ନୂଆଦିଲ୍ଲୀ,୧୦।୯: ଗତ ୫ ବର୍ଷ ଧରି ଅନ୍ତରାଷ୍ଟ୍ରୀୟ କ୍ରିକେଟ ଖେଳି ନାହାନ୍ତି ରବିନ ଉଥପ୍ପା। ହେଲେ ସେ ଘରୋଇ କ୍ରିକେଟରେ ସକ୍ରିୟ ଅଛନ୍ତି। ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ରେ ତାଙ୍କ ନାମରେ ଏକାଧିକ ରେକର୍ଡ ଅଛି। ସେ ୪୦୦୦ରୁ ଅଧିକ ରନ୍ କରିଥିବା ୬ଷ୍ଠ ଭାରତୀୟ। ଏହାଛଡ଼ା ସବୁଠାରୁ ଅଧିକ ଅର୍ଦ୍ଧଶତକ କରିଥିବା ଟପ୍-୧୦ତାଲିକାରେ ତାଙ୍କ ନାମ ରହିଛି। ୨୦୧୪ରୁ ସେ କୋଲକାତା ନାଇଟ୍ ରାଇଡର୍ସ ପାଇଁ ଖେଳି ଆସୁଛନ୍ତି।
୨୦୧୬ ମାର୍ଚ୍ଚ ୩ ତାରିଖରେ ଭାରତର ପୂର୍ବ ଟେନିସ ତାରକା ଶୀତଲ ଗୌତମଙ୍କୁ ବିବାହ କରିଥିଲେ ଉଥପ୍ପା। ୨୦୦୯ରେ ଏକ ବନ୍ଧୁଙ୍କ ଯୋଗୁ ଉଭୟ ପରସ୍ପରକୁ ଭେଟିବା ପରେ ଦୀର୍ଘଦିନ ଧରି ଡେଟ୍ କରୁଥିଲେ। ହେଲେ ଭିନ୍ନ ଧର୍ମର ହୋଇଥିବା ହେତୁ ସେମାନଙ୍କ ବିବାହରେ ଅନେକ ବାଧାବିଘ୍ନ ଆସିଥିଲା। କାରଣ ଉଥପ୍ପା ଖ୍ରିଷ୍ଟିଆନ୍ ଥିବା ବେଳେ ଶୀତଲ ହିନ୍ଦୁ ଥିଲେ। ଉଭୟଙ୍କ ବିବାହ ପାଇଁ ପରିବାରଲୋକେ ରାଜି ହୋଇ ନ ଥିଲେ। ସେତେବେଳକୁ ବିବାହ ପାଇଁ ଉଥପ୍ପା ଶୀତଲଙ୍କୁ ପ୍ରପୋଜ କରିସାରିଥିଲେ।
ପ୍ରଥମେ ଉଥପ୍ପା ପରିବାରଲୋକଙ୍କୁ ରାଜି କରାଇଥିଲେ। ଧିରେ ଧିରେ ଶୀତଲଙ୍କ ପରିବାର ମଧ୍ୟ ବିବାହ ପାଇଁ ରାଜି ହୋଇଥିଲେ। ଶେଷରେ ୨୦୧୬ ମାର୍ଚ୍ଚ ୩ ତାରିଖରେ ଉଭୟ ବିବାହ ବନ୍ଧନରେ ବାନ୍ଧି ହୋଇଥିଲେ। ପ୍ରଥମେ ଇସାଇ ଧର୍ମାନୁଯାୟୀ ସେମାନଙ୍କର ବିବାହ ହୋଇଥିଲା। ଉକ୍ତଦିନ ଅପରାହ୍ନରେ ରିସେପ୍ସନ ରଖାଯାଇଥିଲା। ଏହାର ଏକ ସପ୍ତାହ ଅର୍ଥାତ ମାର୍ଚ୍ଚ ୧୧ରେ ଉଭୟ ହିନ୍ଦୁ ରୀତିନୀତି ଅନୁଯାୟୀ ପୁଣି ଥରେ ବିବାହ କରିଥିଲେ।
