ପ୍ରାଗ,୬।୫(ପି.ଟି.): ପୂର୍ବତନ ତାରକା ଡବଲ୍ସ ଖେଳାଳି ତଥା ଓ୍ବିମ୍ବେଲଡନ ସିଙ୍ଗଲ୍ସ ସେମିଫାଇନାଲିଷ୍ଟ ଚେକ ଗଣରାଜ୍ୟର ବାର୍ବରା ଷ୍ଟ୍ରାଇକୋଭା ବୁଧବାର ଟେନିସରୁ ଅବସର ଘୋଷଣା କରିଛନ୍ତି। ୩୫ ବର୍ଷୀୟା ଷ୍ଟ୍ରାଇକୋଭା ପୂର୍ବରୁ ଗର୍ଭଧାରଣ କରିବା ନେଇ ସୂଚନା ଦେଇଥିଲେ। ମା’ ହେବା ପରେ ସେ ଟେନିସ୍କୁ ଫେରିବା ନେଇ ତାଙ୍କର କୌଣସି ଯୋଜନା ନାହିଁ ବୋଲି ସ୍ପଷ୍ଟ କରିଥିଲେ।
କରୋନା ମହାମାରୀର ପ୍ରକୋପ ଜାରି ରହିଥିବା ବେଳେ ଅବସର ନେବି ବୋଲି କୌଣସି ଯୋଜନା କରି ନ ଥିଲି। ତେବେ ଶେଷରେ ଏହି ନିଷ୍ପତ୍ତି ନେବାକୁ ହେଲା। ମା’ ହେବାକୁ ଅପେକ୍ଷା କରିଛି ଓ ମା’ ହେବା ପରର ଜୀବନ ନେଇ ବେଶ୍ ଉତ୍ସୁକତାର ସହ ଅପେକ୍ଷା କରିଛି ବୋଲି ସେ କହିଛନ୍ତି। ଷ୍ଟ୍ରାଇକୋଭା ତାଙ୍କ କ୍ୟାରିୟରରେ ୨ଟି ଡବ୍ଲ୍ୟୁଟିଏ ସିଙ୍ଗଲ୍ସ ଟାଇଟଲ ହାସଲ କରିଥିଲେ। ସେହିପରି ସେ ୩୧ଟି ଡବଲ୍ସ ଟାଇଟଲ ମଧ୍ୟ ଜିତିଥିଲେ। ୨୦୧୯ ଓ୍ବିମ୍ବେଲଡନରେ ତାଙ୍କ କ୍ୟାରିୟର ସଫଳତାର ଶୀର୍ଷକୁ ଛୁଇଁଥିଲା। ସିଏ ସୁ- ଓ୍ବେଇଙ୍କ ସହ ସେ ଓ୍ବିମ୍ବେଲଡନ ମହିଳା ଡବଲ୍ସ ଟାଇଟଲ ଜିତିଥିଲେ ଓ ୧ ନମ୍ବର ସ୍ଥାନ ହାସଲ କରିଥିଲେ। ସେହିପରି ଓ୍ବିମ୍ବେଲଡନ ସିଙ୍ଗଲ୍ସ ଇଭେଣ୍ଟରେ ସେ ସେମିଫାଇନାଲରେ ପ୍ରବେଶ କରିଥିଲେ ମଧ୍ୟ ଆମେରିକାର ସେରେନା ଓ୍ବିଲିୟମ୍ସଙ୍କଠାରୁ ପରାସ୍ତ ହୋଇଥିଲେ। ସିଙ୍ଗଲ୍ସରେ ୧୬ ନମ୍ବର ସ୍ଥାନ ତାଙ୍କ କ୍ୟାରିୟର ଶ୍ରେଷ୍ଠ। ୨୦୧୬ ରିଓ ଅଲିମ୍ପିକ୍ସରେ ସେ ଲୁସି ସାଫାରୋଭାଙ୍କ ସହ ସାଥି ହୋଇ ଡବଲ୍ସରେ ବ୍ରୋଞ୍ଜ୍ ପଦକ ଜିତିଥିଲେ।
ଗତ ଜାନୁୟାରୀରେ ଅଷ୍ଟ୍ରେଲିଆନ ଓପନ୍ ଖେଳି ଶେଷଥର ପାଇଁ କୌଣସି ଟେନିସ ମ୍ୟାଚ୍ ଖେଳିଥିଲେ। ଟେନିସ୍କୁ ଭଲ ପାଏ ଓ ସବୁବେଳେ ଶ୍ରେଷ୍ଠ ପ୍ରଦର୍ଶନ କରିବାକୁ ପ୍ରୟାସ କରିଆସିଛି। ବର୍ତ୍ତମାନ ପର୍ଯ୍ୟନ୍ତ ଟେନିସ ଛଡା କିଛି ଜାଣିନାହିଁ ବୋଲି ସେ କହିଛନ୍ତି। ସେ ଅଷ୍ଟ୍ରେଲିଆନ ଓପନରେ ୩ଥର (୨୦୧୬, ୨୦୧୭, ୨୦୧୮) ଚତୁର୍ଥ ରାଉଣ୍ଡରେ ପ୍ରବେଶ କରିଥିଲେ। ସେହିପରି ୨୦୧୮ ଫ୍ରେଞ୍ଚ୍ ଓପନ୍ରେ ଓ ୟୁଏସ୍ ଓପନ୍ରେ ୩ଥର (୨୦୧୪, ୨୦୧୫, ୨୦୧୮) ମଧ୍ୟ ଚତୁର୍ଥ ରାଉଣ୍ଡକୁ ଉଠିଥିଲେ।
