କ୍ୱିଭ,୨୮ ।୨: ରୁଷିଆ ବିଶ୍ୱର ସବୁଠାରୁ ବଡ ମାଲବାହୀ ବିମାନ ୟୁକ୍ରେନର ଧ୍ୱଜାବାହକ ବା ଫ୍ଲଗ କ୍ୟାରିୟର ବିମାନ ଏଏନ-୨୨୫ ମରିୟାକୁ ନଷ୍ଟ କରି ଦେଇଛି । ଏହି ସୂଚନା ୟୁକ୍ରେନର ରାଜ୍ୟ ପ୍ରତିରକ୍ଷା ଗୋଷ୍ଠୀ ଉକ୍ରୋକେରେନପ୍ରୋମ ଦ୍ୱାରା ଦିଆଯାଇଛି । ଉକ୍ରୋକେରେନପ୍ରୋମ କହିଛି କ୍ୱିଭ ବାହାରେ ହୋଷ୍ଟୋମେଲ ବିମାନ ବନ୍ଦରରେ ରୁଷିଆର ସେନା ଏହି ବିମାନକୁ ନଷ୍ଟ କରି ଦେଇଛନ୍ତି । ସୂଚନା ମୁତାବକ ଯଦି ବିମାନଟିକୁ ମରାମତି କରାଯାଏ ତେବେ ସେଥିରେ ୩ ଅରବ ଡଲାରରୁ ଅଧିକ ଅର୍ଥ ଖର୍ଚ୍ଚ ହେବା ସହ ଏହା ବହୁ ସମୟ ଲାଗିବ । ସମାଚାର ଏଜେନ୍ସି ସିହ୍ନୁଆର ସୂଚନା ଅନୁଯାୟୀ ୧୯୮୦ ଦଶକରେ ଡିଜାଇନ କରାଯାଇଥିବା ଏଏନ୍ -୨୨୫ ମରିୟା ଏବେ ପର୍ଯ୍ୟନ୍ତ ଥିବା ସବୁଠାରୁ ଲମ୍ବା ଓ ସବୁଠାରୁ ଓଜନିଆ ବିମାନ । ଏହା ୬୪୦ ଟନ କାର୍ଗୋ ନେଇଯିବାର କ୍ଷମତା ରଖେ ।
ୟୁକ୍ରେନର ବୈଦେଶିକ ମନ୍ତ୍ରୀ ଦିମିତ୍ରୋ କୁଲେବା ମାରିୟା ନଷ୍ଟ ଘଟଣାକୁ ନେଇ ନିଜର ଭାବନା ସୋସିଆଲ ମିଡିଆରେ ବ୍ୟକ୍ତ କରିଛନ୍ତି । ସେ ଟୁଇଟ କରି କହିଛନ୍ତି, ଏହା ବିଶ୍ୱର ସବୁଠାରୁ ବଡ ବିମାନ ଥିଲା ଏଏନ୍-୨୨୫ ‘ମରିୟା’ । ୟୁକ୍ରେନ୍ ଭାଷାରେ ଏହାର ଅର୍ଥ ହେଉଛି ସ୍ୱପ୍ନ । ରୁଷିଆ ଯଦିଓ ଆମ ‘ମରିୟା’କୁ ନଷ୍ଟ କରି ଦେଇଛି ହେଲେ ସେ କେବେବି ଏକ ମଜଭୁତ, ସ୍ୱତନ୍ତ୍ର ଓ ଲୋକତାନ୍ତ୍ରିକ ୟୁରୋପୀୟ ରାଜ୍ୟର ସ୍ୱପ୍ନକୁ ନଷ୍ଟ କରିପାରିବ ନାହିଁ । ଆମେ ଆହୁରି ଦୃଢ ହେବୁ । ବିମାନ ନଷ୍ଟ ହୋଇଥିବାରୁ ୟୁକ୍ରେନ୍ ଦୁଃଖ ପ୍ରକାଶ କରି ଏହାର ଅଫିସିଆଲ ଟୁଇଟର ହ୍ୟାଣ୍ଡେଲରେ ଟୁଇଟ୍ କରିଛି, ‘ବିଶ୍ୱର ସବୁଠାରୁ ବଡ ବିମାନ ମରିୟା(ଦ ଡ୍ରିମ୍)କ୍ୱିଭ ନିକଟରେ ଏକ ବିମାନ ବନ୍ଦରରେ ରୁଷିଆ ସେନା ଦ୍ୱାରା ନଷ୍ଟ କରାଯାଇଛି । ଆମେ ବିମାନର ମରାମତି କରିବୁ, ଆମେ ଏକ ମଜଭୁତ, ସ୍ୱତନ୍ତ୍ର ଓ ଲୋକତାନ୍ତ୍ରିକ ୟୁକ୍ରେନ୍ର ସ୍ୱପ୍ନକୁ ପୁରଣ କରିବୁ ।