ଭୁବନେଶ୍ୱର,୪।୯(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୁକ୍ରବାର ଭୁବନେଶ୍ୱର ଏଜି ଛକସ୍ଥିତ ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (ଓଏସ୍ଆର୍ଟିସି) ମୁଖ୍ୟ କାର୍ଯ୍ୟାଳୟରୁ ୧୧୦ ନୂଆ ଅତ୍ୟାଧୁନିକ ବସ୍ର ଶୁଭାରମ୍ଭ କରିଛନ୍ତି। ଯାତ୍ରୀଙ୍କୁ ବସ୍ଯାତ୍ରାର ଆରାମଦାୟକ ଅନୁଭୂତି ପ୍ରଦାନ କରିବା ଲାଗି ବସ୍ଗୁଡ଼ିକରେ ସମସ୍ତ ପ୍ରକାର ଅତ୍ୟାଧୁନିକ ସୁବିଧା ଉପଲବ୍ଧ ରହିଛି। ସିସି ଟିଭି କ୍ୟାମେରା, ଆରାମଦାୟକ ସିଟ୍, ଆପାତ୍ତକାଳୀନ ବଟନ୍, ଭେହିକିଲ ଟ୍ରାକିଂ ସିଷ୍ଟମ, ଅଗ୍ନି ନିର୍ବାପକ ବ୍ୟବସ୍ଥା, ଯାତ୍ରୀଙ୍କୁ ସୂଚନା ପ୍ରଦାନ ପାଇଁ ବୈଷୟିକ ଜ୍ଞାନକୌଶଳ ସୁବିଧା କରାଯାଇଛି। ସମ୍ପୃକ୍ତ ବସ୍ଗୁଡିକ ଆନ୍ତଃରାଜ୍ୟ ବସ୍ ପରିବହନରେ ମଧ୍ୟ ନିୟୋଜିତ ହେବ। ଏଥିସହ ପଟିଆ ଏବଂ ଭଗବାନପୁରରେ ‘ମୋ ବସ୍’ର ୨ଟି ଅତ୍ୟାଧୁନିକ ଡିପୋ ଉଦ୍ଘାଟିତ ହୋଇଛି। ଏହି ଡିପୋରେ ମେଶିନ ଜରିଆରେ ବସ୍ ପରିଷ୍କାର କରାଯିବା ସହ ତେଲ ପକାଯିବା ସୁବିଧା କରାଯାଇଛି।
ସୂଚନାଯୋଗ୍ୟ, ଓଏସ୍ଆର୍ଟିସି ପକ୍ଷରୁ ଚଳାଚଳ କରିବାକୁ ଥିବା ୧୮୦ ନୂଆ ବସ୍ ମଧ୍ୟରୁ ଶୁକ୍ରବାର ୧୧୦ଟିର ଶୁଭାରମ୍ଭ ହୋଇଛି। ଅନ୍ୟ ୭୦ଟି ବସ୍ ଖୁବଶୀଘ୍ର ଚଳାଚଳ କରିବ। ଏବେ ଓଏସଆର୍ଟିସି ପକ୍ଷରୁ ୨୮ ଜିଲା ତଥା ୪୩ ଅନ୍ତଃରାଜ୍ୟ ମାର୍ଗରେ ୩୯୮ ବସ୍ ଯାତାୟାତ କରୁଛି। ପଡ଼ୋଶୀ ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ, ଝାଡ଼ଖଣ୍ଡ, ଛତିଶଗଡ଼କୁ ବସ୍ ସେବା ଉପଲବ୍ଧ ରହିଛି। ନୂତନ କରି ଶୁଭାରମ୍ଭ ହେବାକୁ ଥିବା ବସ୍ଗୁଡ଼ିକ ଭଲ୍ଭୋ, ଏସି ଅଲ୍ଟ୍ରା ଡିଲକ୍ସ, ନନ୍ ଏସି ଡିଲକ୍ସ ତଥା ନନ୍ ଏସି ହାଇ କମ୍ଫର୍ଟ ଶ୍ରେଣୀର।
ଏହି ଅବସରରେ ମୁଖ୍ୟମନ୍ତ୍ରୀ ପୋଖରୀପୁଟଠାରେ ରାଜ୍ୟ ସାମାଜିକ ସୁରକ୍ଷା, ଭିନ୍ନକ୍ଷମ ସଶକ୍ତୀକରଣ ବିଭାଗ ପକ୍ଷରୁ ୧୯ କୋଟି ଟଙ୍କା ବ୍ୟୟରେ ନବନିର୍ମିତ ଭିନ୍ନକ୍ଷମ ସଶକ୍ତୀକରଣ ପ୍ରତିଷ୍ଠାନ ଉଦ୍ଘାଟନ କରିଥିଲେ। କାର୍ଯ୍ୟକ୍ରମରେ ମନ୍ତ୍ରୀ ପଦ୍ମନାଭ ବେହେରା, ପ୍ରତାପ ଜେନା, ବିଧାୟକ ସୁଶାନ୍ତ ରାଉତ ପ୍ରମୁଖ ଉପସ୍ଥିତ ଥିଲେ।
