ଜୟପୁର,୪ ।୧୧: ରାଜସ୍ଥାନ ରାଜନୀତିରେ ବୟାନବାଜି ମଧ୍ୟରେ ରାଜ୍ୟର ପୂର୍ବତନ ଉପମୁଖ୍ୟମନ୍ତ୍ରୀ ସଚ୍ଚିନ ପାଇଲଟ ମୁଖ୍ୟମନ୍ତ୍ରୀ ଅଶୋକ ଗେହେଲଟଙ୍କୁ ଏକ ଚିଠି ଲେଖିଛନ୍ତି । ଏଥିରେ ସେ ଲୋକ ଦେବତା ବୀର ତେଜାଜୀ ମହାରାଜଙ୍କ ନାମରେ ରାଜ୍ୟ ସରକାର ବୋର୍ଡ ଗଠନ କରିବାକୁ ଦାବି କରିଛନ୍ତି ।
ପାଇଲଟ ମୁଖ୍ୟମନ୍ତ୍ରୀଙ୍କୁ ପଠାଇଥିବା ପତ୍ରରେ ଲେଖିଛନ୍ତି ରାଜ୍ୟରେ ବେଶ କିଛିଦିନ ହେବ ବୀର ତେଜାଜୀ ମହାରାଜଙ୍କ ନାମରେ ବୋର୍ଡ ଗଠନ କରିବାକୁ ଦାବି ହୋଇଆସୁଛି । ରାଜସ୍ଥାନ ସମେତ ଦେଶର ଅନେକ ରାଜ୍ୟରେ ବୀର ତେଜାଜୀ ମହାରାଜଙ୍କୁ ଲୋକେ ଦେବତା ରୂପରେ ପୂଜା କରି ଆସୁଛନ୍ତି ଓ କୋଟି କୋଟି ସଂଖ୍ୟାରେ ବୀର ତେଜାଜୀ ମହାରାଜଙ୍କ ଅନୁଗାମୀ ରହିଛନ୍ତି ।
ସଚ୍ଚିନ ପାଇଲଟ ଦାବି କରିଛନ୍ତି, ଏହି ବୋର୍ଡର ଗଠନ ପରେ କୃଷକ ବର୍ଗ ସମେତ ଅନେକ ବର୍ଗଙ୍କୁ ସମ୍ବଳ ମିଳିବ ଓ ସେମାନଙ୍କ ପାଇଁ ନୂଆ ଯୋଜନା ପ୍ରସ୍ତୁତ ହୋଇପାରିବ । ପୂର୍ବତନ ଡେପୁଟି ସିଏମ ପାଇଲଟ ମୁଖ୍ୟମନ୍ତ୍ରୀଙ୍କ ନିକଟରେ ଦାବି କରିଛନ୍ତି ଯେ ରାଜ୍ୟବାସୀଙ୍କ ଭାବନାକୁ ନଜରରେ ରଖି ରାଜ୍ୟ ସରକାରଙ୍କ ଦ୍ୱାରା ଶୀଘ୍ର ବୀର ତେଜାଜୀ ମହାରାଜଙ୍କ ନାମରେ ବୋର୍ଡ ଗଠନ କରାଯାଉ ।
ସୂଚନାଯୋଗ୍ୟ, କିଛିଦିନ ହେବ ଅଶୋକ ଗେହେଲଟ ଓ ସଚ୍ଚିନ ପାଇଲଟଙ୍କ ମଧ୍ୟରେ ବୟାନବାଜି ଦେଖିବାକୁ ମିଳିଥିଲା ।
