ନୂଆଦିଲ୍ଲୀ,୯।୩: ବିବାହ ପରେ ସାଧାରଣ ମହିଳାଙ୍କ ଭଳି କ୍ରିଡାବିତ୍ଙ୍କ ପତ୍ନୀଙ୍କ ଜୀବନରେ ଅନେକ ପରିବର୍ତ୍ତନ ଆସିଥାଏ। ଏହି ପ୍ରସଙ୍ଗ ଉପରେ ଏବେ ମନ୍ତବ୍ୟ ରଖିଛନ୍ତି ଭାରତର ପୂର୍ବ କ୍ରିକେଟର ତଥା ଚେନ୍ନାଇ ସୁପର କିଙ୍ଗ୍ସର ଅଧିନାୟକ ମହେନ୍ଦ୍ର ସିଂହ ଧୋନୀଙ୍କ ପତ୍ନୀ ସାକ୍ଷୀ। ସିଏସ୍କେର ଅନ୍ୟ ଖେଳାଳିମାନଙ୍କ ସ୍ତ୍ରୀମାନଙ୍କ ସହ ବାର୍ତ୍ତାଳାପରେ ସାକ୍ଷୀ ନିଜ ମନକଥା କହିଛନ୍ତି। ଏହାର ଭିଡିଓକୁ ଫ୍ରାଞ୍ଚାଇଜ୍ର ନୂଆ ୟୁଟ୍ୟୁବ୍ ଚ୍ୟାନେଲରେ ଶେୟାର କରାଯାଇଛି।
୧୭ ମିନିଟର ଏହି ଭିଡିଓକୁ ଅନ୍ତର୍ଜାତୀୟ ମହିଳା ଦିବସ ଅବସରରେ ପ୍ରସ୍ତୁତ କରାଯାଇଛି। ଏଥିରେ ସାକ୍ଷୀ କହିଛନ୍ତି, ବିବାହ ପରେ ସମସ୍ତ ମହିଳାଙ୍କ ଜୀବନ ବଦଳିଯାଇଥାଏ। ସମସ୍ତଙ୍କ ସ୍ବାମୀ ଅଫିସ ଯାଆନ୍ତି, ହେଲେ ଆମମାନଙ୍କ ସ୍ବାମୀ କ୍ରିକେଟ ଖେଳିବାକୁ ଯାଇଥାନ୍ତି। ଆମକୁ ତାଙ୍କୁ ନେଇ ବଦଳିବାକୁ ପଡ଼ିଥାଏ। ଆମକୁ ନେଇ ତାଙ୍କ ଉପରେ ଯେଭଳି କୌଣସି ଚାପ ନ ପଡେ ତାହା ଦେଖିବାକୁ ପଡ଼ିଥାଏ। କହିବାକୁ ଗଲେ କ୍ରିକେଟରଙ୍କୁ ବିବାହ କରିବା ପରେ ନିଜସ୍ବ ଜୀବନ ଶେଷ ହୋଇଯାଇଥାଏ। ଜଣଙ୍କ ପାଖରେ ବ୍ୟକ୍ତିଗତ ସ୍ଥାନ କିଛି ନଥାଏ। କାରଣ ଚାରିଆଡେ ତୁମ ଉପରେ କ୍ୟାମେରା ଥାଏ। ଫଳରେ ସାଧାରଣ ଭାବେ ଜୀବନଯାପନ କରିବା ଅସମ୍ଭବ। ତୁମେ ଯାହା ବି କର, ସେଥିରେ ଲୋକମାନଙ୍କ ନଜର ରହିଥାଏ। କିଛି ଏପଟସେପଟ ହେଲେ ତୁମ ବିଷୟରେ କଥା ଆରମ୍ଭ ହୋଇଯାଏ। ଏପରିକି ଲୋକେ ଅନେକେ ପ୍ରଶ୍ନ ଉଠାନ୍ତି ବୋଲି ସାକ୍ଷୀ କହିଛନ୍ତି।
କହିରଖୁଛୁ, ଧୋନୀ-ସାକ୍ଷୀଙ୍କ ବିବାହ ୨୦୧୦ ଜୁଲାଇ ୪ରେ ହୋଇଥିଲା। ଉଭୟଙ୍କ ଜଣେ ଝିଅ ଜିଭା ଅଛନ୍ତି।
