ମସ୍କୋ,୪।୧ : ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ହେବାର ୧୦ ମାସରୁ ଅଧିକ ସମୟ ବିତିଗଲାଣି। ଏହି ସମୟରେ, ଅନେକ ରିପୋର୍ଟରେ ଦାବି କରାଯାଇଛି ଯେ ରୁଷିଆର ସେନା ୟୁକ୍ରେନର ବିଭିନ୍ନ ଅଞ୍ଚଳରେ ସାଧାରଣ ନାଗରିକଙ୍କ ପ୍ରତି ଅତ୍ୟାଚାର ପ୍ରଦର୍ଶନ କରିଛି। ଏଥିମଧ୍ୟରୁ ବୁଚା ଠାରୁ ମାରିଆପୋଲ ପର୍ଯ୍ୟନ୍ତ ଭୟଙ୍କର ରକେଟ ଆକ୍ରମଣ ଏବଂ ସେଥିରେ ପ୍ରାଣ ହରାଇଥିବା ୟୁକ୍ରେନ ନାଗରିକଙ୍କ କବର ଆବିଷ୍କାର ହେବାର ଖବର ଆସିଛି।
ଏହି ସମୟରେ, ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ତାଙ୍କ ଅଧିକାରୀମାନଙ୍କୁ ଦେଶର ସିନେମା ହଲରେ ୟୁକ୍ରେନ ଉପରେ ହୋଇଥିବା ଆକ୍ରମଣ ଉପରେ ଅନେକ ଡକ୍ୟୁମେଣ୍ଟାରୀ ଫିଲ୍ମ ଦେଖାଇବା ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି।
ରିପୋର୍ଟରେ କୁହାଯାଇଛି ଯେ ପୁଟିନ ନିର୍ଦ୍ଦେଶ ଦେଇଛନ୍ତି ଯେ ରୁଷିଆ ଯେପରି ୟୁକ୍ରେନରେ ଯୁଦ୍ଧ କରିଛି, ସିନେମା ହଲରେ ସାଧାରଣ ନାଗରିକଙ୍କୁ ଏହା ଦେଖାଇବା ଉଚିତ, ଯାହା ଦ୍ୱାରା ଲୋକମାନେ ରୁଷିାର ଶାସନର ନିଓ-ନାଜି ଆଦର୍ଶ ବିଷୟରେ ଜାଣିପାରିବେ। କ୍ରେମଲିନ ଏକ ବିବୃତ୍ତି ଜାରି କରି କହିଛି ଯେ ରୁଷିଆର ସଂସ୍କୃତି ମନ୍ତ୍ରଣାଳୟକୁ ଫେବୃଆରୀ ୧ ସୁଦ୍ଧା ଏହି ନିର୍ଦ୍ଦେଶ କାର୍ଯ୍ୟକାରୀ କରିବାକୁ ପଡ଼ିବ।
ୟୁକ୍ରେନ ଉପରେ ହୋଇଥିବା ଆକ୍ରମଣ ଉପରେ ଡକ୍ୟୁମେଣ୍ଟାରୀ ପ୍ରସ୍ତୁତ କରିବାକୁ ରୁଷିଆ ଚଳଚ୍ଚିତ୍ର ନିର୍ମାତାମାନଙ୍କୁ ସାହାଯ୍ୟ କରିବାକୁ ସରକାର କହିଛନ୍ତି। ଏହି ନିର୍ଦ୍ଦେଶରେ ଦର୍ଶାଯାଇଛି ଯେ ୟୁକ୍ରେନରେ ରୁଷିଆର ସଫଳ ସାମରିକ କାର୍ଯ୍ୟକଳାପ ଏବଂ ସୈନିକମାନଙ୍କ ସାହସିକତାକୁ ଚଳଚ୍ଚିତ୍ର ନିର୍ମାତାମାନେ ଚିତ୍ରଣ କରିବା ଆବଶ୍ୟକ। ଏହି କାର୍ଯ୍ୟ ଶେଷ କରିବାକୁ ପ୍ରତିରକ୍ଷା ମନ୍ତ୍ରୀ ସର୍ଗେଇ ଶୋଏଗୁଙ୍କୁ ମାର୍ଚ୍ଚ ୧ ପର୍ଯ୍ୟନ୍ତ ସମୟ ଦିଆଯାଇଛି।
ଉଲ୍ଲେଖନୀୟ କଥା ହେଉଛି, ରୁଷ ଦ୍ୱାରା ୟୁକ୍ରେନ ବିରୋଧରେ ଯୁଦ୍ଧ ଆରମ୍ଭ ହେବା ପରଠାରୁ ଅଧିକାଂଶ ରୁଷ ଚ୍ୟାନେଲ ଏବଂ ମିଡିଆ ସଂସ୍ଥା ପୁଟିନଙ୍କ ସାମରିକ ଅଭିଯାନକୁ ସମର୍ଥନ କରି ପ୍ରସାରଣ ଆରମ୍ଭ କରିଛନ୍ତି। ଏଥି ସହିତ ସ୍ବତନ୍ତ୍ର ମିଡିଆ ଚ୍ୟାନେଲଗୁଡ଼ିକ ବନ୍ଦ ହୋଇଯାଇଛି କିମ୍ବା ସେମାନଙ୍କ ପାଣ୍ଠି ବନ୍ଦ ହୋଇଯାଇଛି। ଏହି ସମୟରେ ଅନେକ ଗଣମାଧ୍ୟମ ପ୍ରତିନିଧି ମଧ୍ୟ ରୁଷିଆ ଛାଡିଛନ୍ତି।
