ରିଆମାଳ, ୧୭ା୧୨ (ଡି.ଏନ.ଏ)- ଦେବଗଡ଼ ଜିଲା ରିଆମାଳ ବ୍ଲକ ମଳେହିପଡା ପଞ୍ଚାୟତରେ ବୁଧବାର ପିଡିଏସ୍ ଚାଉଳକୁ ସରପଞ୍ଚ ହାବିଲ ସାହୁ ଫେରାଇ ଦେଇଥିବା ଜଣାପଡିଛି। ଘଟଣା ଅନୁସାରେ ପଞ୍ଚାୟତକୁ କିଛି ମାସ ହେବ ଠିକ୍ ମାପଠାରୁ କମ୍ ଏବଂ ଅତି ନିମ୍ନମାନର ଚାଉଳ ଆସୁଥିବା ବାରମ୍ବାର ଯୋଗାଣ ବିଭାଗକୁ ଅଭିଯୋଗ କରି ଆସୁଥିଲେ। ବୁଧବାର ୪୭୫ ପ୍ୟାକେଟ ଚାଉଳ ଆସିଥିବାବେଳେ ଯୋଗାଣ ସହାୟିକା ସୁନୀତା ପ୍ରଧାନ ପୋକରା, ଧୁଳିଗୁଣ୍ଡା ଯୁକ୍ତ ତଥା ମୁଷାଲେଣ୍ଡି ଓ ଜାଲିଭିଡା ଚାଉଳ ଏବଂ ଫଟା ବସ୍ତାରେ ଆସିଥିବା ଦେଖିବାକୁ ପାଇଥିଲେ। ଫଳରେ ସେ ଏମଆଇ ଜୟନ୍ତ କୁଣ୍ଡୁ ଏବଂ ସରପଞ୍ଚ ହାବିଲ ସାହୁ, ସମିତି ସଭ୍ୟ ଅମୂଲ୍ୟ ପ୍ରଧାନଙ୍କୁ ଜଣାଇ ପଞ୍ଚାୟତ କାର୍ଯ୍ୟାଳୟରେ ଥିବା ଗୋଦାମ ଘରକୁ ଡକାଇଥିଲେ। ସରପଞ୍ଚ ସାହୁ ଏବଂ ସମିତି ସଭ୍ୟ ପ୍ରଧାନ ସେଠାରେ ପହଞ୍ଚି ଅତି ନିମ୍ନମାନର ଚାଉଳ ଦେଖି ତାକୁ ଫେରାଇ ଦେବା ପାଇଁ କହିଥିଲେ। କାରଣ ଚାଉଳ ନେବା ସମୟରେ ଉପଭୋକ୍ତାମାନେ ନିମ୍ନମାନର ଚାଉଳ ପାଇଁ ଅସନ୍ତୋଷ ଜାହିର କରିବା ସହିତ ଗାଳିଗୁଲଜ କରିଥାଆନ୍ତି। ଚାଉଳ ପ୍ୟାକେଟରେ କମ ଆସୁଥିବାରୁ ବହୁ ସମୟରେ ଯୋଗାଣ ସହାୟିକା ନିଜ ହାତରୁ ଅର୍ଥ ବହନ କରୁଥିବା ଜଣାଇଥିଲେ। ବିଡିଓ ଦିବ୍ୟଶଙ୍କର ଜୟପୁରିଆଙ୍କୁ ଏହି ବିଷୟରେ ପଚାରିବାରୁ ଏମଆଇ କିମ୍ବା ସିଏସଓ ଏହାର ଉତ୍ତର ଦେଇ ପାରିବେ ବୋଲି କହିଥିଲେ। କିଛି ଦିନ ତଳେ ପିଡିଏସ୍ ସାମଗ୍ରିରେ ଆସୁତ୍ଥିବା ଗହମରେ କଣ୍ଟାଜାତୀୟ ଏକ ଫଳ ମିଶି ଆସୁଥିବାରୁ ଉପଭୋକ୍ତାମାନେ ଅସନ୍ତୋଷ ଜାହିର କରିଥିଲେ। ଏବେ ପ୍ରତ୍ୟେକ ପଂଚାୟତକୁ ଏହି ଭଳି ନିମ୍ନମାନର ଚାଉଳ ଆସୁଥିବାରୁ ଯୋଗାଣ ବିଭାଗ ଏଥିପ୍ରତି ଗୁରୁତ୍ୱ ଦେଲେ ଉପଭୋକ୍ତାମାନେ ଖାଇବା ଚାଉଳ ଗଣ୍ଡାକ ନେଇ ଖୁସିରେ ଖାଇପାରନ୍ତେ। ଯଦି ଆଗାମୀ ଦିନରେ ଏହି ସମସ୍ୟାର ସମାଧାନ ନ କରାଯାଏ ତା’ହେଲେ ପଞ୍ଚାୟତବାସୀ ଆନ୍ଦୋଳନକୁ ଓହ୍ଲାଇବେ ବୋଲି ମଳେହିପଡା ସରପଞ୍ଚ ଓ ସମିତି ସଭ୍ୟ କହିଥିଲେ ା
