ଖୋର୍ଦ୍ଧା,୨୫ା୫(ପ୍ରଭାତ ପାଣିଗ୍ରାହୀ): ଖୋର୍ଦ୍ଧା ସହରର ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି। ବର୍ଷାଦିନକୁ ଦୃଷ୍ଟିରେ ରଖି ପୌର ପ୍ରଶାସନ ପକ୍ଷରୁ କୌଣସି ବ୍ୟବସ୍ଥା କରାଯାଇନାହିଁ। ଶନିବାର ବର୍ଷା ହେବାରୁ ଡ୍ରେନ୍ରେ ପାଣି ନିଷ୍କାସନ ହୋଇ ନ ପାରି ରାସ୍ତା ଉପରେ ଜମି ରହିବା ସହ ଅଳିଆ ଆବର୍ଜନା ଭାସୁଥିବା ଦେଖିବାକୁ ମିଳିଥିଲା। ଅନ୍ୟପଟେ ଡ୍ରେନ୍ ପୋତିହୋଇପଡ଼ିଥିବା ବେଳେ ଅଳିଆ ଆବର୍ଜନା ଜମିରହି ପଚି ଦୁର୍ଗନ୍ଧ ହେଉଛି। ଫଳରେ ମଶା, ମାଛିଙ୍କ ପ୍ରାଦୁର୍ଭାବ ବଢୁଛି। ସେହିପରି ସହରର ମୁଖ୍ୟ ରାସ୍ତାକୁ ବାଦ୍ ଦେଲେ ଏକାଧିକ ଗଳିକନ୍ଦିରେ ଅଳିଆ ଆବର୍ଜନା ପଡ଼ି ରହୁଛି। ପରିମଳ ନାଁରେ ଅର୍ଥ ହରିଲୁଟ ହେଉଛି ବୋଲି ସାଧାରଣରେ ଚର୍ଚ୍ଚା ହେଉଛି।
ମେଡିକାଲ ରାସ୍ତାରେ ଦୟନୀୟ ସ୍ଥିତି ରହିଛି। ତହସିଲ ଅଫିସଠାରୁ ପେଟ୍ରୋଲ ପମ୍ପକୁ ସଂଯୋଗ କରୁଥିବା ରାସ୍ତା ସାରା ପ୍ଲାଷ୍ଟିକ, ପଲିଥିନ, ଅଳିଆ ଆବର୍ଜନା ଗଦା ହୋଇ ରହିଛି। ସମାନ ଦୃଶ୍ୟ ରହିଛି ନୟାଗଡ ରୋଡ। ପୁରୁଣା ବସଷ୍ଟାଣ୍ଡଠାରୁ ଟ୍ରାଫିକ ଛକ, ଗୋଡିପୋଖରୀ ଛକ ପର୍ଯ୍ୟନ୍ତ ରାସ୍ତା ଉପରେ ଅଳିଆ ଆବର୍ଜନା ପଡ଼ି ରହିଛି। ସେହିଭଳି ନୂଆ ବସଷ୍ଟାଣ୍ଡ ରୋଡ, ବସଷ୍ଟାଣ୍ଡ ପରିସର, ପଲ୍ଲା ଛକ ସମେତ ସମସ୍ତ ସାହି ଗଳିକନ୍ଦିରେ ରହିଥିବା ଡ୍ରେନରେ ପାଣି ନିସ୍କାସନ ହୋଇ ନ ପାରି ଅଳିଆ ଆବର୍ଜନା ରାସ୍ତା ଉପରେ ଭାସୁଛି। ପ୍ରକାଶ ଯେ, ଖୋର୍ଦ୍ଧା ସହରର ଅଧିକାଂଶ ଡ୍ରେନ ପରିତ୍ୟକ୍ତ ଅବସ୍ଥାରେ ରହିଛି। ଡ୍ରେନ ପଥର ଖସି ଭୁଶୁଡିପଡିଲାଣି। ଏପରିକି ଏକାଧିକ ଡ୍ରେନରୁ ମାତି ଅତଡା ଖସି ପୋତିହୋଇଗଲାଣି। ଡ୍ରେନ ପୋତି ହୋଇପଡିଥିବା ବେଳେ ପାଣିବୋତଲ, ପ୍ଲାଷ୍ଟିକ, ପଲିଥିନ ଆଦି ଅଳିଆ ଆବର୍ଜନା ପଚି ଦୁର୍ଗନ୍ଧ ହେଉଛି। ଗୋପୀନାଥ ସାହି, ଉପରସାହି, ରାଧାବଲ୍ଲଭ ସାହି ଓ ବରୁଣେଇ ସାହି, ସାମନ୍ତରାପୁର ଛକ ଠାରୁ ଉପରସାହି, ଖ୍ରୀଷ୍ଟିଆନ ସାହି, ବାସେଳି ସାହି, ମାଛ ମାର୍କେଟ, ପୌର କାର୍ଯ୍ୟାଳୟ ପାର୍ଶ୍ୱ ଡ୍ରେନ, ଉପଜିଲାପାଳଙ୍କ ବାସଭାବନ ପାର୍ଶ୍ୱ ଡ୍ରେନ ସଫା କରାଯାଉନାହିଁ। ଏଠାରେ ଅଳିଆ, ଆବର୍ଜନ ପଡ଼ି ପୂତିଗନ୍ଧମୟ ହେଲାଣି। ଏଥିସହ ବର୍ଷା ହେଲେ ପାଣି ନିଷ୍କାସନ ହୋଇ ନ ପାରି ରାସ୍ତାରେ ଜମି ରହୁଛି। ମୌସୁମୀ ପ୍ରବେଶ କରିବା ପୂର୍ବରୁ ସମସ୍ତ ସହରାଞ୍ଚଳରେ ଡ୍ରେନ ସଫା କରିବା ସହ ମୁକୁଳା ଡ୍ରେନ ଉପରେ ସ୍ଲାବ ପକାଇବା ପାଇଁ ରାଜ୍ୟ ଗୃହ ନିର୍ମାଣ ବିଭାଗ ସମସ୍ତ ଜିଲାପାଳଙ୍କୁ ଚିଠି ଲେଖି ନିର୍ଦ୍ଦେଶ ଦେଇଥିଲେ। ତେବେ ଖୋର୍ଦ୍ଧା ପୌର ପ୍ରଶାସନ ପକ୍ଷରୁ ବର୍ଷାଦିନକୁ ଦୃଷ୍ଟିରେ ରଖି କୌଣସି ବ୍ୟବସ୍ଥା କରାଯାଇନାହିଁ। ବର୍ଷାହେଲେ ରାସ୍ତାରେ ଅଳିଆ ଆବର୍ଜନା ଭାସୁଥିବା ନଜିର ରହିଛି। ସହରର ମୁଖ୍ୟ ଡ୍ରେନକୁ ବାଦ୍ ଦେଲେ, ସହରର ଗଳିକନ୍ଦିରେ ଡ୍ରେନରୁ ମାଟି ଉଠାଯାଇନାହିଁ। ବର୍ଷାଦିନ ଆସିଲେ ପ୍ରଶାସନର ଡ୍ରେନ ସଫା କଥା ମନେ ପଡିଥାଏ। ତେବେ କେବଳ ପାଣି ଜମୁଥିବା ଅଞ୍ଚଳକୁ ବାଦ୍ ଦେଲେ ଅନ୍ୟ ଡ୍ରେନର ପୁନରୁଦ୍ଧାର କିମ୍ବା ଡ୍ରେନ ସଫେଇ ପ୍ରତି ଗୁରୁତ୍ୱ ଦିଆଯାଉନାହିଁ।
