୨ଲକ୍ଷ ଟଙ୍କାରେ ଶିଶୁ ବିକ୍ରି: ଶିଶୁର ବାପା, ମଧ୍ୟସ୍ଥଙ୍କ ସମେତ ୩ଗିରଫ
10:39 amAugust 6, 2023August 6, 2023 / 08

ଟିଟିଲାଗଡ, ୬ା୮(ଶରତ ମିଶ୍ର)ଟିଟିଲାଗଡ ସହରର ଜନୈକ ଦମ୍ପତି ନିଜ ଚତୁର୍ଥ ପୁତ୍ର ସନ୍ତାନକୁ ବିକି କରି ଦେଇଥିବା ଜଣାପଡିବା ନେଇ ଆଲୋଚନାର ବିଷୟ ହୋଇଛି। ଖବର ପାଇବା ପରେ ଟିଟିଲାଗଡ଼ ଥାନା ପୋଲିସ ଏକ ମାମଲା(୨୨୪/୨୩) ରୁଜୁ କରି ତନାଘନା ଚଳାଇଛି। ଏହି ଘଟଣାରେ ପୋଲିସ ୨ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ଶିଶୁର ପିତା ସନ୍ତୋଷ ପୁଟେଲ(୩୨) ଓ ମଧ୍ୟସ୍ଥ ଶେଖ ରମଜାନ ଖାନ(୩୧) ଓ ଶିଶୁକ୍ରୟ କରିଥିବା ବ୍ୟକ୍ତିଙ୍କ ସମ୍ପର୍କୀୟ ରାଜା ଦୁର୍ଗା(୩୫)। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ଟିଟିଲାଗଡ ସବ୍‌ଜେଲ ହାଜତକୁ ପଠାଇ ଦିଆଯାଇଥିବା ଟିଟିଲାଗଡ଼ ଥାନା ଆଇଆଇସି ମନୋଜ ପଧାନ କହିଛନ୍ତି। ସୂଚନା ଅନୁଯାୟୀ ଟିଟିଲାଗଡ ଝାଙ୍କରପଡ଼ା ନିବାସୀ ସନ୍ତୋଷ ପୁଟେଲ ଓ ପୁଷ୍ପା ପୁଟେଲ ଏକ ହୋଟେଲରେ କାମ କରି ଗୁଜୁରାଣ ମେଣ୍ଟାନ୍ତି। ପୁଷ୍ପାଙ୍କ ପୂର୍ବରୁ ୩ଟି ସନ୍ତାନ ଥିବାବେଳେ ମାସକ ତଳେ ତାଙ୍କର ସ୍ଥାନୀୟ ଡାକ୍ତରଖାନାରେ ପୁଣି ଏକ ଶିଶୁପୁତ୍ର ଜନ୍ମ ହୋଇଥିଲା। ଚାରିପିଲାଙ୍କ ଲାଳନ ପାଳନ କରିବାରେ ସମସ୍ୟାର ସମ୍ମୁଖୀନ ହେଉଥିବା ପୁଟେଲ ଦମ୍ପତି ଲୋଭନୀୟ ପ୍ରସ୍ତାବ ପାଇ ନବଜାତ ଶିଶୁକୁ ମଧ୍ୟସ୍ଥଙ୍କ ସହାୟତାରେ ଭବାନୀପାଟଣାର ବିକ୍ରମ ମହାନନ୍ଦଙ୍କୁ ୨ଲକ୍ଷ ୨୦ ହଜାର ଟଙ୍କାରେ ବିକ୍ରି କରିଦେଇଥିଲେ। ଏଥିରେ ମଧ୍ୟସ୍ଥି ସାଜିଥିଲେ ସନ୍ତୋଷଙ୍କ ପଡୋଶୀ ଶେଖ ରମଜାନ। ତାଙ୍କୁ ୨୦ହଜାର ଟଙ୍କା ଦେଇଥିଲେ ସନ୍ତୋଷ। ଘଟଣା ନେଇ ପୋଲିସ ଅବଗତ ହେବା ପରେ ଏକ ମାମଲା ରୁଜୁ କରି ସନ୍ତୋଷ ଏବଂ ରମଜାନଙ୍କୁ ପଚରାଉଚୁରା କରି ଭବାନୀପାଟଣା, ରାୟପୁର ଆଦି ଅଞ୍ଚଳ ଯାଇ ଶିଶୁକୁ ଖୋଜାଖୋଜି କରିଥିଲେ। ତେବେ ଶିଶୁକୁ କିଣିଥିବା ବିକ୍ରମ ମୋବାଇଲ ସୁଇଚ ଅଫ କରି ଫେରାର ହୋଇ ଯାଇଥିବାରୁ ଅଦ୍ୟାବଧି ଶିଶୁ ଉଦ୍ଧାର ହୋଇନାହିଁ। ତେବେ ଅର୍ଥଲୋଭରେ କିଭଳି ଜଣେ ମା’ ସ୍ନେହ ମମତା ଭୁଲି ନିଜ ଜନ୍ମିତ ଶିଶୁକୁ ବିକ୍ରି କରି ଦେଇପାରେ ତାହାକୁ ନେଇ ଆଲୋଡନ ସୃଷ୍ଟି କରିଛି। ସୂଚନାଯୋଗ୍ୟ ଯେ, ଟିଟିଲାଗଡ଼ ସହର ପଦ୍ମନାଭପୁରର ଜଣେ ମହିଳା ନିଜ ଅଢ଼େଇ ବର୍ଷର ଶିଶୁପୁତ୍ରକୁ ବିକ୍ରି କରିଦେଇଥିବା ଅଭିଯୋଗ ହୋଇଥିଲା।