨୦୨୫-୨୬ ଶିକ୍ଷାବର୍ଷ ପର୍ଯ୍ୟନ୍ତ ରାଜ୍ୟରେ ନୂତନ ଡିଗ୍ରୀ ଓ ପ୍ରଫେସନାଲ କଲେଜ ଖୋଲିବାକୁ ଅନୁମତି ଦିଆଯିବ ନାହିଁ। ସିଟ୍ ଖାଲି ପଡ଼ୁଥିବାରୁ ଏଭଳି ନିଷ୍ପତ୍ତି ନିଆଯାଇଥିଲା। କିନ୍ତୁ ଏବେ ସେଥିରେ ପରିବର୍ତ୍ତନ କରାଯିବା ସହ ନିଷ୍ପତ୍ତି ପ୍ରତ୍ୟାହାର କରାଯାଇଛି। ଗତ ମାସରେ ବିଭାଗୀୟ ସଚିବ ବିଷ୍ଣୁପଦ ସେଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚସ୍ତରୀୟ କ୍ଷମତାସମ୍ପନ୍ନ କମିଟିରେ ସ୍ଥିର ହୋଇଛି ଯେ, ଏଣିକି ରାଜ୍ୟରେ ନୂଆ କଲେଜ/ବିଭାଗ/ପାଠ୍ୟକ୍ରମ ଖୋଲିବ। ସିଟ୍ ବୃଦ୍ଧି ଲାଗି ମଧ୍ୟ ଅନୁମତି ଦିଆଯିବ। ଏହାଦ୍ୱାରା ଛାତ୍ରୀଛାତ୍ର ଉପକୃତ ହେବେ ବୋଲି ଉଚ୍ଚଶିକ୍ଷା ବିଭାଗ କହୁଥିବାବେଳେ ଏହାକୁ ନେଇ ଶିକ୍ଷାବିତ୍ ଓ ଅଧ୍ୟାପକ ସଂଘ ସମାଲୋଚନା ଆରମ୍ଭ କରିଛନ୍ତି।
ରାଜ୍ୟରେ ବର୍ତ୍ତମାନ ୧,୦୨୪ ଡିଗ୍ରୀ କଲେଜରେ ୨,୫୫,୯୧୩ ସିଟ୍ ରହିଛି। ଯୁକ୍ତ୩ ନାମଲେଖା ପାଇଁ ୩ଥର ଆବେଦନ ଲାଗି ସୁଯୋଗ ଦିଆଯାଇଥିଲେ ମଧ୍ୟ ୫୭ ହଜାରରୁ ଊର୍ଦ୍ଧ୍ୱ ସିଟ୍ ଖାଲି ପଡ଼ିଛି। ସାମ୍ସ ପୋର୍ଟାଲର ସୂଚନାନୁସାରେ, ୨,୫୫,୯୧୩ ସିଟ୍ ମଧ୍ୟରୁ ୧,୯୮,୪୪୫ଜଣ ଛାତ୍ରୀଛାତ୍ର ନାମ ଲେଖାଇଥିବାବେଳେ ୫୭,୪୬୮ ସିଟ୍ ଖାଲି ପଡ଼ିଛି। କଳାରେ ୧୭,୩୦୩ ସିଟ୍ ଖାଲି ଥିବାବେଳେ ପଦାର୍ଥ ବଜ୍ଞାନରେ ୧୮,୧୬୯, ଜୈବ ବିଜ୍ଞାନରେ ୮,୨୯୪, ବାଣିଜ୍ୟରେ ୧୦,୪୧୮, ସେଲ୍ଫ ଫାଇନାନ୍ସିଂରେ ୫୮୦ ଏବଂ ସଂସ୍କୃତରେ ୨,୭୦୪ ସିଟ୍ ବଳକା ପଡ଼ିଛି। ଇତିମଧ୍ୟରେ ଅକ୍ଟୋବର ୧୩ରୁ ଯୁକ୍ତ୩ ପ୍ରଥମ ବର୍ଷ ପାଠପଢ଼ା ଆରମ୍ଭ ହୋଇସାରିଛି। ଏବେ ସିଟ୍ ପୂରଣ ପାଇଁ ଉଚ୍ଚଶିକ୍ଷା ବିଭାଗ ପୁଣି ଚତୁର୍ଥ ପର୍ଯ୍ୟାୟ ନାମଲେଖା ପ୍ରକ୍ରିୟା ଆରମ୍ଭ କରିଛି। ଶନିବାର ପୂର୍ବାହ୍ନ ୧୧ଟାରୁ ଆବେଦନ ପ୍ରକ୍ରିୟା ଆରମ୍ଭ ହେଉଥିବାବେଳେ ଏହା ୧୨ ତାରିଖ ରାତି ୧୧ଟା ୪୫ ପର୍ଯ୍ୟନ୍ତ ଚାଲିବ। ଉଚ୍ଚଶିକ୍ଷା ବିଭାଗ ପକ୍ଷରୁ ଗୁରୁବାର ପ୍ରକାଶିତ ବିଜ୍ଞପ୍ତି ଅନୁସାରେ, ୧୭ତାରିଖ ଦିନ ମନୋନୀତ ଛାତ୍ରୀଛାତ୍ରଙ୍କ ମେଧା ତାଲିକା ପ୍ରକାଶ ପାଇବ। ୧୯ ଓ ୨୦ ତାରିଖ ସକାଳ ୯ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ମନୋନୀତ ଛାତ୍ରୀଛାତ୍ର ନାମ ଲେଖାଇବେ।
ତେବେ ସିଟ୍ ପୂରଣ ହେଉ ନ ଥିବାରୁ ନାମଲେଖା ପ୍ରକ୍ରିୟା ସରୁନାହିଁ। ଏପରି ସ୍ଥିତିରେ ନୂଆ କଜେଲ ଖୋଲିବା କେତେ ଯୁକ୍ତିଯୁକ୍ତ ତାକୁ ନେଇ ଉଠିଛି ପ୍ରଶ୍ନ। ଏନେଇ ୬୬୨ବର୍ଗ ଅଧ୍ୟାପକ ସଂଘ ସଭାପତି ଗୋଲକ ନାୟକ କହିଛନ୍ତି, ସରକାରଙ୍କ ଏଭଳି ନିଷ୍ପତ୍ତି ସମସ୍ତଙ୍କୁ ବ୍ୟଥିତ କରିଛି। ଗୋଟିଏପଟେ କଲେଜରେ ସିଟ୍ ପୂରଣ ହେଉ ନ ଥିବାବେଳେ ଅନ୍ୟପଟେ ନୂଆ କଲେଜ ଖୋଲିବା ପଛରେ କ’ଣ କାରଣ ତାହା ଜଣାପଡ଼ୁନାହିଁ। ଯେଉଁସବୁ କଲେଜରେ ଭିତ୍ତିଭୂମିର ଅଭାବ ରହିଛି ତାକୁ ସଜାଡ଼ିବା ଦରକାର। ସବୁଠାରୁ ବଡ଼ କଥାହେଲା ରାଜ୍ୟରେ ୫୩ଟି ସରକାରୀ ଡିଗ୍ରୀ କଲେଜ ରହିଛି। ଏସବୁ କଲେଜରେ ବି ସିଟ୍ ପୂରଣ ହେଉ ନାହିଁ। କାରଣ ଏସବୁ କଲେଜରେ ଆବଶ୍ୟକ ଅଧ୍ୟାପକ ନାହାନ୍ତି। ସେହିପରି ଅନୁଦାନପ୍ରାପ୍ତ କଲେଜରୁ ଯେଉଁ ଅଧ୍ୟାପକମାନେ ଅବସର ନେଉଛନ୍ତି, ଉକ୍ତ ପଦବୀ ଆଉ ପୂରଣ ହେଉ ନାହିଁ। ଫଳରେ ପାଠପଢ଼ା ଗୁରୁତର ବ୍ୟାଘାତ ହେଉଛି। ପିଲାମାନେ ନାମଲେଖା ପାଇଁ ମଧ୍ୟ ଇଚ୍ଛା ପ୍ରକାଶ କରୁନାହାନ୍ତି। ତେବେ ଆବାସିକ ମହାବିଦ୍ୟାଳୟଗୁଡ଼ିକ ଲାଭବାନ ହେଉଛନ୍ତି। ମିଛ ପ୍ରଲୋଭନ ଦେଖାଇ ଛାତ୍ରୀଛାତ୍ରଙ୍କୁ ନିଜ ଶିକ୍ଷାନୁଷ୍ଠାନକୁ ଟାଣି ନେଉଛନ୍ତି। ଉଚ୍ଚଶିକ୍ଷା ବିଭାଗର ନୂଆ ନିଷ୍ପତ୍ତି ଘରୋଇ କଲେଜଗୁଡ଼ିକୁ ଅଧିକ ପ୍ରୋତ୍ସାହିତ କରିବ। ସରକାର ଆଗକୁ ବଢ଼ୁଛନ୍ତି ତାହା ଠିକ୍। କିନ୍ତୁ ରାଜ୍ୟରେ ଏବେ ଯେଉଁସବୁ କଲେଜ ରହିଛି ତା’ର ଭିତ୍ତିଭୂମି ସଜାଡ଼ିବା ସହିତ ସେଠାରେ କିପରି ଅଧ୍ୟାପକ ପଦବୀ ପୂରଣ ହେବ ଏବଂ ସେଠାକୁ କିପରି ପିଲା ଆସିବେ ସେଥିପାଇଁ ପଦକ୍ଷେପ ନେବା ଉଚିତ ବୋଲି ସଭାପତି ନାୟକ କହିଛନ୍ତି।
