ରିଆମାଳ,୧୯ା୬(ନିରଞ୍ଜନ ବେହେରା) ଦେବଗଡ଼ ଜିଲା କଂଗ୍ରେସ ସଭାପତି ପରିବର୍ତ୍ତନ ପରେ ଦଳୀୟ କର୍ମୀଙ୍କ ମଧ୍ୟରେ ଅସନ୍ତୋଷ ତେଜିବାରେ ଲାଗିଛି। ରିଆମାଳ ବ୍ଲକ ନାଉଲିପଡ଼ାଠାରେ ବ୍ଲକ କଂଗ୍ରେସ କମିଟିର ବହୁ କର୍ମୀ ରବିବାର ଏକ ବୈଠକ କରି ଦଳରୁ ସମୂହ ଇସ୍ତଫା ପ୍ରଦାନ କରିଛନ୍ତି। ବ୍ଲକ କଂଗ୍ରେସ ସଭାପତି ସୁଶୀଲ ସାହୁଙ୍କ ତତ୍ତ୍ୱାବଧାନରେ ଆୟୋଜିତ ବୈଠକରେ ବ୍ୟକ୍ତିଗତ ସ୍ବାର୍ଥ ପାଇଁ ଦଳୀୟ କର୍ମୀଙ୍କୁ ଅଣଦେଖା କରାଯିବା, ଜିଲା ସଭାପତି ପରିବର୍ତ୍ତନରେ ପିସିସି ସଭାପତିଙ୍କ ଏକତରଫା ନିଷ୍ପତ୍ତିର ପ୍ରତିବାଦ କରାଯାଇଥିଲା। ଏପରି କି ବିଭିନ୍ନ ପଦପଦବୀରେ ଥିବା ଦଳୀୟ କର୍ମକର୍ତ୍ତା ସମୂହ ଇସ୍ତଫା ପ୍ରଦାନ କରିଥିଲେ।
ବୈଠକରେ ଜିଲା ଉପସଭାପତି ହେମନ୍ତ ସାହୁ, ସାଧାରଣ ସମ୍ପାଦକ ଦିଲୀପ ବିଶ୍ୱାଳ, ବ୍ଲକ ଉପସଭାପତି ପଞ୍ଚାନନ ଭୁକ୍ତା, ବସନ୍ତ କବି, ସାଧାରଣ ସମ୍ପାଦକ ଧନେଶ୍ୱର ସାହୁ, ମାୟାଧର ମହାନ୍ତି, ଚନ୍ଦ୍ରଧ୍ୱଜ ପ୍ରଧାନ, ଅଜିତ ମହାପାତ୍ର, ସମ୍ପାଦକ ଯୁଧିଷ୍ଠିର ପ୍ରଧାନ, କୃଷ୍ଣଚନ୍ଦ୍ର ଦେହୁରୀ, ରାଜେଶ ସାହୁ, ଅଶୋକ ସାହୁ, ଅନାଦି ସାହୁ, ଏକଜିକ୍ୟୁଟିଭ ବୋର୍ଡ ସଦସ୍ୟ ରସାନନ୍ଦ ବିଶ୍ୱାଳ, ପ୍ରବୀର ଶତପଥୀ, ମଦନ ଗଡନାୟକ, ବରୁଣ ମିତ୍ର, ଦଣ୍ଡବିହାରୀ ପ୍ରଧାନ, ଜୟକୃଷ୍ଣ ପ୍ରଧାନ, ବିପିନ ବିହାରୀ ବେହେରା, କୋଷାଧ୍ୟକ୍ଷ କୃଷ୍ଣଚନ୍ଦ୍ର ନାୟକ ପ୍ରମୁଖ ବୈଠକରେ ଉପସ୍ଥିତ ଥିଲେ। ସମୂହ ଇସ୍ତଫା ଘଟଣା ଜିଲା କଂଗ୍ରେସ ରାଜନୀତିକୁ ଉଷ୍ମ କରିଛି। ଏ ସମ୍ପର୍କରେ ଜିଲା କଂଗ୍ରେସ ସଭାପତି ସେମ ହେମ୍ରମଙ୍କୁ ପଚାରିବାରୁ ଦଳରୁ ନୁହେଁ, କେତେକ କର୍ମକର୍ତ୍ତା ସେମାନଙ୍କ ପଦ ପଦବୀରୁ ଇସ୍ତଫା ଦେଇଛନ୍ତି। ତେବେ ପରିବର୍ତ୍ତିତ ପରିସ୍ଥିତିକୁ ଲକ୍ଷ୍ୟ କରି ନୂତନ କର୍ମକର୍ତ୍ତା ଚୟନ କରାଯାଉଛି ବୋଲି ସେ କହିଛନ୍ତି।
