କ୍ୱିଭ,୨୬ ।୪: ୟୁକ୍ରେନ୍ ଉପରେ ରୁଷିଆର ଆକ୍ରମଣ କମ୍ ହେବା ଲକ୍ଷ୍ୟ କରାଯାଉ ନାହିଁ । ସୋମବାର ରୁଷିଆ ସେନା ୟୁକ୍ରେନ୍ର ପ୍ରାୟ ୫ଟି ରେଲୱେ ଷ୍ଟେଶନ ଉପରେ ଆକ୍ରମଣ କରିଛନ୍ତି । ଏହି ଆକ୍ରମଣରେ ଶହ ଶହ ଲୋକଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି । ଏହି ରେଲୱେ ଷ୍ଟେଶନ ଗୁଡିକ ମଧ୍ୟ ଓ ପଶ୍ଚିମ ୟୁକ୍ରେନର ବୋଲି ଜଣାପଡିଛି । ଏହାସହ ରୁଷିଆ ସୀମାକୁ ଲାଗିଥିବା ବ୍ରିୟାନସ୍କ ଅଞ୍ଚଳରେ ଥିବା ଏକ ତୈଳ ଭଣ୍ଡାରରେ ନିଆଁ ଲାଗିଯାଇଥିବା ଜଣାପଡିଛି । ଏହାର କାରଣ ଜଣାପଡି ନ ଥିଲେ ବି ଏହା ୟୁକ୍ରେନର ଆକ୍ରମଣ ବୋଲି କୁହାଯାଉଛି । ସୂଚନାଯୋଗ୍ୟ, ରୁଷିଆ-ୟୁକ୍ରେନ୍ ଯୁଦ୍ଧକୁ ୨ ମାସ ପୂରଣ ହୋଇଥିବା ବେଳେ ଇତିମଧ୍ୟରେ ଉଭୟ ଦେଶର ବହୁ ଧନଜୀବନ କ୍ଷୟକ୍ଷତି ହୋଇ ସାରିଲାଣି । ନିକଟରେ ରୁଷିଆ ସେନା ୟୁକ୍ରେନର କ୍ରିମିନଚୁକ ଅଞ୍ଚଳରେ ଏକ ତୈଳ ବିଶୋଧନାଗାର ଓ ଏକ ବିଜୁଳିଘରେ ମିଶାଇଲ ଆକ୍ରମଣ କରିବାରୁ କୋଟି କୋଟି ଟଙ୍କାର ସମ୍ପତ୍ତି ନଷ୍ଟ ହେବା ସହ ଜଣଙ୍କର ମୃତ୍ୟୁ ହୋଇଥିଲା ।
