ପାରାଦୀପ,୨୩।୯(ଶରତ ରାଉତ): ବଙ୍ଗୋପସାଗରରେ ସୃଷ୍ଟ ଲଘୁଚାପ ପ୍ରଭାବରେ ବୁଧବାର ସମୁଦ୍ର ଅତ୍ୟନ୍ତ ଅଶାନ୍ତ ହୋଇପଡ଼ିଛି। ସମୁଦ୍ରରେ ଉଚ୍ଚ ଢେଉ ସହ ବିପଦଜନକ ପରିସ୍ଥିତି ସୃଷ୍ଟି ହୋଇଥିବାରୁ ସମୁଦ୍ର ମଧ୍ୟରେ ମାଛ ଧରୁଥିବା ଆନ୍ଧ୍ରପ୍ରଦେଶର ୨୮ଟି ମାଛଧରା ଟ୍ରଲର ବୁଧବାର ସକାଳୁ ପାରାଦୀପ ବନ୍ଦର ପୋତାଶ୍ରୟରେ ଆଶ୍ରୟ ନେଇଛନ୍ତି। ଏହି ଟ୍ରଲରଗୁଡ଼ିକରେ ପ୍ରାୟ ୨୪୮ ଜଣ ମତ୍ସ୍ୟଜୀବୀ ରହିଛନ୍ତି। ଏହା ବ୍ୟତୀତ ପାରାଦୀପ ମାଛଧରା ବନ୍ଦର ପୋତାଶ୍ରୟରେ ମଧ୍ୟ ଅନେକ ସ୍ଥାନୀୟ ଟ୍ରଲର ଆସି ସୁରକ୍ଷିତ ଭାବେ ରହିଛନ୍ତି।
ଅନ୍ୟପଟେ, ଆଜି ସକାଳୁ ପାରାଦୀପ ଓ ଆଖପାଖ ଅଞ୍ଚଳରେ ହାଲୁକା ପବନ ସହ ତୁହାକୁ ତୁହା ବର୍ଷା ଓ ଖରା-ଛାଇର ଖେଳ ଦେଖିବାକୁ ମିଳୁଛି। ସମ୍ଭାବ୍ୟ କ୍ଷୟକ୍ଷତି ଓ ବିପଦକୁ ଏଡ଼ାଇବା ପାଇଁ ପ୍ରଶାସନ ପକ୍ଷରୁ ପାରାଦୀପର ସମସ୍ତ ସ୍କୁଲକୁ ଛୁଟି ଘୋଷଣା କରାଯାଇଛି।
ସମୁଦ୍ରର ସ୍ଥିତି ବିଗୁଡ଼ୁଥିବାରୁ ଏବଂ ସମ୍ଭାବ୍ୟ ବାତ୍ୟା ପରିସ୍ଥିତିକୁ ଦୃଷ୍ଟିରେ ରଖି ପାରାଦୀପ ବନ୍ଦର ପ୍ରଶାସନ ପକ୍ଷରୁ ୩ ନମ୍ବର ବିପଦ ସଙ୍କେତ ଜାରି କରାଯାଇଛି। ମତ୍ସ୍ୟଜୀବୀମାନଙ୍କୁ ସମୁଦ୍ର ମଧ୍ୟକୁ ନ ଯିବା ପାଇଁ କଡ଼ା ଚେତାବନୀ ଦିଆଯାଇଛି।
Dharitri – Odisha’s No.1 Odia Daily
