ନୂଆଦିଲ୍ଲୀ,୧୮ା୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ଭିଡିଓ କନଫରେନ୍ସ ଯୋଗେ ତାମିଲନାଡୁର ୩୨,୭୦୦ କୋଟି ଟଙ୍କା ମୂଲ୍ୟର ତୈଳ ଏବଂ ବାଷ୍ପ ପ୍ରକଳ୍ପଗୁଡିକୁ ରାଷ୍ଟ୍ର ଉଦ୍ଦେଶ୍ୟରେ ଲୋକାର୍ପଣ ଏବଂ ଶିଳାନ୍ୟାସ କରିଛନ୍ତି। କାର୍ଯ୍ୟକ୍ରମ ଅବସରରେ ସେ କହିଛନ୍ତି, କେନ୍ଦ୍ର ସରକାର ପ୍ରାକୃତିକ ବାଷ୍ପକୁ ସାମଗ୍ରୀ ଓ ସେବା ଟିକସ ପରିସରକୁ ଆଣିବା ଲାଗି ପ୍ରତିଶ୍ରୁତିବଦ୍ଧ। ଆଗାମୀ ୫ ବର୍ଷରେ ତୈଳ ଏବଂ ବାଷ୍ପ ଭିତ୍ତିଭୂମିରେ ୭.୫ ଲକ୍ଷ କୋଟି ଟଙ୍କା ବିନିଯୋଗ କରାଯିବ। ପ୍ରଧାନମନ୍ତ୍ରୀ କହିଛନ୍ତି, ୩୧ ହଜାର କୋଟି ଟଙ୍କା ବିନିଯୋଗରେ ନିର୍ମାଣ ହେବାକୁ ଥିବା ନାଗାପଟିନମସ୍ଥିତ କୌଭେରି ବେସିନ ରିଫାଇନେରି ଦେଶର ଶକ୍ତି ଚାହିଦା ପୂରଣ ଦିଗରେ ଯୋଗଦାନ ରଖିବ। ସେହିଭଳି ରାମନାଥପୁରମ-ଥୋଥୁକୁଡି ଗ୍ୟାସ୍ ପାଇପଲାଇନ ତାମିଲନାଡୁକୁ ନିରନ୍ତର ଗ୍ୟାସ୍ ଯୋଗାଣ କରିବ। ଗ୍ୟାସୋଲିନ ଡେସୁଲଫୁରିଜେଶନ ୟୁନିଟ ବିଶ୍ୱସ୍ତରୀୟ ଭିତ୍ତିଭୂମି ପ୍ରସ୍ତୁତ କରିବାରେ ସହାୟକ ହେବ। ଏହି ମହତ୍ୱାକାଂକ୍ଷୀ ପ୍ରକଳ୍ପଗୁଡିକ ଦ୍ୱାରା ୫୧.୭ ଲକ୍ଷ ମାନବ ଦିବସ ସୃଷ୍ଟି ହେବ ବୋଲି ମୋଦି ସୂଚନା ଦେଇଛନ୍ତି। ଲୋକାର୍ପିତ ଉକ୍ତ ପ୍ରକଳ୍ପ ତାମିଲନାଡୁ ବିଶୋଧନାଗାରକୁ ଏକ ପେଣ୍ଠସ୍ଥଳୀ କରିବ ବୋଲି ଏହି ପରିପ୍ରେକ୍ଷୀରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି।
