ଦାରିଙ୍ଗବାଡି, ୨୨।୭ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା ଅଞ୍ଚଳରେ ଗୋଟିଏ ରାତିରେ ଏକାଧିକ ଚୋରି ହୋଇଥିବା ଥାନାରେ ଅଭିଯୋଗ ହୋଇଛି। ଦାରିଙ୍ଗବାଡି ବଜାର ଉପରେ ରହିଥିବା ପ୍ରଶାନ୍ତ ମହାପାତ୍ରଙ୍କ ତାରିଣୀ ଜୁଏଲର୍ସରୁ ଲକ୍ଷାଧିକ ଟଙ୍କାର ସୁନା, ରୁପା ଚୋରି ହୋଇଛି। ଜୁଏଲର୍ସ ମାଲିକ ପ୍ରଶାନ୍ତ ଅନୁପସ୍ଥିତି ରହିଥିବାର ସୁଯୋଗ ନେଇ ଦୁର୍ବୁତ୍ତ ଲୁଟ୍ କରିଥିବା କୁହାଯାଉଛି। ପ୍ରଶାନ୍ତଙ୍କ ପରିବାର ପକ୍ଷରୁ ଦାରିଙ୍ଗବାଡି ଥାନାରେ ଜଣାଇବା ପରେ ଆଇଆଇସି ସଂଗ୍ରାମ କେଶରୀ ଜେନାଙ୍କ ନିର୍ଦ୍ଦେଶକ୍ରମେ ଏଏସଆଇ ଅର୍ଜୁନ ଶବର ଜୁଏଲର୍ସରେ ପହଞ୍ଚି ତାର ଆଖପାଖ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିବା ସହ ତଦନ୍ତ ଚଳାଇଛନ୍ତି। ସେହିପରି ଘରେ ମାଲିକ ଅନୁପସ୍ଥିତି ଥିବା ସମୟରେ ଦୁର୍ବୁତ୍ତ ଘର ଗ୍ରିଲର ତାଲା କାଟି ଚୋରି କରିଥିବା ଦାରିଙ୍ଗବାଡି ଥାନାରେ ଅଭିଯୋଗ ହୋଇଛି।
ପ୍ରକାଶ ଯେ, ଉକ୍ତ ଥାନା ଜାଗୃତି କାର୍ଯ୍ୟାଳୟ ସମ୍ମୁଖରେ ଘରଭଡା ସୂତ୍ରରେ ରହୁଥିବା ସଦାନନ୍ଦ ସିଂଙ୍କ ଘରୁ ମଙ୍ଗଳବାର ବିଳମ୍ବିତ ରାତ୍ରିରେ ଚୋରି ହୋଇଛି। ସେ ରାଜ୍ୟ ବାହାର ଛତିଶଗଡ଼କୁ କୌଣସି କାର୍ଯ୍ୟରେ ଯାଇଥିବା ବେଳେ ତାଙ୍କ ଘରର ଗ୍ରିଲରେ ପଡିଥିବା ତାଲା ଓ ଗ୍ରିଲ ପରେ ରହିଥିବା କବାଟର ତାଲା କଟାଯିବା ପରେ ଘର ଭିତରେ ରହିଥିବା ଆଲମିରାକୁ ଭାଙ୍ଗି ତା ଭିତରେ ରହିଥିବା ୨ ଟି ସୁନା ହାର, ୨ଟି ମୁଦି ଓ କାନ ଫୁଲ ସମେତ ଅନ୍ୟାନ୍ୟ ସାମଗ୍ରୀ ଚୋରୀ ଯାଇଥିବା ସଦାନନ୍ଦ କହିଛନ୍ତି। ସେ ଯେଉଁ ଘର ମାଲିକଙ୍କ ଘର ଭଡାସୁତ୍ରରେ ନେଇଛନ୍ତି ସେ ତାଲା କଟାଯାଇଥିବା ସମ୍ପର୍କରେ ସଦାନନ୍ଦଙ୍କୁ ଫୋନରେ ଜଣାଇଥିଲେ। ସଦାନନ୍ଦଙ୍କ କହିବା ପ୍ରକାରେ ଘର ମାଲିକ ଏନେଇ ଥାନାରେ ଅଭିଯୋଗ କରିଛନ୍ତି। ଖବର ଲେଖିବା ସୁଦ୍ଧା ପୋଲିସ ଘଟଣାକୁ ଗୁରୁତର ଭାବେ ଗ୍ରହଣ କରିବା ସହ ତଦନ୍ତ ଚଳାଇଛି।
ପୋଲିସ ସଦାନନ୍ଦ କହିଛନ୍ତି,ସେ ପୋଲିସ ସହ ଯୋଗାଯୋଗ ରହିଥିବାବେଳେ ପୋଲିସ ଶୀଘ୍ର ଦୁର୍ବୁତ୍ତଙ୍କୁ ଧରିବାକୁ ଆକ୍ସନ ମୋଡ଼ରେ ରହିଥିବା ସଦାନନ୍ଦଙ୍କୁ ପୋଲିସ ପ୍ରତିଶ୍ରୁତି ଦେଇଥିବା କହିଛନ୍ତି। ଦାରିଙ୍ଗବାଡିରେ ଗୋଟିଏ ରାତିରେ ଏକାଧିକ ଚୋରି ଏବଂ ଘର ମାଲିକ ଅନୁପସ୍ଥିତିର ସୁଯୋଗ ନେଇ ଟାର୍ଗେଟ କରି ଲୁଟ କରାଯାଇଥିବା ଚର୍ଚ୍ଚା ହେଉଛି। ଘଟଣାକୁ ନେଇ ଅଞ୍ଚକରେ ଆତଙ୍କ ସୃଷ୍ଟି ହୋଇଛି। ରାତ୍ରିକାଳୀନ ପାଟ୍ରୋଲିଂକୁ କଡାକଡି କରାଯିବାକୁ ସ୍ଥାନୀୟ ଲୋକ ଦାବି କରିଛନ୍ତି।
Dharitri – Odisha’s No.1 Odia Daily
