ନୂଆଦିଲ୍ଲୀ, ୬ା୪ (ପି.ଟି.)- ଅଜିତ ସିଂଙ୍କ ସ୍ଥାନରେ ଗୁଜରାଟର ପୂର୍ବତନ ପୋଲିସ ମହାନିର୍ଦ୍ଦେଶକ ସବିର ହୁସେନ ଶେଖଦମ୍ ଖଣ୍ଡଓ୍ବାଲା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଦୁର୍ନୀତି ନିବାରଣ ୟୁନିଟ୍ (ଏସିୟୁ)ର ନୂତନ ମୁଖ୍ୟଭାବେ ଦାୟିତ୍ୱ ଗ୍ରହଣ କରିଛନ୍ତି। ରାଜସ୍ଥାନର ପୂର୍ବତନ ପୋଲିସ ମହାନିର୍ଦ୍ଦେଶକ ସିଂ ୨୦୧୮ରେ ବିସିସିଆଇର ଏସିୟୁ ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିଥିଲେ। ତାଙ୍କ କାର୍ଯ୍ୟକାଳ ଗତ ମାର୍ଚ୍ଚ ୩୧ରେ ଶେଷ ହୋଇଛି। ଅନ୍ୟପକ୍ଷରେ ଖଣ୍ଡଓ୍ବାଲା ହେଉଛନ୍ତି ୧୯୭୩ ବ୍ୟାଚ୍ ଆଇପିଏସ୍ ଅଫିସର। ୨୦୧୦ ଡିସେମ୍ବରରେ ଗୁଜରାଟ ଡିଜିପି ପଦବୀରୁ ଅବସର ପରେ ୧୦ ବର୍ଷ ଧରି ଏସାର ଗ୍ରୁପ୍ର ଜଣେ ଉପଦେଷ୍ଟା ଭାବେ କାର୍ଯ୍ୟ ସମ୍ପାଦନ କରିଆସୁଥିଲେ। ଏପ୍ରିଲ ୯ରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଉଦ୍ଘାଟନୀ ଦିବସରୁ ସେ ତାଙ୍କ କାର୍ଯ୍ୟାରମ୍ଭ କରିବେ। ବୋର୍ଡରେ କିପରି କାର୍ଯ୍ୟ କରିବାକୁ ହେବ ସେ ବିଷୟରେ ସମ୍ୟକ ଜ୍ଞାନ ଆହରଣ କରିବା ଲାଗି ନୂଆ ଏସିୟୁ ମୁଖ୍ୟ ଗତ ମାସରେ ଇଂଲଣ୍ଡ ଓ ଭାରତ ମଧ୍ୟରେ ଅନୁଷ୍ଠିତ ଅନ୍ତିମ ଅନ୍ତର୍ଜାତୀୟ ଦିନିକିଆ ମ୍ୟାଚ ଦେଖିଥିଲେ। ଅନ୍ୟପକ୍ଷରେ ସିଂଙ୍କ କାର୍ଯ୍ୟକାଳ ଶେଷ ହୋଇଥିଲେ ମଧ୍ୟ ଖଣ୍ଡଓ୍ବାଲା ତାଙ୍କ କାର୍ଯ୍ୟଧାରାରେ ପଡ଼ିବା ପର୍ଯ୍ୟନ୍ତ ତାଙ୍କୁ ସମସ୍ତ ପ୍ରକାର ସହାୟତା କରିବେ। ଏଥର ଏସିୟୁ ମୁଖ୍ୟ ପଦବୀ ପାଇଁ ବିସିସିଆଇ ପକ୍ଷରୁ ଦରଖାସ୍ତ ଆହ୍ବାନ କରାଯାଇ ନ ଥିଲା। ଖଣ୍ଡଓ୍ବାଲା ବୁଧବାର ଆଇପିଏଲ୍ ଉଦ୍ଘାଟନୀ ମ୍ୟାଚ ପାଇଁ ଚେନ୍ନାଇ ଅଭିମୁଖେ ଯାତ୍ରା କରିବେ।
