କେନ୍ଦୁଝର, ୯।୨ (ସ୍ବ.ପ୍ର.) କେନ୍ଦୁଝର ଜିଲାର ବିଭିନ୍ନ ନଦୀନାଳରୁ ବିନା ଲିଜ୍ରେ ବାଲି ଚୋରି ବଢ଼ି ଚାଲିଛି। ଫଳରେ ସରକାରଙ୍କ କୋଟି କୋଟି ଟଙ୍କାର ରାଜସ୍ବ, ପରିବେଶ କ୍ଷତି ହେଉଥିଲେ ହେଁ ରୋକିବା ଲାଗି କାହାରି ଆନ୍ତରିକତା ନାହିଁ। ପଞ୍ଚାୟତ ନିର୍ବାଚନ ପାଇଁ ସମସ୍ତେ ବ୍ୟସ୍ତ ଥିବାବେଳେ ଏହାର ସୁଯୋଗ ନେଇ ମାଫିଆମାନେ ବାଲି ଉତ୍ତୋଳନ କରି ନଦୀ ନିକଟ ତଥା ବିଭିନ୍ନ ସ୍ଥାନରେ ଗଚ୍ଛିତ ରଖି ଚୋରା ଚାଲାଣ କରୁଥିବା ଅଭିଯୋଗ ହେଉଛି। ପାଟଣା ତହସିଲ ଅନ୍ତର୍ଗତ କିଆପଡ଼ା ଓ ଅନ୍ୟାନ୍ୟ ଅଞ୍ଚଳରୁ ବୈତରଣୀ ନଦୀରୁ ବାଲି ଚୋରି ନେଇ ଅଭିଯୋଗ ହେଉଛି। ମାଫିଆମାନେ ବିଭିନ୍ନ ଉପାୟରେ ଏହି ଚୋରା କାରବାର ଜାରି ରଖିଥିବା ବେଳେ ରାଜସ୍ବ ଓ ପୋଲିସ ବିଭାଗର କେତେକ ଦୁର୍ନୀତିଗ୍ରସ୍ତ କର୍ମଚାରୀଙ୍କ ପ୍ରୋତ୍ସାହନରେ ଏସବୁ ଚାଲିଥିବାରୁ ଧରପଗଡ଼ ହେଉ ନ ଥିବା ସ୍ଥାନୀୟ ଲୋକେ କହିଛନ୍ତି। ଏହି ତହସିଲ ଅନ୍ତର୍ଗତ ବୈତରଣୀ ନଦୀରୁ ବେଆଇନ ବାଲି ଉତ୍ତୋଳନ ଓ ଚାଲାଣ ନେଇ ପ୍ରଶାସନ ନିକଟରେ ଅଭିଯୋଗ ପରେ କାର୍ଯ୍ୟାନୁଷ୍ଠନ ଗ୍ରହଣ କରାଯାଉ ନ ଥିବାରୁ ଅସନ୍ତୋଷ ବଢୁଛି। ସରକାରଙ୍କ ଲକ୍ଷ ଲକ୍ଷ ଟଙ୍କାର ରାଜସ୍ବ କ୍ଷତି ହେଉଥିବା ବେଳେ ନଦୀ ମଧ୍ୟ ଅସୁରକ୍ଷିତ ହୋଇପଡୁଛି। ସେହିପରି ବହୁ ସଂଖ୍ୟାରେ ଭାରିଯାନ ଚଳାଚଳ ଯୋଗୁ ରାସ୍ତାଘାଟ କ୍ଷତିଗ୍ରସ୍ତ ହେବା ସହ ପ୍ରଦୂଷଣ ବଢୁଛି।
ଟ୍ରିପ୍ର ବାଲି ନଦୀ କୂଳରେ ଏବଂ ଆଖପାଖ ଗ୍ରାମରେ ଗଚ୍ଛିତ ରଖାଯାଇଥିବାରୁ ଚଢ଼ାଉ କରି ମାଫିଆମାନଙ୍କୁ ଧରିବା ପାଇଁ ଦାବି ହେଉଛି। ବଡ଼ ବଡ଼ ଟ୍ରକ୍ରେ ବାଲି ପରିବହନ ବେଳେ ଧୂଳି ଉଡ଼ି ପ୍ରଦୂଷଣ ସୃଷ୍ଟି ହେବା ସହ ଟ୍ରାଫିକ ସମସ୍ୟା ଦୁର୍ଘଟଣାର କାରଣ ହେଉଛି। ଏନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ପୋଲିସ ଧରପଗଡ଼ କରୁ ନ ଥିବାରୁ ଅସନ୍ତୋଷ ପ୍ରକାଶ ପାଇଛି। ଏହାଦ୍ୱାରା ସରକାରଙ୍କ ରାଜସ୍ବ ହାନି ଘଟିବା ସହ ପରିବେଶ କ୍ଷତିଗ୍ରସ୍ତ, ନଦୀ ଓ ଏହା ଆଖପାଖ ଗ୍ରାମ ପ୍ରତି ବିପଦ ଆଶଙ୍କା ରହୁଛି। ପ୍ରଶାସନ ତୁରନ୍ତ ଏ ଦିଗରେ ପଦକ୍ଷେପ ନେବାକୁ ଦାବି ହେଉଛି। ଏ ସମ୍ପର୍କରେ ଜିଲାପାଳ ଆଶିଷ ଠାକରେଙ୍କୁ ପଚାରିବାରୁ ଖୁବ୍ଶୀଘ୍ର ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।
