ଭୁବନେଶ୍ୱର, ୧୮।୨(କ୍ରୀଡ଼ା ପ୍ରତିନିଧି): ଦ୍ରୁତ ବୋଲର ଆଲୋକ ମଙ୍ଗରାଜ କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି। ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ପକ୍ଷରୁ ବୁଧବାର ଏହା ସ୍ପଷ୍ଟ କରାଯାଇଛି। ରାଜ୍ୟ ପକ୍ଷରୁ ସମସ୍ତ ଫର୍ମାଟରେ ଖେଳିଥିବା ଆଲୋକ ୨୦୧୧ ନଭେମ୍ବରରେ ମୋହାଲିଠାରେ ପଞ୍ଜାବ ବିପକ୍ଷରେ ଖେଳି ରଣଜୀ ଟ୍ରଫି କ୍ୟାରିୟର ଆରମ୍ଭ କରିଥିଲେ। ସେ ମୋଟ ୨୨ଟି ପ୍ରଥମଶ୍ରେଣୀ ମ୍ୟାଚ ଖେଳି ୧୬୫୨ ରନ କରିବା ସହ ୫୦ଟି ଉଇକେଟ ନେଇଛନ୍ତି। ଗୋଟିଏ ଇନିଂସରେ ତାଙ୍କର ଶ୍ରେଷ୍ଠ ବୋଲିଂ ୫/୧୯ ଓ ମ୍ୟାଚରେ ୭/୫୨। ସେହିପରି ସେ ଲିଷ୍ଟ-ଏ କ୍ରିକେଟରେ ୧୧ ମ୍ୟାଚରୁ ୩୯୯ ରନ କରିଛନ୍ତି ଏବଂ ୭ଟି ଉଇକେଟ ନେଇଛନ୍ତି। ୨/୧୬ ତାଙ୍କର ଶ୍ରେଷ୍ଠ ବୋଲିଂ ଫିଗର। ଟି୨୦ରେ ସେ ୧୧ ମ୍ୟାଚରୁ ୨୩୫ ରନ କରିଥିବାବେଳେ ୭ଟି ଉଇକେଟ ନେଇଛନ୍ତି। ଏଥିରେ ମଧ୍ୟ ତାଙ୍କର ଶ୍ରେଷ୍ଠ ବୋଲିଂ ହେଉଛି ୨/୯। ତାଙ୍କ ଭବିଷ୍ୟତ କାର୍ଯ୍ୟପନ୍ଥା ନେଇ ଓସିଏ ସଭାପତି ପଙ୍କଜ ଲୋଚନ ମହାନ୍ତି ଓ ସମ୍ପାଦକ ସଞ୍ଜୟ ବେହେରା ଶୁଭକାମନା ଜଣାଇଛନ୍ତି। ”ଅବସର ନିଷ୍ପତ୍ତି ଅପ୍ରତ୍ୟାଶିତ ନୁହେଁ, କିଛି ପରିମାଣରେ ଆହତ ସମସ୍ୟା ରହିଲା। ଏହା ବ୍ୟତୀତ ଯୁବ ଖେଳାଳିଙ୍କ ବାଟ ଛାଡ଼ିବା ଉଦ୍ଦେଶ୍ୟରେ ମୁଁ ଏପରି ନିଷ୍ପତ୍ତି ନେଲି“ ବୋଲି ଆଲୋକ ନିଜ ପ୍ରତିକ୍ରୀୟାରେ ପ୍ରକାଶ କରିଛନ୍ତି। ଅତୀତରେ ସବୁପ୍ରକାର ସମର୍ଥନ ଯୋଗାଇଥିବାରୁ ଓଡ଼ିଶା କ୍ରିକେଟ ଆସୋସିଏଶନ ଏବଂ ଇଷ୍ଟକୋଷ୍ଟ ରେଲଓ୍ବେକୁ ଧନ୍ୟବାଦ ଜଣାଇଛନ୍ତି ଆଲୋକ। ଏହାଛଡ଼ା ତାଙ୍କ ପଥପ୍ରଦର୍ଶକ ଅନ୍ତର୍ଜାତୀୟ କ୍ରିକେଟର ଦେବାଶିଷ ମହାନ୍ତିଙ୍କୁ ସେ ସ୍ବତନ୍ତ୍ରଭାବେ ଧନ୍ୟବାଦ ଜଣାଇବାକୁ ଭୁଲି ନାହାନ୍ତି।
