ଚମ୍ପୁଆ,୨୧।୧୦(ଡି.ଏନ୍.ଏ): ଅନୁଷ୍ଠାନ ହେଉ କି ନୂତନ ଦୋକାନ ଶୁଭାରମ୍ଭ ପୂର୍ବରୁ ପ୍ରଚାରକୁ ଗୁରୁତ୍ୱ ଦିଅନ୍ତି। ଏଥିପାଇଁ ବଡ଼ବଡ଼ ହୋର୍ଡିଂଠାରୁ ଆରମ୍ଭ କରି ଲିଫ୍ଲେଟ୍ ମାଧ୍ୟମରେ ପ୍ରଚାର କରାଯାଉଛି। କିଛି ବ୍ୟବସାୟୀ, ଶିକ୍ଷା ପ୍ରତିଷ୍ଠାନ ରାସ୍ତାକଡ଼ରେ ଥିବା ବଡ଼ ବଡ଼ ଗଛକୁ ପ୍ରଚାରର ମାଧ୍ୟମ କରିଛନ୍ତି। ଫଳରେ ବୃକ୍ଷଗୁଡ଼ିକର ପ୍ରଭୂତ କ୍ଷତି ହେଉଥିବା ଦେଖିବାକୁ ମିଳିଛି। ଏ ନେଇ ପ୍ରକୃତିବନ୍ଧୁ ପୁରସ୍କାର ପ୍ରାପ୍ତ ବ୍ୟକ୍ତିବିଶେଷ ଉଦ୍ବେଗ ପ୍ରକାଶ କରିଛନ୍ତି। ଖବର ଅନୁସାରେ ଚମ୍ପୁଆ ଏନ୍ଏସିରେ ସାମ୍ପ୍ରତିକ ପରିସ୍ଥିତିରେ ଖୋଲାଯାଉଥିବା ନୂତନ ଦୋକାନ, ଅନୁଷ୍ଠାନ ଆଦିର ସୂଚନା ଲୋକଙ୍କ ପାଖରେ ପହଞ୍ଚାଇବା ପାଇଁ ରାସ୍ତାକଡ଼ରେ ଥିବା ବହୁ ପୁରୁଣା ଗଛରେ କଣ୍ଟା ବାଡ଼େଇ ପ୍ରଚାରପତ୍ର ମରାଯାଉଛି। ପ୍ରଚାରପତ୍ର କିଛି ଦିନ ରହି ଅବଶ୍ୟ ନଷ୍ଟ ହୋଇଯାଉଛି। ମାତ୍ର ଗଛରେ ମରାଯାଇଥିବା ଲୁହା କଣ୍ଟା ଗଛର ଆୟୁଷ କମାଇବା ସହିତ ଉକ୍ତ ସ୍ଥାନରେ ଗର୍ତ୍ତମାନ ସୃଷ୍ଟି ହେଉଛି। ଏ ନେଇ ବନ ବିଭାଗ ଉକ୍ତ ଅନୁଷ୍ଠାନ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରକୁତିବନ୍ଧୁମାନେ ଦାବି କରିଛନ୍ତି।
