ପଟାଙ୍ଗି,୧୩ା୪(ଡି.ଏନ୍.ଏ.): ଛତିଶଗଡ଼ ରାଜ୍ୟରୁ ଓଡ଼ିଶାର ଜୟପୁର, କୋରାପୁଟ, ସୁନାବେଡ଼ା, ଶେମିଳିଗୁଡ଼ା ଓ ପଟ୍ଟାଙ୍ଗି ଦେଇ ଯାଇଥିବା ଜାତୀୟ ରାଜପଥ ପଡ଼ୋଶୀ ଆନ୍ଧ୍ର ରାଜ୍ୟକୁ ସଂଯୋଗ କରିଥାଏ। ଉକ୍ତ ରାସ୍ତା ଦେଇ ଅନେକ କିଛି ଚୋରା ଚାଲାଣ ହେଉଥିବା ବେଳେ ମୁଖ୍ୟତଃ ଉକ୍ତ ରାସ୍ତାରେ ଗଞ୍ଜେଇ ଚୋରା ଚାଲାଣ ନିତିଦିନିଆ କହିଲେ ଅତ୍ୟୁକ୍ତି ହେବ ନାହିଁ। ଏହିପରି ସ୍ଥିତିରେ ପୁଣି ଉକ୍ତ ରାସ୍ତା ଦେଇ ଚନ୍ଦନ କାଠ ଚୋରା ଚାଲାଣ ପୋଲିସ ହାତରେ ଧରା ପଡ଼ିବା ଚର୍ଚ୍ଚାର ବିଷୟ ପାଲଟିଛି। ସୂଚନା ମୁତାବକ କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ତଥା ସୁଙ୍କି ଥାନା ଅଧିନସ୍ଥ ଦେଶାମ୍ମା ମନ୍ଦିର ନିକଟରେ ଉକ୍ତ ପୋଲିସ ବୁଧବାର ସକାଳ ୯ଟାରେ ପଟ୍ଟାଙ୍ଗିରୁ ଆନ୍ଧ୍ର ଅଭିମୁଖେ ଯାଉଥିବା ଏକ ପିକ୍ଅପ୍ ଭ୍ୟାନ୍ ନଂ ଏପି ୩୯ ୟୁକେ ୬୪୨୭ ଦ୍ରୁତ ଗତିରେ ଯାଉଥିବା ଦେଖି ପୋଲିସ ଅଟକାଇଥିଲା। ଯାଞ୍ଚ ସମୟରେ ଏଥିରେ ବହୁ ପରିମାଣର ଚନ୍ଦନ କାଠ ଦେଖିବାକୁ ପାଇ ଡ୍ରାଇଭରଙ୍କୁ ଅଟକ ରଖି ପଚରାଉଚରା କରିଥିଲା। ଭ୍ୟାନ୍ଟି ପାଡୁଆ ଅଞ୍ଚଳର ହୋଇଥିବା ସହ ନିଜ ଘର ଚମ୍ପାପୁଟ ବୋଲି ପୋଲିସକୁ ଡ୍ରାଇଭର କହିଥିଲେ।
ଅନ୍ୟପକ୍ଷରେ ଉକ୍ତ ଘଟଣାକୁ ନେଇ ୨୪ ଘଣ୍ଟା ପରେ ସୁଙ୍କି ପୋଲିସ ନିଜ ଅଞ୍ଚଳରେ ବା ଥାନାରେ ଖବରଦାତା ସମ୍ମିଳନୀ ନ କରି ୪୮ କିଲୋମିଟର ଦୂର ସୁନାବେଡ଼ା ଏସ୍ଡିପିଓ ଅଫିସରେ ଗୁରୁବାର ଅପରାହ୍ନରେ ଖବରଦାତା ସମ୍ମିଳନୀ ଆୟୋଜନ କରି ସମସ୍ତ ସୂଚନା ପ୍ରଦାନ କରିବା ନେଇ ପ୍ରଶ୍ନ ଉଠୁଛି। ପଟ୍ଟାଙ୍ଗି ଅଞ୍ଚଳର ଗଣମାଧ୍ୟମକୁ ଅଣଦେଖା କରି ସୁନାବେଡ଼ାରେ ଖବରଦାତା ସମ୍ମିଳନୀ କାର୍ଯ୍ୟକ୍ରମ ଆୟୋଜନକୁ ବିଭିନ୍ନ ମହଲରେ ଦୃଢ଼ ନିନ୍ଦା କରାଯାଇଛି।
