ଲଣ୍ଡନ, ୨୪।୧୨: ବ୍ରିଟେନରେ ହିନ୍ଦୀ ନ୍ୟୁଜ୍ ଚ୍ୟାନେଲ ‘ରିପବ୍ଲିକ୍ ଭାରତ’କୁ ଅପରେଟ୍ କରୁଥିବା ଓ୍ବାଲର୍ଡଓ୍ବାଇଡ୍ ମିଡିଆ ନେଟ୍ଓ୍ବର୍କ ଲିମିଟେଡ୍ ଉପରେ ବ୍ରିଟିଶ ଟିଭି ନିୟାମକ ସଂସ୍ଥା ଅଫ୍କମ୍ ୨୦,୦୦୦ ପାଉଣ୍ଡ (ପାଖାପାଖି ୧୯.୭ ଲକ୍ଷ ଟଙ୍କା) ଜରିମାନା ଲଗାଇଛି। ୨୦୧୯ ସେପ୍ଟେମ୍ବର ୬ରେ ରିପବ୍ଲିକ୍ ଭାରତର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ବାମୀଙ୍କ ଦ୍ୱାରା ଏକ ବିତର୍କ କାର୍ଯ୍ୟକ୍ରମ ‘ପୁଛ୍ତା ହୈ ଭାରତ’ ଉପସ୍ଥାପନ କରାଯାଇଥିଲା। ଭାରତର ଦ୍ୱିତୀୟ ଚନ୍ଦ୍ର ମିଶନ ‘ଚନ୍ଦ୍ରୟାନ-୨’ ବିଷୟବସ୍ତୁ ଉପରେ ହୋଇଥିବା ଆଲୋଚନାରେ ୩ ଭାରତୀୟ ଓ ୩ ପାକିସ୍ତାନୀ ସାମିଲ ହୋଇଥିଲେ। ପ୍ରସାରଣ ନିୟମ ଅନୁପାଳନ କରିବାରେ ବିଫଳତା ପାଇଁ ଅର୍ଣ୍ଣବଙ୍କ ଟିଭି ନେଟ୍ଓ୍ବର୍କ ଉପରେ ଜରିମାନା ଧାର୍ଯ୍ୟ କରାଯାଇଛି।
ଅଫ୍କମ୍ କହିବା ଅନୁଯାୟୀ ଶୋ’ରେ ପ୍ରସାରିତ ବିଷୟବସ୍ତୁ ପାକିସ୍ତାନୀ ଜନସାଧାରଣଙ୍କ ବିରୋଧରେ ଘୃଣିତ ମନ୍ତବ୍ୟ ଥିଲା। ଉକ୍ତ ଚ୍ୟାନେଲ ପାକିସ୍ତାନୀଙ୍କ ନକାରାତ୍ମକ ଓ ଖରାପ ବ୍ୟବହାରକୁ ପ୍ରସାରଣ କରିଥିଲା। ସେହିପରି ଭାରତ କିଭଳି ଆଗକୁ ବଢ଼ିଛି ଓ ପାକିସ୍ତାନ ଆତଙ୍କବାଦୀଙ୍କୁ ଅନୁମତି ଦେଇ ବିକାଶ ମାର୍ଗରେ ପଛେଇ ଯାଇଛି, ତାହା ଦର୍ଶାଇ ପଡୋଶୀ ଦେଶର ଛବିକୁ ମଳିନ କରିବାକୁ ଏଥିରେ ଉଦ୍ୟମ କରାଯାଇଥିବା କୁହାଯାଇଥିଲା। ତେବେ ୨୦୨୦ ଫେବୃୟାରୀ ୨୬ରୁ ଏପ୍ରିଲ ୯ ମଧ୍ୟରେ ୨୮୦ ଥର ହିନ୍ଦୀ ଓ ଇଂଲିଶରେ କ୍ଷମା ମାଗି ଦୁଃଖ ପ୍ରକାଶ କରିଥିବା ଉକ୍ତ ଟିଭି ଚ୍ୟାନେଲ ପକ୍ଷରୁ ଅଫ୍କମ୍କୁ ଅବଗତ କରାଯାଇଥିଲା। ଯୋଗାଯୋଗ ନିୟନ୍ତ୍ରକ ଉକ୍ତ କାର୍ଯ୍ୟକ୍ରମକୁ ଦେଖି ସେଥିରେ କେତେକ ଅପମାନଜନକ ଶବ୍ଦ ବ୍ୟବହାର ହୋଇଥିବା ଜାଣିବାକୁ ପାଇବା ପରେ ରିପବ୍ଲିକ୍ ଭାରତକୁ ୨୦,୦୦୦ ପାଉଣ୍ଡ ପୈଠ କରିବା ପାଇଁ ନିର୍ଦ୍ଦେଶ ଦେଇଛନ୍ତି।
