ଛତ୍ରପୁର,୧୭ା୩(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁର ରେଳ ଷ୍ଟେଶନରେ ଜଣେ ଯୁବକଙ୍କୁ ମୃତ୍ୟୁମୁଖରୁ ବଞ୍ଚାଇଛନ୍ତି ଜଣେ ଆର୍ପିଏଫ୍ ଯବାନ। ଚଳନ୍ତା ଟ୍ରେନରୁ ଡେଇଁପଡ଼ି ଯୁବକ ରେଳ ଧାରଣା ଭିତରକୁ ଟାଣି ହୋଇଯିବା ପୂର୍ବରୁ ଯୁବକଙ୍କୁ ମୃତ୍ୟୁ ମୁଖରୁ ଟାଣି ଆଣିଛନ୍ତି କାର୍ଯ୍ୟରତ ଆର୍ପିଏଫ୍ କନଷ୍ଟେବଳ।
ସୂଚନାନୁଯାୟୀ, ଶୁକ୍ରବାର କେନ୍ଦ୍ରାପଡ଼ା ଡେରାବିଶ ଅଞ୍ଚଳର ଯୁବକ ଅନିଲ ସେଠୀ ଭୁବନେଶ୍ୱରରୁ କୋଣାର୍କ ଏକ୍ସପ୍ରେସରେ ମୁମ୍ବାଇ ଯାଉଥିବା ବେଳେ ଛତ୍ରପୁର ଷ୍ଟେଶନ ୨ନମ୍ବର ପ୍ଲାଟଫର୍ମରେ ଗାଡି ଛାଡ଼ିବା ସମୟରେ କୌଣସି କାରଣବଶତଃ ସେ ଟ୍ରେନରୁ ଡେଇଁ ପଡ଼ିଥିଲେ। ଏହି ସମୟରେ ସେ ରେଳ ଧାରଣା ଆଡ଼କୁ ଟାଣି ହୋଇଚାଲିଯାଇଥିଲେ। ସେହି ସମୟରେ ପ୍ଲାଟ୍ଫର୍ମରେ ଡ୍ୟୁଟିରେ ଥିବା ଆର୍ପିଏଫ୍ କନଷ୍ଟେବଳ ପ୍ରସନ୍ନ କୁମାର ନାୟକ ନିଜର ଉପସ୍ଥିତ ବୁଦ୍ଧି ଓ ସାହସିକତା ଦେଖାଇ ତାଙ୍କୁ ମୃତ୍ୟୁମୁଖରୁ ବଞ୍ଚାଇଥିଲେ। କନଷ୍ଟେବଳ ପ୍ରସନ୍ନଙ୍କ ଉପସ୍ଥିତ ବୁଦ୍ଧି ଓ ସାହସିକତାକୁ ସବୁ ମହଲରେ ପ୍ରଶଂସା କରାଯାଉଛି।
