ନୂଆପଡ଼ା,୧୪ା୭ (ମକାରୁ ବେମାଲ):ନୂଆପଡ଼ା ଜିଲା କୋମନା ବ୍ଲକ ଦର୍ଲିପଡା ପଞ୍ଚାୟତ ହାତୀସରା ଗଁା ଧାମନଡୋଙ୍ଗିଆ ପଡା ରାସ୍ତା ପୋଲ ବର୍ଷାପାଣିରେ ଧୋଇଯାଇ ଯାତାୟାତରେ ବାଧକ ସାଜିଛି। ସୂଚନା ଅନୁଯାୟୀ, ହାତୀସରା ଗଁାଠାରୁ ଏହି ରାସ୍ତା ଲରିଆପଡା ଦେଇ ଧାମନଡୋଙ୍ଗିଆ ପଡାକୁ ସଂଯୋଗ କରୁଛି। ଏହି ରାସ୍ତାରେ ଅନେକ ପୋଲ ରହିଛି। ମରାମତି ଅଭାବରୁ ପୋଲ ଭିତରେ ଅଳିଆ ଅବର୍ଜନା ଭର୍ତ୍ତି ହୋଇଯାଇଥିଲା। ଲଘୁଚାପଜନିତ ଲଗାଣ ବର୍ଷାରେ ପୋଲ ଭିତରେ ପାଣି ଯାଇ ନ ପାରି ଉପର ମାଟି ଧୋଇ ହୋଇ ବଡ ଘାଇ ସୃଷ୍ଟି ହୋଇଛି। ଫଳରେ ଯାତାୟାତ ବେଳେ ଲୋକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ବିଶେଷ କରି ଅଙ୍ଗନୱାଡି କେନ୍ଦ୍ର ଓ ପ୍ରାଥମିକ ବିଦ୍ୟାଳୟରେ ପଢୁଥିବା ପିଲାଙ୍କ ଯିବାଆସିବା ବନ୍ଦ ହୋଇଯାଇଛି। ପଡାର କେତେଜଣ ଯୁବକ ଜେସିବି ଲଗାଇ ଘାଇର ଉଭୟ ପାର୍ଶ୍ୱକୁ ମାଟି ପୋତିଥିଲେ ମଧ୍ୟ ଯାତାୟାତ କରି ହେଉନାହିଁ। ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟିଦେଇ ରାସ୍ତା ମରାମତି କରିବା ପାଇଁ ଗ୍ରାମବାସୀ ଦାବି କରିଛନ୍ତି।
Dharitri – Odisha’s No.1 Odia Daily
