ମହାକାଳପଡ଼ା,୧୪ା୭(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ତଳିଆ ଅଞ୍ଚଳରେ ସମୁଦ୍ର ଜଳ ବୁଧବାର ପ୍ରବେଶ କରିଛି । ସମୁଦ୍ରରେ ଉଚ୍ଚ ଜୁଆର ଉଠିବା ପରେ ଏହି ପରିସ୍ଥିତି ସୃଷ୍ଟି ହୋଇଛି। ଚିଙ୍ଗୁଡ଼ି ଘେରି ବନ୍ଧ ମୁକୁଳା ଥିବାରୁ ସମୁଦ୍ର ଜଳ ଗାଁ ଭିତରକୁ ପ୍ରବେଶ କରୁଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ପୂର୍ଣ୍ଣିମା ତିଥି ଯୋଗୁ ଉଚ୍ଚ ଜୁଆର ଉଠି ଗାଁ ଭିତରକୁ ପଶି ଆସିଛି ବୋଲି ସ୍ଥାନୀୟ ଲୋକମାନେ କହିଛନ୍ତି । ଏହାକୁ ନେଇ ତଳିଆ ଅଞ୍ଚଳ ଲୋକଙ୍କ ମଧ୍ୟରେ ଆତଙ୍କ ପ୍ରକାଶ ପାଇଛି। ବିଶେଷ କରି ମହାକାଳପଡ଼ା ବ୍ଲକ୍ ଅଧୀନ ନାଞ୍ଜୁରା ପଞ୍ଚାୟତର ପାଣିଖିଆ ଗାଁ ଓ ଚାଷ ଜମିରେ ସମୁଦ୍ର ଜୁଆର ବୁଧବାର ପ୍ରବେଶ କରିଥିଲା । ଏଥିପାଇଁ ଘର ଲୁଣି ପାଣି ଘେରରେ ରହିଛି । ଏବେ ଗାଁରେ ବିଭିନ୍ନ ସରୀସୃପ ବୁଲୁଛନ୍ତି ବୋଲି ସେହି ଗାଁର ଗୁରୁଭା ହାଁସଦା କହିଛନ୍ତି । ସେହିପରି ବ୍ଲକର ଖରିନାଶି ପଞ୍ଚାୟତ ୧୨ନଂ.ଆଦିବାସୀ ଗ୍ରାମର ବନ୍ଧ ବୁଡ଼ି ଗାଁରେ ସମୁଦ୍ର ଜଳ ପ୍ରବେଶ କରିଛି ବୋଲି ଦୀନବନ୍ଧୁ ମୁର୍ମୁ ଅଭିଯୋଗ କରିଛନ୍ତି ।
