ଦୁବାଇ, ୨୭।୯: ଲଗାତାର ୫ ପରାଜୟ ପରେ ବିଜୟ ସ୍ବାଦ ଚାଖିଛି ସନରାଇଜର୍ସ ହାଇଦ୍ରାବାଦ୍। ଚଳିତ ଆଇପିଏଲରେ ପ୍ଲେଅପ୍ସରୁ ବାଦ୍ ପଡ଼ିଥିବା ହାଇଦ୍ରାବାଦ୍ ସୋମବାର ଖେଳାଯାଇଥିବା ମ୍ୟାଚ୍ରେ ୭ ଉଇଟେରେ ରାଜସ୍ଥାନ ରୟାଲ୍ସକୁ ହରାଇ ଦେଇଛି। ପରାଜୟ ସତ୍ତ୍ୱେ ରାଜସ୍ଥାନ ଦଳର ପ୍ଲେ-ଅପ୍ ଆଶା ଏବେ ବି ଉଜ୍ଜୀବିତ ରହିଛି। କିନ୍ତୁ ସେଥି ପାଇଁ ଦଳକୁ ତା’ର ଅନ୍ତିମ ୪ ମ୍ୟାଚ୍ ଜିତିବାକୁ ପଡ଼ିବ।
ପ୍ଲେ-ଅପ୍ସ ଆଶା ଶେଷ ହୋଇ ସାରିଥିବାରୁ ୪ ପରିବର୍ତ୍ତନ ସହ ଓହ୍ଲାଇଥିଲା ହାଇଦ୍ରାବାଦ୍। ରାଜସ୍ଥାନ ପାଇଁ କେବଳ ଅଧିନାୟକ ସଞ୍ଜୁ ସାମସନ (୮୨ ରନ୍, ୭ ଚୌକା ଓ ୩ ଛକା) ଓ ଜସଶ୍ୱି ଜୈଶ୍ୱାଲ (୩୬ ରନ୍, ୫ ଚୌକା ଓ ୧ ଛକା)ଙ୍କୁ ଛାଡ଼ି ଦେଲେ ଅନ୍ୟ କେହି ଆଖିଦୃଶିଆ ସ୍କୋର କରିପାରି ନ ଥିଲେ। ଫଳରେ ରାଜସ୍ଥାନ ଧାର୍ଯ୍ୟ ୨୦ ଓଭରରେ ୫ ଉଇକେଟ ହରାଇ ୧୬୪ ରନ୍ କରିଥିଲା। ଜବାବରେ ହାଇଦ୍ରାବାଦ୍କୁ ବିସ୍ଫୋରକ ଆରମ୍ଭ ଦେଇଥିଲେ ରିଦ୍ଦିମାନ ଶାହ (୧୮) ଓ ଜାସନ ରୟ (୬୦ ରନ୍ , ୮ ଚୌକା ଓ ୧ ଛକା)। ମଧ୍ୟକ୍ରମରେ ଅଧିନାୟକ କେନ ଓ୍ବିଲିୟମସନ ୫୧ ରନ୍ର ଅର୍ଦ୍ଧଶତକୀୟ ପାଳି ଖେଳି ହାଇଦ୍ରାବାଦକୁ ଦେଇଥିଲେ ଚଳିତ ସିଜନର ଦ୍ୱିତୀୟ ବିଜୟ।
