ନୂଆଦିଲ୍ଲୀ,୧୬।୮: ରେଳବାଇରେ ସରକାରୀ ଚାକିରି ପାଇବାର ସ୍ୱପ୍ନ ଦେଖୁଥିବା ପରୀକ୍ଷାର୍ଥୀଙ୍କ ପାଇଁ ଖୁସିଖବର। ଆରଆରବି (RRB)ର ଜୁନିୟର ଇଞ୍ଜିନିୟର (JE) ନିଯୁକ୍ତି ପାଇଁ ଅନଲାଇନ୍ ଆବେଦନ ପ୍ରକ୍ରିୟା ଆରମ୍ଭ ହୋଇଯାଇଛି। ଏହା ସହିତ JEର ବିସ୍ତୃତ ବିଜ୍ଞାପନ ମଧ୍ୟ ପ୍ରକାଶ ପାଇଛି। ଏହି ନିଯୁକ୍ତି ପ୍ରକ୍ରିୟା ମାଧ୍ୟମରେ ମୋଟ ୩୯୯୩ଟି ଖାଲି ପଦବୀ ପୂରଣ କରାଯିବ। ଏଭଳି ପରିସ୍ଥିତିରେ, ଯେଉଁ ପରୀକ୍ଷାର୍ଥୀମାନେ JE ନିଯୁକ୍ତି ଫର୍ମ ଖୋଲିବାକୁ ଅପେକ୍ଷା କରିଥିଲେ, ସେମାନେ ଏବେ ଅନଲାଇନରେ ଆବେଦନ କରିପାରିବେ। ଆବେଦନ ଲିଙ୍କ୍ www.rrbapply.gov.in ରେ ସକ୍ରିୟ ହୋଇସାରିଛି।
ରେଳବାଇ କେନ୍ଦ୍ରୀକୃତ ନିଯୁକ୍ତି ସୂଚନା CEN-04/2026 ଅଧୀନରେ ଏହି ନିଯୁକ୍ତିର ବିସ୍ତୃତ ସୂଚନା (Notification) ଜାରି କରିଛି। ଏହା ସହିତ ୧୪ ଅଗଷ୍ଟରୁ ଆବେଦନ ପ୍ରକ୍ରିୟା ଆରମ୍ଭ ହୋଇଛି। ଆବେଦନକାରୀମାନେ ଏହି ତାରିଖରୁ ଶେଷ ତାରିଖ ୧୩ ସେପ୍ଟେମ୍ବର ୨୦୨୬ ମଧ୍ୟରେ ଯେକୌଣସି ସମୟରେ ଫର୍ମ ପୂରଣ କରିପାରିବେ। ପ୍ରାୟ ଗୋଟିଏ ମାସର ସମୟ ରହିଛି। ସେହିପରି ଆବେଦନ ଫି’ ଜମା କରିବାର ଶେଷ ତାରିଖ ୧୫ ସେପ୍ଟେମ୍ବର ୨୦୨୬। JE ନିଯୁକ୍ତି ପାଇଁ କିଏ ଆବେଦନ କରିପାରିବେ?, ଆବଶ୍ୟକ ଶିକ୍ଷାଗତ ଯୋଗ୍ୟତା କ’ଣ?, ଦରମା କେତେ ମିଳିବ? ଏବଂ ଚୟନ କିପରି ହେବ? ସେ ବିଷୟରେ ମଧ୍ୟ ଜାଣିରଖନ୍ତୁ…
RRB JE ନିଯୁକ୍ତି ପାଇଁ ଯୋଗ୍ୟତା:
-
କୌଣସି ସ୍ୱୀକୃତିପ୍ରାପ୍ତ ବୋର୍ଡରୁ ମେକାନିକାଲ୍ / ଇଲେକ୍ଟ୍ରିକାଲ୍ / ଇଲେକ୍ଟ୍ରୋନିକ୍ସ ଇଞ୍ଜିନିୟରିଂରେ ୩ ବର୍ଷର ଡିପ୍ଲୋମା କିମ୍ବା ଏହାର ସବ୍-ଷ୍ଟ୍ରିମ୍ରେ ଡିପ୍ଲୋମା କରିଥିବା ଆବଶ୍ୟକ।
-
ସିଭିଲ୍ ଇଞ୍ଜିନିୟରିଂରେ ୩ ବର୍ଷର ଡିପ୍ଲୋମା କିମ୍ବା ସିଭିଲ୍ ଇଞ୍ଜିନିୟରିଂରେ B.Sc ଡିଗ୍ରୀ କରିଥିବା ଆବଶ୍ୟକ।
-
ମେକାନିକାଲ୍ / ପ୍ରୋଡକ୍ସନ୍ / ଅଟୋମୋବାଇଲ୍ / ଇଲେକ୍ଟ୍ରିକାଲ୍ / ଇଲେକ୍ଟ୍ରୋନିକ୍ସ / ଇନ୍ଷ୍ଟ୍ରୁମେଣ୍ଟେସନ୍ ଆଣ୍ଡ କଣ୍ଟ୍ରୋଲ୍ ଇଞ୍ଜିନିୟରିଂ କିମ୍ବା ଏହାର ସବ୍-ଷ୍ଟ୍ରିମ୍ରେ ୩ ବର୍ଷର ଡିପ୍ଲୋମା କରିଥିବା ଆବଶ୍ୟକ।
-
କମ୍ପ୍ୟୁଟର ଇଞ୍ଜିନିୟରିଂ ଡିଗ୍ରୀ ଧାରୀମାନେ ମଧ୍ୟ ସମ୍ପୃକ୍ତ ପଦବୀ ପାଇଁ ଆବେଦନ କରିପାରିବେ। ଏହା ବ୍ୟତୀତ ପଦବୀ ସହ ଜଡ଼ିତ ଯୋଗ୍ୟତା ରଖିଥିବା ପରୀକ୍ଷାର୍ଥୀମାନେ ମଧ୍ୟ ଆବେଦନ ପାଇଁ ଯୋଗ୍ୟ।
-
ଡିପୋ ମେଟେରିଆଲ୍ ସୁପରିଣ୍ଟେଣ୍ଡେଣ୍ଟ୍ ପଦବୀ ପାଇଁ ଇଞ୍ଜିନିୟରିଂରେ ୩ ବର୍ଷର ଡିପ୍ଲୋମା କରିଥିବା ଆବଶ୍ୟକ।
-
ଆବେଦନକାରୀଙ୍କ ବୟସ ୧ ଜାନୁଆରୀ ୨୦୨୭ ସୁଦ୍ଧା ସର୍ବନିମ୍ନ ୧୮ ବର୍ଷ ଏବଂ ସର୍ବାଧିକ ୩୩ ବର୍ଷ ହୋଇଥିବା ଆବଶ୍ୟକ। ନିୟମାନୁସାରେ ସର୍ବାଧିକ ବୟସସୀମାରେ କୋହଳ ମଧ୍ୟ ମିଳିବ। SC/ST ଆବେଦନକାରୀଙ୍କ ପାଇଁ ୫ ବର୍ଷ ଏବଂ OBC (ନନ୍-କ୍ରିମି ଲେୟାର) ପାଇଁ ୩ ବର୍ଷର କୋହଳ ରହିଛି।
ରେଳବାଇ ଜୁନିୟର ଇଞ୍ଜିନିୟର ନିଯୁକ୍ତିର ଗୁରୁତ୍ୱପୂର୍ଣ୍ଣ ସୂଚନା:
| ବିବରଣୀ | ତଥ୍ୟ |
| ନିଯୁକ୍ତି ସଂସ୍ଥା | ରେଳବାଇ ନିଯୁକ୍ତି ବୋର୍ଡ (RRB) |
| ପଦବୀ | ଜୁନିୟର ଇଞ୍ଜିନିୟର ଏବଂ ଡିପୋ ମେଟେରିଆଲ୍ |
| ପଦବୀ ସଂଖ୍ୟା | ୩୯୯୩ |
| ଅଫିସିଆଲ୍ ୱେବସାଇଟ୍ | www.rrbapply.gov.in |
| ଆବେଦନ ଆରମ୍ଭ ତାରିଖ | ୧୪ ଅଗଷ୍ଟ ୨୦୨୬ |
| ଆବେଦନର ଶେଷ ତାରିଖ | ୧୩ ସେପ୍ଟେମ୍ବର ୨୦୨୬ |
| ଦରମା | ପେ ଲେଭଲ-୦୬ (୭ମ ବେତନ କମିଶନ ଅନୁଯାୟୀ ₹୩୫,୪୦୦/-) |
| ଚୟନ ପ୍ରକ୍ରିୟା | CBT-1, CBT-2, ସାର୍ଟିଫିକେଟ୍ ଯାଞ୍ଚ (Document Verification) |
| ବିସ୍ତୃତ ବିଜ୍ଞାପନ | RRB JE Recruitment 2026 Detailed Notification PDF |
ରେଳବାଇ ନିଯୁକ୍ତିରେ ଚୟନ କିପରି ହେବ?
-
ପ୍ରଥମ ପର୍ଯ୍ୟାୟ (Stage-1) CBT: ପ୍ରଥମ ପର୍ଯ୍ୟାୟ CBT ପରୀକ୍ଷା ୯୦ ମିନିଟର ହେବ, ଯେଉଁଥିରେ ୧୦୦ଟି ପ୍ରଶ୍ନ ପଚାରାଯିବ। ଗଣିତରୁ ୩୦, ଜେନେରାଲ୍ ଇଣ୍ଟେଲିଜେନ୍ସ ଆଣ୍ଡ ରିଜନିଂରୁ ୨୫, ଜେନେରାଲ୍ ଆୱାରନେସ୍ରୁ ୧୫ ଏବଂ ଜେନେରାଲ୍ ସାଇନ୍ସରୁ ୩୦ଟି ପ୍ରଶ୍ନ ରହିବ। ପ୍ରତ୍ୟେକ ପ୍ରଶ୍ନର ମୂଲ୍ୟ ୧ ମାର୍କ ହେବ। ଏଥିରେ ୧/୩ ନେଗେଟିଭ୍ ମାର୍କିଂ ମଧ୍ୟ ଲାଗୁ ହେବ। ଏହି ପର୍ଯ୍ୟାୟରେ ଉତ୍ତୀର୍ଣ୍ଣ ହେବା ପାଇଁ ଅନାରକ୍ଷିତ (Unreserved) ବର୍ଗଙ୍କୁ ୪୦%, EWSଙ୍କୁ ୪୦%, OBC (ନନ୍-କ୍ରିମି ଲେୟାର) ଏବଂ SCଙ୍କୁ ୩୦% ଓ STଙ୍କୁ ୨୫% ମାର୍କ ଆଣିବାକୁ ହେବ।
-
ଦ୍ୱିତୀୟ ପର୍ଯ୍ୟାୟ (Stage-2) CBT: ପ୍ରଥମ ପର୍ଯ୍ୟାୟରେ ଶର୍ଟଲିଷ୍ଟ ହୋଇଥିବା ଆବେଦନକାରୀମାନଙ୍କୁ ଦ୍ୱିତୀୟ ପର୍ଯ୍ୟାୟ ପରୀକ୍ଷାରେ ବସିବାର ସୁଯୋଗ ମିଳିବ। ଏଥିରେ ଖାଲି ପଦବୀର ୧୫ ଗୁଣ ଆବେଦନକାରୀଙ୍କୁ ଡକାଯିବ। ପରୀକ୍ଷାର ଅବଧି ୧୨୦ ମିନିଟ୍ ହେବ, ଯେଉଁଥିରେ ୧୫୦ଟି ପ୍ରଶ୍ନ ପଚାରାଯିବ। ଜେନେରାଲ୍ ଆୱାରନେସ୍, ଫିଜିକ୍ସ ଆଣ୍ଡ କେମିଷ୍ଟ୍ରି, କମ୍ପ୍ୟୁଟର ଆଣ୍ଡ ଆପ୍ଲିକେସନ୍ ବେସିକ୍ସ, ଏନଭାଇରନ୍ମେଣ୍ଟ ଆଣ୍ଡ ପଲ୍ୟୁସନ୍ କଣ୍ଟ୍ରୋଲ୍, ଏବଂ ଟେକ୍ନିକାଲ୍ ଏବିଲିଟିଜ୍ରୁ ପ୍ରଶ୍ନ ଆସିବ। ଏଥିରେ ମଧ୍ୟ ୧/୩ ନେଗେଟିଭ୍ ମାର୍କିଂ ରହିବ।
-
ସାର୍ଟିଫିକେଟ୍ ଯାଞ୍ଚ (Document Verification): ଦ୍ୱିତୀୟ ପର୍ଯ୍ୟାୟ CBT ଉତ୍ତୀର୍ଣ୍ଣ ହେବା ପରେ ପରୀକ୍ଷାର୍ଥୀମାନଙ୍କୁ ସାର୍ଟିଫିକେଟ୍ ଯାଞ୍ଚ ପାଇଁ ନିଯୁକ୍ତି ବୋର୍ଡ ସମ୍ମୁଖରେ ଉପସ୍ଥିତ ହେବାକୁ ପଡ଼ିବ। ଏଥିରେ ଅରିଜିନାଲ୍ ଡକ୍ୟୁମେଣ୍ଟ୍ ଗୁଡ଼ିକ ଆଣିବାକୁ ହେବ।
RRB JE ନିଯୁକ୍ତି ଫର୍ମ କିପରି ପୂରଣ କରିବେ?
RRB JE ଫର୍ମ ପୂରଣ କରିବା ପାଇଁ ଆବେଦନକାରୀମାନଙ୍କୁ ପ୍ରଥମେ www.rrbapply.gov.in କୁ ଯିବାକୁ ପଡ଼ିବ। ଏଠାରେ ପ୍ରଥମେ ନିଜର ମୌଳିକ ସୂଚନା (Basic Details) ଦେଇ ଏକ ଆକାଉଣ୍ଟ ସୃଷ୍ଟି କରନ୍ତୁ। ଏଥିପାଇଁ ଇମେଲ୍ ଏବଂ ମୋବାଇଲ୍ ନମ୍ବର ଆବଶ୍ୟକ ହେବ। ଏହା ପରେ ଲଗ୍ଇନ୍ କରି ନିଜ ନାମ, ବର୍ଗ (Category), ଜନ୍ମ ତାରିଖ, ମାର୍କସ ଏବଂ ଅନ୍ୟାନ୍ୟ ସୂଚନା ଧ୍ୟାନର ସହ ସମ୍ପୃକ୍ତ ବାକ୍ସରେ ପୂରଣ କରନ୍ତୁ। ଏହା ପରେ ଆବଶ୍ୟକୀୟ ଡକ୍ୟୁମେଣ୍ଟ୍ ସଠିକ୍ ଆକାରରେ (Size) ଅପଲୋଡ୍ କରନ୍ତୁ। ଆବେଦନ ଫି’ ପରିଶୋଧ କରିବା ପରେ ଫର୍ମର ପ୍ରିଣ୍ଟଆଉଟ୍ ବାହାର କରି ରଖନ୍ତୁ।
ଆବେଦନ ଫି’ (Application Fees) କେତେ ଲାଗିବ?
SC/ST, ପୂର୍ବତନ ସୈନିକ (Ex-Servicemen), PwBD, ମହିଳା, ଟ୍ରାନ୍ସଜେଣ୍ଡର, ସଂଖ୍ୟାଲଘୁ ଏବଂ ଆର୍ଥିକ ଅନଗ୍ରସର ବର୍ଗର ଆବେଦନକାରୀଙ୍କ ପାଇଁ ଆବେଦନ ଫି’ ₹୨୫୦ ରଖାଯାଇଛି। ଏହା ବ୍ୟତୀତ ଅନ୍ୟ ସମସ୍ତ ବର୍ଗର ପରୀକ୍ଷାର୍ଥୀଙ୍କୁ ₹୫୦୦ ଫି’ ଦେବାକୁ ପଡ଼ିବ। ଯେଉଁ ଆବେଦନକାରୀମାନେ Stage-1 CBT ପରୀକ୍ଷା ଦେବେ, ସେମାନଙ୍କ ₹୫୦୦ ଫି’ ମଧ୍ୟରୁ ₹୪୦୦ ରିଫଣ୍ଡ୍ (ଫେରସ୍ତ) ମିଳିଯିବ। ସେହିପରି ସଂରକ୍ଷିତ ବର୍ଗର ପରୀକ୍ଷାର୍ଥୀଙ୍କୁ ପୂରା ଫି’ ରିଫଣ୍ଡ୍ ମିଳିବ।
