ଭୁବନେଶ୍ବର,୮ା୧୦(ବ୍ୟୁରୋ): ରାଜ୍ୟରେ ସଡ଼କ ଦୁର୍ଘଟଣା ଏବଂ ଏଥିଜନିତ ମୃତ୍ୟୁସଂଖ୍ୟା ହ୍ରାସ ପାଇବାର ନଁା ଧରୁନାହିଁ। ୨୦୨୧ ଜାନୁୟାରୀରୁ ଜୁଲାଇ ମଧ୍ୟରେ ଘଟିଥିବା ଦୁର୍ଘଟଣା ଏବଂ ମୃତ୍ୟୁ ସଂଖ୍ୟା ଦେଖିଲେ ସବୁଥିରେ ବୃଦ୍ଧି ଘଟିଛି। ସୁପ୍ରିମକୋର୍ଟ କମିଟିର ବାରମ୍ବାର ତାଗିଦ ଏବଂ ଯୋଜନା ସତ୍ତ୍ୱେ କିଛି ସୁଫଳ ମିଳୁନାହିଁ। ୨୦୨୧ ଜାନୁୟାରୀରେ ରାଜ୍ୟରେ ୧୧୦୪ ଦୁର୍ଘଟଣା ପଞ୍ଜୀକୃତ ହୋଇଥିବାବେଳେ ଏଥିଯୋଗୁ ୪୯୨ ଜଣଙ୍କ ମୃତ୍ୟୁ ଘଟିଛି। ୨୦୨୧ ଫେବୃୟାରୀରେ ୧୦୨୭ ଦୁର୍ଘଟଣା ଏବଂ ୪୬୬ ମୃତ୍ୟୁ, ମାର୍ଚ୍ଚରେ ୧୦୯୯ ଦୁର୍ଘଟଣା ଏବଂ ୫୧୨ ଜଣଙ୍କ ମୃତ୍ୟୁ, ଏପ୍ରିଲରେ ୮୭୦ ଦୁର୍ଘଟଣାରେ ୪୦୪ ଜଣଙ୍କ ମୃତ୍ୟୁ, ମେ ମାସରେ ୬୩୫ ଦୁର୍ଘଟଣା ଏବଂ ୨୯୫ ଜଣଙ୍କ ମୃତ୍ୟୁ, ଜୁନ୍ରେ ୮୨୬ ଦୁର୍ଘଟଣା ଏବଂ ୩୮୬ ଜଣଙ୍କ ମୃତ୍ୟୁ ହୋଇଛି। ସେହିପରି ଜୁଲାଇରେ ୮୪୮ ଦୁର୍ଘଟଣା ଏବଂ ୩୯୯ ଜଣଙ୍କ ମୃତ୍ୟୁ ଘଟିଛି। ଏହି ୭ ମାସରେ ୬,୪୦୯ ଦୁର୍ଘଟଣା ରାଜ୍ୟ ପରିବହନ କର୍ତ୍ତୃପକ୍ଷ (ଏସ୍ଟିଓ) ପକ୍ଷରୁ ପଞ୍ଜୀକୃତ କରାଯାଇଥିବାବେଳେ ଏଥିରେ ୨୯୫୪ ଜଣଙ୍କ ମୃତ୍ୟୁ ଘଟିଛି। ସେ ୨୦୨୨ରେ ଏହି ୭ ମାସକୁ ତୁଳନା କଲେ ମୋଟ ୬,୯୨୮ ଦୁର୍ଘଟଣା ଘଟିଥିବାବେଳେ ୩,୨୩୨ ଜଣଙ୍କ ମୃତ୍ୟୁ ଘଟିଛି। ଉଭୟ ବର୍ଷର ସମାନ ସମୟକୁ ତୁଳନା କଲେ ଦୁର୍ଘଟଣା ୮.୧ ପ୍ରତିଶତ ବୃଦ୍ଧି ଘଟିଥିବା ବେଳେ ମୃତ୍ୟୁହାର ୯.୪୧% ବଢ଼ିଛି।
ଏହି ତଥ୍ୟକୁ ନେଇ ଅତିରିକ୍ତ ପରିବହନ କମିଶନର ଲାଲମୋହନ ସେଠୀ କହିଛନ୍ତି, ୨୦୨୨ର ଏପ୍ରିଲରୁ ଜୁନ୍ ସହିତ ୨୦୨୧ର ଏହି ସମୟ ସହିତ ତୁଳନା କରିବାପରେ ଜଣାପଡିଛି ଗତବର୍ଷ ତୁଳନାରେ ଏଥର ଦୁର୍ଘଟଣା ଏବଂ ମୃତ୍ୟୁହାର ବହୁ ବଢ଼ିଥିଲା। କୋଭିଡ୍ ଯୋଗୁ ଗତବର୍ଷ ଗାଡ଼ି ଚଳାଚଳ ନ ଥିବାରୁ ଏବର୍ଷ ଏହି ସମୟ ତୁଳନାରେ ଦୁର୍ଘଟଣା ଏବଂ ମୃତ୍ୟୁହାର ବହୁ ମାତ୍ରାରେ ବଢ଼ିଛି। ସେ ଆହୁରି କହିଛନ୍ତି, ୨୦୨୧-୨୨ ମଧ୍ୟରେ ସମୁଦାୟ ୨,୪୭,୯୪୫ ଇ-ଚାଲାଣ ଜାରି କରାଯାଇଛି। ଦୁର୍ଘଟଣା କମାଇବାକୁ ରାଜ୍ୟ ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଥିବା ବେଳେ ରାଜ୍ୟରେ ଏନ୍ଏଚ୍ ଏବଂ ଏସ୍ଏଚ୍ର ୩୦୫୯ କି.ମି.ର ଅଡିଟ୍ ସମାପ୍ତ ହୋଇସାରିଛି। ଆବଶ୍ୟକ ସଂଶୋଧନ ଲାଗି ହିତାଧିକାରୀଙ୍କ ନିକଟରେ ରିପୋର୍ଟ ଦାଖଲ କରାଯାଇଛି। ଆଗକୁ ଅତିରିକ୍ତ ୫ ହଜାର କିଲୋମିଟର ସଡ଼କ ଅଡିଟ୍ ପାଇଁ ପ୍ରସ୍ତାବ ଦିଆଯାଇଛି। ଖୁବ୍ଶୀଘ୍ର ସୁନ୍ଦରଗଡ଼ ଜିଲାରେ କମାଣ୍ଡ ଏବଂ କଣ୍ଟ୍ରୋଲ ସେଣ୍ଟର କାର୍ଯ୍ୟକ୍ଷମ ହେବ। ଟ୍ରାଫିକ ଉଲ୍ଲଂଘକାରୀଙ୍କ ପାଇଁ ଏହି ଜିଲାରେ ଇ-ଚାଲାଣ ଜାରି କରିବାକୁ ସିସିଟିଭି ଫୁଟେଜ ଉପରେ ନଜର ରଖାଯିବ।
