ନୂଆଦିଲ୍ଲୀ,୪।୯: ପ୍ରାୟ ଚାରି ବର୍ଷ ପୂର୍ବେ ତିଳକ ବର୍ମା ମାତ୍ର ୧୯ ବର୍ଷର ଥିଲେ। ସେତେବେଳେ ତାଙ୍କ ଖେଳ ଦେଖି ଭାରତୀୟ ଅଧିନାୟକ ରୋହିତ ଶର୍ମା ଦାବି କରିଥିଲେ ଯେ, ତିଳକ ଖୁବଶୀଘ୍ର ଭାରତ ପାଇଁ ସମସ୍ତ ଫର୍ମାଟରେ କ୍ରିକେଟ ଖେଳିବେ। ତାଙ୍କ ବ୍ୟାଟିଂ ଟେକ୍ନିକ ଏବଂ ଶଟ ସିଲେକ୍ସନରେ ରୋହିତ ଖୁବ ପ୍ରଭାବିତ ହୋଇଥିଲେ।
ଏହାପରଠାରୁ ତିଳକ ବର୍ମା ଲଗାତାର ଭାବେ ନିଜ ପ୍ରଦର୍ଶନର ଛାପ ଛାଡ଼ିଆସୁଛନ୍ତି। ଟି-୨୦ କ୍ରିକେଟରେ ସେ ଭାରତୀୟ ଦଳରେ ନିଜ ସ୍ଥାନକୁ ମଜବୁତ କରିସାରିଛନ୍ତି। ଦିନିକିଆ କ୍ରିକେଟରେ ଏପର୍ଯ୍ୟନ୍ତ ତାଙ୍କୁ ବହୁତ କମ ସୁଯୋଗ ମିଳିଛି। କିନ୍ତୁ ଘରୋଇ କ୍ରିକେଟର ଦୀର୍ଘ ଫର୍ମାଟରେ ତାଙ୍କ ପ୍ରଦର୍ଶନ ଦେଖିଲେ ଏବେ ଲାଗୁଛି ଯେ, ତାଙ୍କ ପରବର୍ତ୍ତୀ ଲକ୍ଷ୍ୟ ହେଉଛି ଟେଷ୍ଟ କ୍ରିକେଟ।
ନର୍ଥ ଜୋନ ବିପକ୍ଷରେ ଦୁଲୀପ ଟ୍ରଫିର ଦ୍ୱିତୀୟ ସେମିଫାଇନାଲରେ ତିଳକ ବର୍ମା ଅପରାଜିତ ୧୧୬ ଏବଂ ଅପରାଜିତ ୫୧ ରନର ଦୁଇଟି ଗୁରୁତ୍ୱପୂର୍ଣ୍ଣ ପାଳି ଖେଳିଥିଲେ। ତାଙ୍କ ଏହି ଦୁଇ ପାଳି କେବଳ ସାଉଥ ଜୋନ୍ର ବିଜୟ ଦେଇନାହିଁ, ବରଂ ଭାରତୀୟ ଟେଷ୍ଟ ଦଳର ଦ୍ୱାରରେ ମଧ୍ୟ ତିଳକ ପହଞ୍ଚିଛନ୍ତି। ତାଙ୍କ ପ୍ରଦର୍ଶନର ସବୁଠାରୁ ବଡ଼ ବିଶେଷତା ଥିଲା ପରିସ୍ଥିତି ଅନୁଯାୟୀ ବ୍ୟାଟିଂ କରିବା। ପ୍ରଥମ ପାଳିରେ ସାଉଥ ଜୋନ ୫ ଉଇକେଟ୍ରେ ମାତ୍ର ୮୦ ରନ କରି ସଙ୍କଟରେ ଥିବାବେଳେ ତିଳକ ଦଳର ଇନିଂସକୁ ସମ୍ଭାଳିଥିଲେ ଏବଂ ଶତକ ହାସଲ କରିଥିଲେ।
ଏହାପରେ ଦ୍ୱିତୀୟ ପାଳିରେ ୧୮୧ ରନର ଲକ୍ଷ୍ୟ ପିଛା କରିବା ସମୟରେ ସେ ଶେଷ ପର୍ଯ୍ୟନ୍ତ କ୍ରଜ୍ରେ ରହିଥିଲେ। ତାଙ୍କ ଏହି ପ୍ରଦର୍ଶନ ରେଡ ବଲ କ୍ରିକେଟ୍ରେ ତାଙ୍କ ପରିପକ୍ୱତାକୁ ପ୍ରମାଣିତ କରିଛି।
ତିଳକ ବର୍ମାଙ୍କ ଫର୍ଷ୍ଟ-କ୍ଲାସ କ୍ରିକେଟରେ ବ୍ୟାଟିଂ ଆଭେରେଜ ପ୍ରାୟ ୫୫ ରହିଛି। ଦୁଲୀପ ଟ୍ରଫିରେ ଏଭଳି ପ୍ରଦର୍ଶନ ତାଙ୍କ ରେଡ ବଲ କ୍ରିକେଟରେ କ୍ଷମତାକୁ ପୁଣିଥରେ ସାମ୍ନାକୁ ଆଣିଛି। ଟେଷ୍ଟ ଦଳରେ ସ୍ଥାନ ପାଇବା ପାଇଁ କେବଳ ବଡ଼ ସ୍କୋର କରିବା ଯଥେଷ୍ଟ ନୁହେଁ। କଠିନ ପରିସ୍ଥିତିରେ ଧୈଯ୍ୟ ଦେଖାଇବା, କ୍ରିଜରେ ରହିବା ଏବଂ ମ୍ୟାଚର ଆବଶ୍ୟକତା ଅନୁସାରେ ନିଜ ବ୍ୟାଟିଂ ଶୈଳୀକୁ ବଦଳାଇବା ମଧ୍ୟ ଜଣେ ଟେଷ୍ଟ ବ୍ୟାଟର୍ଙ୍କ ପାଇଁ ଅତ୍ୟନ୍ତ ଜରୁରୀ।
