ମୁମ୍ବାଇ,୨୯।୧୦: ଚାଷୀଙ୍କ ଆତ୍ମହତ୍ୟାକୁ ନେଇ ବିବାଦୀୟ ବୟାନ ଦେଇ ଚର୍ଚ୍ଚାକୁ ଆସିଛନ୍ତି ମହାରାଷ୍ଟ୍ରର ବୁଲଢାଣାରୁ ଶିବସେନା (ଏକନାଥ ସିନ୍ଦେ ଗୋଷ୍ଠୀ) ବିଧାୟକ ସଞ୍ଜୟ ଗାଏକୱାଡ଼। ସେ କହିଛନ୍ତି, ଯଦି କୌଣସି ଚାଷୀ ଆତ୍ମହତ୍ୟା କରୁଛନ୍ତି, ତେବେ ତାଙ୍କ ଶେଷକୃତ୍ୟରେ ମଧ୍ୟ କେହି ସାମିଲ ହେବା ଉଚିତ ନୁହେଁ। ଏପରିକି ପଶୁପକ୍ଷୀ ମୃତଦେହକୁ ଖାଇବା ପରେ ଲୋକେ ଏହାର ପରିଣାମ ବୁଝିବେ ବୋଲି ସେ ମନ୍ତବ୍ୟ ଦେଇଛନ୍ତି । ତାଙ୍କର ଏହି ବୟାନକୁ ନେଇ ବିବାଦ ସୃଷ୍ଟି ହେବାର ଆଶଙ୍କା ରହିଛି।
ସଞ୍ଜୟ ଗାଏକୱାଡ଼ କହିଛନ୍ତି ଯେ ଚାଷୀମାନେ ଆତ୍ମହତ୍ୟା କରିବା ପରିବର୍ତ୍ତେ ନିଜ ସମସ୍ୟା ସରକାର, ସ୍ଥାନୀୟ ବିଧାୟକ ଓ ସାଂସଦଙ୍କ ନିକଟରେ ଉପସ୍ଥାପନ କରିବା ଉଚିତ। କୌଣସି ଚାଷୀ ସମସ୍ୟାରେ ଥିଲେ ସରକାରଙ୍କୁ ଚିଠି ଲେଖିବା ସହ ଜନପ୍ରତିନିଧିଙ୍କୁ ନିଜ ଅସୁବିଧା ଜଣାଇବା ଦରକାର। ଏହାଦ୍ୱାରା ସମସ୍ତେ ମିଶି ତାଙ୍କୁ ସହାୟତା କରିବାକୁ ଉଦ୍ୟମ କରିପାରିବେ ବୋଲି ସେ କହିଛନ୍ତି। ତାଙ୍କ କହିବା ଅନୁସାରେ, ଜଣେ ଚାଷୀ ଆତ୍ମହତ୍ୟା କଲେ ତାଙ୍କ ସ୍ତ୍ରୀ ଓ ପିଲାମାନେ ଅସହାୟ ହୋଇପଡ଼ନ୍ତି। ପରିବାରକୁ ଅନେକ ସମସ୍ୟାର ସାମ୍ନା କରିବାକୁ ପଡ଼େ। ତେଣୁ ଏପରି ଚରମ ପଦକ୍ଷେପ ନେବା ପୂର୍ବରୁ ନିଜ ପରିବାର ଓ ପିଲାମାନଙ୍କ ଭବିଷ୍ୟତ ବିଷୟରେ ଚିନ୍ତା କରିବାକୁ ସେ ଚାଷୀଙ୍କୁ ଅପିଲ୍ କରିଛନ୍ତି।
ବିଧାୟକ ଗାଏକୱାଡ଼ କହିଛନ୍ତି, ଚାଷୀ ଆତ୍ମହତ୍ୟା କଲେ ତାଙ୍କ ଶେଷକୃତ୍ୟରେ କେହି ଯୋଗ ଦେବା ଉଚିତ ନୁହେଁ । ପଶୁମାନେ ମୃତଦେହକୁ ଖାଇବା ପରେ ଏଭଳି ନିଷ୍ପତ୍ତିର ପରିଣାମ ସମ୍ପର୍କରେ ଲୋକେ ଅନୁଭବ କରିବେ ଏବଂ ଆତ୍ମହତ୍ୟା କରିବେ ନାହିଁ ବୋଲି ସେ ମତ ଦେଇଛନ୍ତି। ଚାଷୀମାନେ ଆତ୍ମହତ୍ୟା କରି ନିଜ ପିଲାମାନଙ୍କୁ ଦୁଃଖ ଓ ସମସ୍ୟା ଭିତରକୁ ଠେଲି ଦେଉଛନ୍ତି । ବିବାହ ସମୟରେ ସ୍ତ୍ରୀଙ୍କ ସହ ସାତ ଜନ୍ମର ସାଥୀ ହେବାକୁ ପ୍ରତିଜ୍ଞା କରିଥିଲେ ମଧ୍ୟ ମଝିରେ ଜୀବନ ଶେଷ କରିଦେଉଛନ୍ତି ବୋଲି ସେ କହିଛନ୍ତି।
ସୂଚନା ଅନୁସାରେ,ନେତା ପ୍ରକାଶ ଆମ୍ବେଡକର ଚାଷୀଙ୍କୁ ନେଇ କଥିତ ଭାବେ ଦେଇଥିବା ଏକ ମନ୍ତବ୍ୟ ସମ୍ପର୍କରେ ସାମ୍ବାଦିକମାନେ ସଞ୍ଜୟ ଗାଏକୱାଡ଼ଙ୍କୁ ପ୍ରଶ୍ନ କରିଥିଲେ। ସେହି ମନ୍ତବ୍ୟରେ ଚାଷୀଙ୍କୁ ‘ଅଯୋଗ୍ୟ’ ବୋଲି କୁହାଯାଇଥିବା ଅଭିଯୋଗ ରହିଥିଲା। ଏହାର ଉତ୍ତର ଦେବା ସମୟରେ ଗାଏକୱାଡ଼ ଚାଷୀ ଆତ୍ମହତ୍ୟା ପ୍ରସଙ୍ଗ ଉଠାଇଥିଲେ। ଚାଷୀ ଆତ୍ମହତ୍ୟା ଭଳି ସମ୍ବେଦନଶୀଳ ପ୍ରସଙ୍ଗରେ ତାଙ୍କର ଏହି ବୟାନକୁ ନେଇ ଆଲୋଚନା ଆରମ୍ଭ ହୋଇଛି। ଗୋଟିଏ ପଟେ ସେ ଚାଷୀଙ୍କୁ ଆତ୍ମହତ୍ୟା ନକରିବା ଏବଂ ପରିବାର କଥା ଚିନ୍ତା କରିବାକୁ କହିଥିବା ବେଳେ ଅନ୍ୟପଟେ ଶେଷକୃତ୍ୟରେ କେହି ଯୋଗ ନଦେବା ଓ ମୃତଦେହକୁ ପଶୁ ଖାଇବା ସମ୍ପର୍କିତ ତାଙ୍କ ମନ୍ତବ୍ୟ ଚର୍ଚ୍ଚାର ବିଷୟ ପାଲଟିଛି।
