ଭଦ୍ରକ,୧୧।୨(ସନାତନ ରାଉତ): ଅପେରା ଚାଲୁଥିବାବେଳେ ଘରେ ପଶି ଲୁଟ। ଧରାପଡି ନିର୍ଧୁମ ଛେଚା ଖାଇବା ପରେ ପୋଲିସକୁ ୪ ଯୁବକଙ୍କୁ ହସ୍ତାନ୍ତର କଲେ ଗ୍ରାମବାସୀ l ଏପରି ଘଟଣା ଘଟିଛି ଭଦ୍ରକ ଜିଲା ଅଗରପଡା ଥାନାରେ ଆଡିଆ ଗ୍ରାମରେ l ମଙ୍ଗଳବାର ରାତିରେ ଗାଁ ମୁଣ୍ଡରେ ତୁଳସୀ ଗଣନାଟ୍ୟ ଶେଷ ରାତି ଯାତ୍ରା କରୁଥିଲା l
ଯାତ୍ରା କ୍ୟାମ୍ପ ନିକଟରେ ଗ୍ରାମର ନିରଞ୍ଜନ ମଲ୍ଲିକଙ୍କ ଘର l ନିରଞ୍ଜନଙ୍କ ପୁଅ ଆଶୁତୋଷ ରାତି ୧୨ ଟାରେ ଘର ଆଡେ ବୁଲି ଯାଇଥିଲାବେଳେ ତାଙ୍କ ଘର ଭିତରୁ ୨ ଜଣ ଲୁଟେରା ବାହାରି ଦୌଡ଼ି ପଳାଇଥିଲେ l ଖସି ଯାଉଥିବା ବେଳେ ଜଣକୁ କାବୁ କରିନେଇଥିଲେ ଆଶୁତୋଷ l ଲୁଟେରା ଜଣକ ଏକ ସ୍କୃ ଡ୍ରାଇଭରରେ ଆଶୁତୋଷଙ୍କ ବେକକୁ ଆକ୍ରମଣ କରିଥିଲା। ଗୁରୁତର ଆହତ ହୋଇଥିଲେ ମଧ୍ୟ ଲୁଟେରାକୁ ଛାଡି ନ ଥିଲେ l ପରେ ଗ୍ରାମବାସୀ ପହଞ୍ଚି ଉକ୍ତ ଲୁଟେରାକୁ ମାଡ ମାରି ଘର ଭିତରେ ଅଟକ ରଖିଥିଲେ l ଲୁଟେରା ଯୁବକ ତାଙ୍କ ଘର ଧାମନଗର ଚିଲପଦୀ ବୋଲି ପୋଲିସ ଆଗରେ କହିଛି l ଚୋରିରେ ସମ୍ପୃକ୍ତ ଥିବା ସନ୍ଦେହରେ ଅନ୍ୟ ୩ ଜଣ ଯୁବକଙ୍କୁ ମଧ୍ୟ ଅଟକ ରଖାଯାଇଥିଲା। ଅଗରପଡା ପୋଲିସ ପହଞ୍ଚି ମୋଟ ୪ ଜଣଙ୍କୁ ଥାନାକୁ ନେଇଛି l ନିରଞ୍ଜନଙ୍କ ଘର ଅଲିମିରା ଲକର ଭାଙ୍ଗି ୧୫ ଲକ୍ଷରୁ ଉର୍ଦ୍ଧ୍ୱ ସୁନା ରୁପା ଅଳଙ୍କାର ସହ ନଗଦ ଦେଢ଼ ଲକ୍ଷ ଟଙ୍କା ଲୁଟି ନେଇଛନ୍ତି ବୋଲି କହିଛନ୍ତି ଆଶୁତୋଷ l ପୋଲିସ ଘଟଣାର ତଦନ୍ତ ଆରମ୍ଭ କରିଛି l
Dharitri – Odisha’s No.1 Odia Daily
