ନୂଆଦିଲ୍ଲୀ,୧୬।୪: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ର ଗୁରୁବାର ଅନୁଷ୍ଠିତ ମ୍ୟାଚ୍ରେ ରାଜସ୍ଥାନ ରୟାଲ୍ସ ରୋମାଞ୍ଚକ ବିଜୟ ହାସଲ କରିଛି। ସଞ୍ଜୁ ସାମସନଙ୍କ ଦଳ ଦିଲ୍ଲୀ କ୍ୟାପିଟାଲ୍ସକୁ ୩ ଉଇକେଟରେ ପରାସ୍ତ କରିଛି। ଅପରପକ୍ଷେ ଚଳିତ ଆଇପିଏଲ୍ରେ ୨ ମ୍ୟାଚ୍ରୁ ରାଜସ୍ଥାନର ଏହା ପ୍ରଥମ ବିଜୟ ହୋଇଥିବା ବେଳେ ଦିଲ୍ଲୀର ପ୍ରଥମ ପରାଜୟ। ନୂଆ ଅଧିନାୟକ ସାଜିଥିବା ରିଷଭ ପନ୍ତ ଏହାକୁ ନେଇ ପ୍ରତିକ୍ରିୟା ରଖି କହିଛନ୍ତି, ବୋଲର୍ମାନେ ପ୍ରଥମରୁ ପ୍ରଭାବି ବୋଲିଂ କରିଥିଲେ। ହେଲେ ଶେଷଆଡ଼କୁ ରାଜସ୍ଥାନର ବ୍ୟାଟ୍ସମ୍ୟାନଙ୍କୁ ଖେଳିବାକୁ ସୁଯୋଗ ଦେଇଥିଲୁ। ଏବେ ଲାଗୁଛି ଆମେ ଆହୁରି ଭଲ ବୋଲିଂ କରିପାରିଥାନ୍ତୁ। ତେବେ କାକର ଯୋଗୁ ସେମାନଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଲା ବୋଲି ସେ କହିଛନ୍ତି।
କାକର ଅଧିକ ଥିଲା। ଏହାଛଡ଼ା ଆମେ ୧୫ରୁ ୨୦ ରନ୍ କମ୍ କରିଥିଲୁ। ହେଲେ ଏହି ମ୍ୟାଚ୍ର କିଛି ସକରାତ୍ମକ ଦିଗ ଥିଲା। ବୋଲରମାନେ ଭଲ ଆରମ୍ଭ କରିଥିଲେ। ଆଶା କରୁଛୁ ଭବିଷ୍ୟତରେ ଆମେ ବିଜେତା ହେବୁ ବୋଲି ପନ୍ତ କହିଛନ୍ତି।
ଟସ୍ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା ରାଜସ୍ଥାନ ଟିମ୍। ଦିଲ୍ଲୀ ବ୍ୟାଟିଂ କରି ୨୦ ଓଭରରେ ୮ ଉଇକେଟ ହରାଇ ୧୪୭ରନ୍ କରିଥିଲା। ଜବାବରେ ରାଜସ୍ଥାନ ଟିମ୍ ୧୯.୪ ଓଭରରେ ୭ ଉଇକେଟ ହରାଇ ୧୫୦ରନ୍ ସଂଗ୍ରହ କରି ନେଇଥିଲା।
