କ୍ୱିଭ୍/ମସ୍କୋ, ୨୫।୯ : ରୁଷିଆ ୟୁକ୍ରେନ ମଧ୍ୟରେ ଯୁଦ୍ଧ ଥମିବାର ନା ଧରୁନି। ଏହି ଯୁଦ୍ଧରେ ଏପର୍ଯ୍ୟନ୍ତ ହଜାର ହଜାର ଲୋକଙ୍କ ମୃତ୍ୟୁ ଘଟିଛି। ଲକ୍ଷ ଲକ୍ଷ ଲୋକ ଦେଶ ଛାଡି ଅନ୍ୟ ଦେଶରେ ଶରଣାର୍ଥୀ ହୋଇଛନ୍ତି। କିନ୍ତୁ ଏସବୁ ମଧ୍ୟରେ ରୁଷିଆର ସୈନିକମାନଙ୍କ ଅତ୍ୟାଚାର ବିଷୟରେ ମିଳିତ ଜାତିସଂଘ ଦଳ ଦ୍ୱାରା ଉପସ୍ଥାପିତ ହୋଇଥିବା ରିପୋର୍ଟ ହୃଦୟ ବିଦାରକ ସ୍ଥିତି ସୃଷ୍ଟି କରୁଛି। କୁହାଯାଉଛି ଯେ ଯୁଦ୍ଧ ସମୟରେ ରୁଷିଆର ସୈନ୍ୟମାନେ ଅତ୍ୟାଚାରର ସମସ୍ତ ସୀମାକୁ ଅତିକ୍ରମ କରିଛନ୍ତି। ମିଳିତ ଜାତିସଂଘ ରୁଷିଆକୁ ଯୁଦ୍ଧ ଅପରାଧୀ ଘୋଷଣା କରିଛି। କେବଳ ଏତିକି ନୁହେଁ ଅନେକ ପାଶ୍ଚାତ୍ୟ ଦେଶ ମଧ୍ୟ ଅର୍ଥନୈତିକ ପ୍ରତିବନ୍ଧକ ଲଗାଇଛନ୍ତି।
ଚଳିତ ବର୍ଷ ମାର୍ଚ୍ଚରେ ୟୁକ୍ରେନରେ ରୁଷିଆର ସୈନ୍ୟଙ୍କ ଦ୍ୱାରା ମାନବିକ ଅଧିକାରର ଉଲ୍ଲଂଘନ ଘଟଣାର ଅନୁସନ୍ଧାନ କରିଥିବା ମିଳିତ ଜାତିସଂଘ ଦ୍ୱାରା ଗଠିତ ଏକ ଟିମ ବର୍ତ୍ତମାନ ଏହାର ରିପୋର୍ଟ ଦାଖଲ କରିଛି। ଏହି ରିପୋର୍ଟରେ କୁହାଯାଇଛି ଯେ ରୁଷିଆର ସୈନ୍ୟମାନେ ଚାରି ବର୍ଷ ବୟସ ଛୋଟ ବାଳିକାଙ୍କଠାରୁ ଆରମ୍ଭ କରି ୮୨ ବର୍ଷ ବୟସ୍କା ବୃଦ୍ଧାଙ୍କୁ ମଧ୍ୟ ଯୌନ ନିର୍ଯାତନା ଦେଇଛନ୍ତି। କେବଳ ଏତିକି ନୁହେଁ, ସୈନିକମାନେ ସାଧାରଣ ନାଗରିକଙ୍କୁ ବନ୍ଦୀ କରି ଥାର୍ଡ ଡିଗ୍ରୀ ଅତ୍ୟାଚାର କରିଥିବାର ଅଭିଯୋଗ ହୋଇଛି। କେତେକ ବନ୍ଦୀଙ୍କୁ ମାଡ ଦିଆଯାଉଥିଲା, ବିଦ୍ୟୁତ ଶକ ଦିଆଯାଇଥିଲା ଏବଂ ପୋଷାକ କାଢ଼ି ଚାବୁକ୍ରେ ପିଟା ଯାଇଥିଲା।
ରୁଷିଆ ସୈନ୍ୟ ଛୋଟ ପିଲାମାନଙ୍କୁ ମଧ୍ୟ ଦୟା ଦେଖାଇ ନାହାଁନ୍ତି। ରିପୋର୍ଟରେ କୁହାଯାଇଛି ଯେ ସେମାନେ ମଧ୍ୟ ଚାରି ବର୍ଷର ବାଳିକାଙ୍କୁ ବଳାତ୍କାର ଓ ନିର୍ଯାତନା ଦେଇଥିଲେ। ସମସ୍ତ ଝିଅଙ୍କୁ ବେଆଇନ ଭାବେ କାରାଗାରରେ ରଖାଯାଇଥିଲା। ଖାର୍କିଭ ଆଞ୍ଚଳିକ ରାଜ୍ୟପାଳ କହିଛନ୍ତି ଯେ ଇଜିୟମ ସାମୁହିକ କବରସ୍ତାନରେ ୪୩୬ ମୃତଦେହ ଉଦ୍ଧାର କରାଯାଇଛି। ସେଥିମଧ୍ୟରୁ ୩୦ରୁ ଅଧିକ ମୃତଦେହରେ ନିର୍ଯାତନାର ଚିହ୍ନ ରହିଛି। ସମସ୍ତଙ୍କ ଉପରେ ଅତ୍ୟାଚାରର ସୀମା ଟପିଥିବା ଜଣାପଡ଼ିଛି।
