ନୂଆଦିଲ୍ଲୀ,୨୫।୧୨: ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଭାରତୀୟ ଦଳର ନେତୃତ୍ୱ ନେବେ ଅଜିଙ୍କ୍ୟ ରାହାଣେ। ତାଙ୍କୁ ନେଇ ମହାନ ବ୍ୟାଟ୍ସମ୍ୟାନ୍ ସଚିନ ତେନ୍ଦୁଲକର କହିଛନ୍ତି, ରାହାଣେ ଶାନ୍ତ ସ୍ବଭାବର। ପୂର୍ବରୁ ସେ ଭାରତର ଅଧିନାୟକ ଦାୟିତ୍ୱ ତୁଲାଇଛନ୍ତିି। ତାଙ୍କର ଶାନ୍ତ ରହିବା ଅର୍ଥ ସେ ଆକ୍ରମକ ନୁହନ୍ତି ବୋଲି ଭାବିବା ଭୁଲ। ଏହା ଦେଖାଇବାର ସମସ୍ତଙ୍କର ଭିନ୍ନ ଭିନ୍ନ ଉପାୟ ରହିଛି। କିଏ ଦେଖାଏ, କିଏ ଦେଖାଏନାହିଁ। ହେଲେ ରାହାଣେ ଆବଶ୍ୟକ ସମୟରେ ବିରାଟ କୋହଲିଙ୍କ ଭଳି ସେ ଆକ୍ରମକ ହୋଇଥାନ୍ତି। ଉଭୟଙ୍କ ରଣନୀତି ଭିନ୍ନ ହୋଇଥାଇପାରେ। ହେଲେ ଟିମ୍ର ଗୋଟିଏ ଲକ୍ଷ, ସେ ବି ଜିତିବା ବୋଲି ସଚିନ କହିଛନ୍ତି।
ପ୍ରକାଶ ଯେ, ଅଧିନାୟକ ଭାବେ ରାହାଣେଙ୍କ ଶତପ୍ରତିଶତ ରେକର୍ଡ ରହିିଛି। ଏଯାବତ ସେ ଦୁଇଟି ଟେଷ୍ଟରେ ଅଧିନାୟକ ସାଜିଥିବା ବେଳେ ଉଭୟ ମ୍ୟାଚ୍ରେ ଭାରତ ଜିତିଥିଲା। ୨୦୧୭ରେ ଅଷ୍ଟ୍ରେଲିଆ ବିପକ୍ଷରେ ଏହା ଖେଳାଯାଇଥିଲା। ଏବେ ବିରାଟ ପ୍ରଥମ ସନ୍ତାନକୁ ନେଇ ସ୍ବଦେଶ ଫେରି ଆସିଥିବା ଯୋଗୁ ରାହାଣେ ଦଳର ନେତୃତ୍ୱ ନେବେ। ଅପରପକ୍ଷେ ପ୍ରଥମ ଟେଷ୍ଟରେ ଦଳର ଶୋଚନୀୟ ପରାଜୟକୁ ନେଇ ଟିମ୍ ଦୃଢ଼ ମନୋବଳ ସହ ପଡ଼ିଆକୁ ଓହ୍ଲାଇବ ବୋଲି ପ୍ରଶଂସକ ଆଶା ରଖିଛନ୍ତି।
