ବଡ଼ବିଲ,୨୫ା୧(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ପୋଲିସ ଏକ ଡକାୟତି ଯୋଜନାକୁ ପଣ୍ଡ କରିବା ସହ ୪ ଅଭିଯୁକ୍ତଙ୍କୁ ଗିରଫ କରିଛି। ଏଥିସହ ଘଟଣାସ୍ଥଳରୁ ଏକ ଦେଶୀ ପିସ୍ତଲ, ଦୁଇ ରାଉଣ୍ଡ ଗୁଳି, ଦୁଇଟି ଛୁରି, ଲଙ୍କା ଗୁଣ୍ଡ ପାଉଚ ଓ ୬ଟି ବାଇକ୍ ଜବତ କରିଥିବା ଜଣାପଡ଼ିଛି। ଗିରଫ ଅଭିଯୁକ୍ତମାନେ ହେଲେ ବଲାଣୀ ଥାନା ଅନ୍ତର୍ଗତ ଚମ୍ପୁଆବସ୍ତି ଅଞ୍ଚଳର ନବୀନ ମହାକୁଡ଼, ବଡ଼ବିଲ କଳିଙ୍ଗ ନ୍ୟୁ କଲୋନୀ ଅଞ୍ଚଳର ଆକାଶ କାରୁଆ, ଦାମୁ ହଟିଂ ଅଞ୍ଚଳର ରାଜା ଓରଫ୍ ରାଜେନ୍ଦ୍ର ମହାକୁଡ଼ ଏବଂ ପିଏଚ୍ଡି ମାଗାଜିନ ହଟିଂ ଅଞ୍ଚଳର ପଟା ଓରଫ୍ ମନୋଜ ମୁଣ୍ଡା। ଏହି ଘଟଣାରେ ସଂପୃକ୍ତ ଅନ୍ୟ ଦୁଇ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ମଙ୍ଗଳବାର ବିଳମ୍ବିତ ରାତିରେ ବଡ଼ବିଲ ରାଜୀବ ବିହାର ନିକଟସ୍ଥ ପଡ଼ିଆରେ ସନ୍ଦିଗ୍ଧମାନେ ଏକତ୍ରିତ ହୋଇଥିବା ପୋଲିସକୁ ଖବର ମିଳିଥିଲା। ପୋଲିସର ପାଟ୍ରୋଲିଂ ଟିମ୍ ଘଟଣାସ୍ଥଳରେ ପହଞ୍ଚି ଅତର୍କିତ ଚଢ଼ାଉ କରିଥିଲା। ଫଳରେ ୪ ସନ୍ଦିଗ୍ଧ ଅଭିଯୁକ୍ତଙ୍କୁ କାବୁ କରିବାକୁ ପୋଲିସ ସକ୍ଷମ ହୋଇଥିଲାବେଳେ ଆଉ ଦୁଇ ଅଭିଯୁକ୍ତ ଫେରାର ହୋଇଯାଇଥିଲେ। ତେବେ ପୋଲିସ ଘଟଣାସ୍ଥଳରୁ ଏକ ଦେଶୀ ପିସ୍ତଲ, ଦୁଇ ରାଉଣ୍ଡ ଜୀବନ୍ତ ଗୁଳି, ଦୁଇଟି ଛୁରି, ୪ଟି ଲଙ୍କା ଗୁଣ୍ଡ ପାଉଚ ଓ ୬ଟି ବାଇକ୍ ଜବତ କରିବା ସହ ସଂପୃକ୍ତ ୪ ଅଭିଯୁକ୍ତଙ୍କୁ ଗିରଫ କରିଥିଲା। ପଚରା ଉଚରାରୁ ଅଭିଯୁକ୍ତମାନେ ବଡ଼ବିଲ ଅଞ୍ଚଳରେ ଡକାୟତି ନେଇ ଯୋଜନା କରୁଥିଲେ ବୋଲି ପୋଲିସ କହିଛି। ଏ ନେଇ ବଡ଼ବିଲ ଥାନା କେସ୍ ନଂ ୨୬/୨୩ରେ ଏକ ମାମଲା ରୁଜୁ କରାଯାଇଛି ବୋଲି ବଡ଼ବିଲ ଥାନା ଆଇଆଇସି ରାଜେନ୍ଦ୍ର ସ୍ବାଇଁ ସୁଚନା ଦେଇଛନ୍ତି। ସେ କହିଛନ୍ତି, ଖୁବ୍ଶୀଘ୍ର ଫେରାର ଥିବା ୨ ଅଭିଯୁକ୍ତଙ୍କୁ ଗିରଫ କରାଯିବ। ଅଭିଯୁକ୍ତ ୪ ଜଣଙ୍କୁ ସନ୍ଧ୍ୟାରେ କୋର୍ଟ ଚାଲାଣ କରାଯିବ ବୋଲି ପୋଲିସ କହିଛି।
