ନୂଆଦିଲ୍ଲୀ, ୨୧।୨: ଆଇପିଏଲ ଅକ୍ଶନ ପୂର୍ବରୁ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)ରେ ସାମିଲ ହୋଇଥିବା ବରିଷ୍ଠ ବ୍ୟାଟ୍ସମ୍ୟାନ ରବିନ ଉଥପ୍ପାଙ୍କ ଏକ ଭିଡିଓ ଟୁଇଟରରେ ଶେୟାର କରାଯାଇଛି। ସିଏସ୍କେ ପକ୍ଷରୁ ଶେୟାର କରାଯାଇଥିବା ଭିଡିଓରେ ଉଥପ୍ପା ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସହ ଆଇପିଏଲ ଜିତିବାକୁ ଚାହାନ୍ତି ବୋଲି କହିଛନ୍ତି।
”ମୋ ଇଚ୍ଛା ପୂରଣ ହୋଇଛି। ୧୨ରୁ ୧୩ ବର୍ଷ ତଳେ ମହେନ୍ଦ୍ର ସିଂ ଧୋନୀଙ୍କ ସହ ମୁଁ ଖେଳିଥିଲି। ଆଇପିଏଲରେ ଧୋନୀଙ୍କ ଅବସର ନେବା ଆଗରୁ ମୁଁ ତାଙ୍କ ସହ ଟୁର୍ନାମେଣ୍ଟ ଖେଳିବାକୁ ଓ ଜିତିବାକୁ ଚାହେଁ “ ବୋଲି ଉକ୍ତ ଭିଡିଓରେ ଉଥପ୍ପା କହିଛନ୍ତି। ଉଲ୍ଲେଖଥାଉ କି, ୨୦୦୭ରେ ଅନୁଷ୍ଠିତ ପ୍ରଥମ ଟି୨୦ ବିଶ୍ୱକପ୍ରେ ଧୋନୀଙ୍କ ନେତୃତ୍ୱରେ ଚାମ୍ପିୟନ ହୋଇଥିବା ଭାରତୀୟ ଦଳର ସଦସ୍ୟ ଥିଲେ ଉଥପ୍ପା। ସେ ଗତ ଆଇପିଏଲରେ ରଜାସ୍ଥାନ ରୟାଲ୍ସ ପାଇଁ ଖେଳିଥିଲେ। ଆଇପିଏଲ କ୍ୟାରିୟରରେ ୧୮୯ ମ୍ୟାଚ୍ ଖେଳିଥିବା ଉଥପ୍ପା ୧୩୦ ଷ୍ଟ୍ରାଇକ ରେଟ୍ରେ ୪,୬୦୭ ରନ୍ କରିଛନ୍ତି।
