ନୂଆଦିଲ୍ଲୀ,୨୭।୧: ଅଷ୍ଟ୍ରେଲିଆର ମହାନ କ୍ରିକେଟର ରିକି ପଣ୍ଟିଂ ଭାରତୀୟ ମିଡିଲ୍ ଅର୍ଡର ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର ଯାଦବଙ୍କୁ ନେଇ ବଡ଼ ଭବିଷ୍ୟବାଣୀ କରିଛନ୍ତି। ବର୍ତ୍ତମାନ ସମୟରେ କୌଶଳ ତଥା ଅଭିନବତା ଦୃଷ୍ଟିରୁ କ୍ରିକେଟରେ ସୂର୍ଯ୍ୟକୁମାରଙ୍କଠାରୁ ଭଲ ଖେଳାଳିଙ୍କୁ ଦେଖି ନ ଥିବା ପଣ୍ଟିଂ କହିଛନ୍ତି। ଏହାଛଡ଼ା ସୂର୍ଯ୍ୟକୁମାର ଯାହା ବି କରିବେ, ଆଗାମୀ ଦିନରେ ଅନେକ ଖେଳାଳି ତାଙ୍କୁ ଅନୁକରଣ କରିବାକୁ ଚେଷ୍ଟା କରିବେ। ଏହାଦ୍ୱାରା ସମଗ୍ର ବିଶ୍ୱରେ ଟି୨୦ ଫର୍ମାଟରେ ବ୍ୟାଟିଂ କୌଶଳର ଏକ ଭିନ୍ନ ସ୍ତର ଦେଖିବାକୁ ମିଳିବ ବୋଲି ସେ କହିଛନ୍ତି।
ଆଇସିସି ସହ କଥାବାର୍ତ୍ତାରେ ପଣ୍ଟିଂ କହିଛନ୍ତି, ସୂର୍ଯ୍ୟକୁମାର ଟି୨୦ ଫର୍ମାଟର ଜଣେ ଅଭିନବ କ୍ରିକେଟର। ତାଙ୍କ ବ୍ୟାଟିଂ ଦକ୍ଷିଣ ଆଫ୍ରିକା ଧଳା ବଲ୍ ବିଶେଷଜ୍ଞ ଏବି ଡି ଭିଲିୟର୍ସ ଏବଂ ଅଷ୍ଟ୍ରେଲିଆର ପୂର୍ବତନ ଉଇକେଟକିପର ଆଡାମ ଗିଲକ୍ରିଷ୍ଟଙ୍କ ସହ ସମାନ। ସେ ଏବେ ଅନ୍ୟ ଖେଳାଳିଙ୍କ ଅପେକ୍ଷା ଭଲ ପ୍ରଦର୍ଶନ କରୁଛନ୍ତି। ମଇଦାନର ଚାରିପଟୁ(୩୬୦ଂ) ବ୍ୟାଟିଂ କରିବାରେ ସେ ମାହିର ବୋଲି ମଧ୍ୟ ସେ କହିଛନ୍ତି।
