ବାରଙ୍ଗ,୭।୧୦(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନ ପର୍ଯ୍ୟଟକମାନଙ୍କୁ ଆକୃଷ୍ଟ କରିବା ପାଇଁ ଦଶହରା ଭେଟି ଦେବାକୁ ଯାଉଛନ୍ତି କର୍ତ୍ତୃପକ୍ଷ। ନନ୍ଦନକାନନରେ ଥିବା ବହୁ ପ୍ରତୀକ୍ଷିତ ଟଏଟ୍ରେନ ଓ ଏରିଆଲ ରୋପ୍ୱେ ନୂଆ ରୂପ ନେଇ କାର୍ଯ୍ୟ କରିବ। ୬୭ତମ ବନ୍ୟପ୍ରାଣୀ ସପ୍ତାହ ଉପଲକ୍ଷେ ୮ତାରିଖରେ ନନ୍ଦନକାନନରେ ଆୟୋଜିତ ରାଜ୍ୟସ୍ତରୀୟ କାର୍ଯ୍ୟକ୍ରମରେ ଜଙ୍ଗଲମନ୍ତ୍ରୀ ବିକ୍ରମ କେଶରୀ ଆରୁଖ ଟଏଟ୍ରେନକୁ ପର୍ଯ୍ୟଟକମାନଙ୍କ ପାଇଁ ଉତ୍ସର୍ଗୀକୃତ କରିବାସହ ରୋପୱେର ଭୂମିପୂଜନ କରିବେ ବୋଲି ନନ୍ଦନକାନନ କାର୍ଯ୍ୟାଳୟ ପକ୍ଷରୁ କୁହାଯାଇଛି। ତେବେ ୨୦୧୧ରେ ବନ୍ଦ ରହିଥିବା ରୋପୱେକୁ କୋଲାକାତାର ଦାମୋଦର ରୋପୱେ କମ୍ପାନୀକୁ ଟେଣ୍ଡର ମିଳିଛି। କିନ୍ତୁ କୋଭିଡ୍ ପାଇଁ କାର୍ଯ୍ୟାରମ୍ଭ ହୋଇପାରି ନ ଥିଲା। ଏହି କମ୍ପାନୀ ନନ୍ଦନକାନନ ସହ ଏହାକୁ ଚଳାଇବା ପାଇଁ ୨୦ବର୍ଷିଆ ଚୁକ୍ତି କରିଥିବାବେଳେ ୧୩କୋଟି ଟଙ୍କା ବ୍ୟୟବରାଦରେ ୧୮ମାସ ମଧ୍ୟରେ କାର୍ଯ୍ୟ ସରିବ ବୋଲି ଜଣାପଡିଛି। ଏଥିରେ ୧୨ଟି କ୍ୟାବିନ ରହିଥିବାବେଳେ ପ୍ରତି କ୍ୟାବିନରେ ୪ଜଣ ବସିବାର କ୍ଷମତା ରହିଛି। ଏକକାଳୀନ ୪୮ଜଣ ପର୍ଯ୍ୟଟକ ବସି ବୁଲିପାରିବାର ସୁବିଧା ରହିଛି। ନିରବଚ୍ଛିନ୍ନ ବିିଦ୍ୟୁତ ସେବା ପାଇଁ ୩୦୦କେଭି ଜେନେରେଟର ବ୍ୟାକ୍ଅପ ସହ ଟିକେଟ ମୂଲ୍ୟ ୯୫ଟଙ୍କା ପରେ ଜିଏସ୍ଟି ଦେବାକୁ ପଡିବ। ରେଳଧାରଣା ଟ୍ରାକ ଉପରେ ପର୍ଯ୍ୟଟକମାନଙ୍କ ସୁଗମ ଯାତାୟାତ ପାଇଁ ଫୁଟଓଭର ବ୍ରିଜ ନିର୍ମାଣ ହେବ।
ସେହିଭଳି ଟ୍ରାକର ରକ୍ଷଣାବେକ୍ଷଣ ଓ ଖର୍ଚ୍ଚ ହେତୁ ୨୦୧୪ରୁ ବନ୍ଦ ରହିଥିବା ଟଏଟ୍ରେନ ମଧ୍ୟ ଖୁବଶୀଘ୍ର ଚାଲିବ। ଭାରତୀୟ ରେଳବାଇର ସୁପାରିସ ଅନୁଯାୟୀ ରାଇଟ୍ସ ସଂସ୍ଥା ଏହାର ବନୀକରଣ କାର୍ଯ୍ୟ ସରିଛି। ଇଞ୍ଜିନ, ବଗି, ଟ୍ରାକ, ଷ୍ଟେଶନ ନବୀକରଣ ବାବଦକୁ ୪୯୮.୬୩ ଲକ୍ଷ ଟଙ୍କା ଖର୍ଚ୍ଚ ହୋଇଛି। ଏକକାଳୀନ ୫ଟି ବଗିରେ ୭୨ଜଣଙ୍କୁ ନେବାର କ୍ଷମତା ରହିଛି। ବିଶ୍ରାମାଗାର, ଶୌଚାଳୟ, ପାନୀୟଜଳର ବ୍ୟବସ୍ଥା ସହ ପ୍ରଦୂଷଣ ରୋକିବା ପାଇଁ ବ୍ୟାଟେରିଚାଳିତ ଇଞ୍ଜିନର ବ୍ୟବସ୍ଥା ହୋଇଛି। ଟ୍ରାକ ଚାରିପଟେ ୧୨ହେକ୍ଟର ପରିମିତ ଜାଗାରେ ଆବଦ୍ଧ କରାଯାଇ ତୃଣଭୋଜି ପ୍ରାଣୀମାନଙ୍କୁ ଛଡାଯିବାର ବ୍ୟବସ୍ଥା ହୋଇଛି। ତେବେ ନନ୍ଦନକାନନ ଏହାକୁ ଘରୋଇକରଣକୁ ନ ଦେଇ ନିଜ ଅଧୀନରେ ରଖି ପ୍ରଚଳନ କରିବ ବୋଲି ଜଣାପଡିଛି। ଏହି ରାଜ୍ୟସ୍ତରୀୟ ଉତ୍ସବରେ ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ କୁମାର ରାଉତ, ଜଟଣୀ ବିଧାୟକ ସୁରେଶ କୁମାର ରାଉତରାୟ ଅତିଥିଭାବେ ଯୋଗଦେବେ ବୋଲି ନନ୍ଦନକାନନ କର୍ତ୍ତୃପକ୍ଷଙ୍କଠାରୁ ସୂଚନା ମିଳିଛି।
