ଭୁବନେଶ୍ୱର, ୨୩।୨(ବ୍ୟୁରୋ): ହାଇଦ୍ରାବାଦରେ ୪ ବର୍ଷର ଶିଶୁପୁତ୍ରକୁ ବୁଲା କୁକୁର ଝୁଣି ମାରିଦେବା ଘଟଣା ସାମ୍ନାକୁ ଆସିବା ପରେ ଓଡ଼ିଶା ସରକାର ତତ୍ପରତା ଦେଖାଇଛନ୍ତି। ରାଜ୍ୟରେ ରାସ୍ତା କଡ଼ରୁ ବୁଲା କୁକୁର ହଟାଇବାକୁ ନିର୍ଦ୍ଦେଶ ଦେଇଛନ୍ତି ମତ୍ସ୍ୟ ଓ ପଶୁ ସମ୍ପଦ ବିକାଶ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ। ଏ ନେଇ ବୁଧବାର ମନ୍ତ୍ରୀ ଟୁଇଟ୍ କରି କହିଛନ୍ତି, ହାଇଦ୍ରାବାଦରେ ଏହି ଭୟାନକ ଘଟଣା ଦେଖି ମୁଁ ଓଡ଼ିଶାର ସମସ୍ତ ୩୦ ଜିଲାର ଚିଫ୍ ଡିଷ୍ଟ୍ରିକ୍ଟ ଭେଟେରିନାରି ଅଫିସର(ସିଡିଭିଓ)ଙ୍କୁ କଡ଼ା ସତର୍କ ରହିବା ସହ ରାସ୍ତାରୁ ବୁଲା କୁକୁରଙ୍କୁ ହଟାଇବାକୁ ନିର୍ଦ୍ଦେଶ ଦେଇଛି। ଏହା ଉପରେ ତୁରନ୍ତ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସିଡିଭିଓଙ୍କୁ ନିର୍ଦ୍ଦେଶ ଦିଆଯାଇଥିବା ମନ୍ତ୍ରୀ ଉଲ୍ଲେଖ କରିଛନ୍ତି। ବିଗତ ଦିନରେ ରାଜଧାନୀ ଭୁବନେଶ୍ୱର ସମେତ ରାଜ୍ୟର ବିଭିନ୍ନ ସ୍ଥାନରେ ବୁଲା କୁକୁର କାମୁଡ଼ାରେ ଅନେକ ଶିଶୁଙ୍କ ଜୀବନ ଯାଇଛି। ଏବେ ହାଇଦ୍ରାବାଦ ଘଟଣା ପରେ ମନ୍ତ୍ରୀଙ୍କ ଏହି ନିର୍ଦ୍ଦେଶ କେତେ କାର୍ଯ୍ୟକାରୀ ହେଉଛି ତାହାକୁ ନେଇ ଆଲୋଚନା ଚାଲିଛି।
ସୂଚନାଯୋଗ୍ୟ, ହାଇଦ୍ରାବାଦରେ ରବିବାର ସନ୍ଧ୍ୟାରେ ଜଣେ ୪ ବର୍ଷର ଶିଶୁପୁତ୍ରକୁ ବୁଲା କୁକୁର ଝୁଣି ମାରିଦେଇଥିଲେ। ମୃତ ଶିଶୁ ନିଜାମବାଦର ଗଙ୍ଗାଧରଙ୍କ ପୁଅ ପ୍ରଦୀପ। ଘଟଣା ଦିନ ଗଙ୍ଗାଧର ତାଙ୍କର ଦୁଇ ପୁଅଙ୍କୁ ନିଜ କାର୍ଯ୍ୟସ୍ଥଳକୁ ଆଣିଥିଲେ। ସେ ସେମାନଙ୍କୁ ବାହାରେ ଖେଳିବାକୁ ଛାଡ଼ିଦେଇ ଓ୍ବାର୍କଶପ୍ରେ କାର୍ଯ୍ୟରତ ଥିଲେ। କିଛି ସମୟ ପରେ ପୁଅର କାନ୍ଦ ଶୁଣି ସେ ବାହାରକୁ ଯାଇ ଦେଖିଲେ ଯେ, ୩ଟି କୁକୁର ପ୍ରଦୀପକୁ ଝୁଣି ପକାଉଛନ୍ତି। ସେ କୁକୁରଙ୍କୁ ଘଉଡ଼ାଇ ପୁଅକୁ ନିକଟସ୍ଥ ହସ୍ପିଟାଲକୁ ନେଇଥିଲେ। ତେବେ ସେଠାରେ ଡାକ୍ତରଙ୍କ ସମସ୍ତ ଉଦ୍ୟମ ସତ୍ତ୍ୱେ ତା’ର ମୃତ୍ୟୁ ଘଟିଥିଲା। ସିସିଟିଭି କ୍ୟାମେରାରେ କଏଦ ହୋଇଥିବା କୁକୁର ଆକ୍ରମଣ ବେଳର ଭିଡିଓ ଭାଇରାଲ ହୋଇଥିଲା। ପିଲାଟି ପାଖରେ ଏକ ଖାଦ୍ୟ ସାମଗ୍ରୀ ପ୍ୟାକେଟ ଥିବାରୁ କୁକୁର ଆକ୍ରମଣ କଲା ବୋଲି ଗ୍ରେଟର ହାଇଦ୍ରାବାଦ ମ୍ୟୁନିସିପାଲ କର୍ପୋରେଶନ ଅଧିକାରୀ କହିଛନ୍ତି। ତେବେ ଭବିଷ୍ୟତରେ ଯେପରି ଏଭଳି ଦୁଃଖଦ ଘଟଣା ନ ଘଟେ, ତାହା ସୁନିଶ୍ଚିତ କରିବାକୁ ପଦକ୍ଷେପ ନିଆଯିବ ବୋଲି ପୌର ପ୍ରଶାସନ ଓ ସହରାଞ୍ଚଳ ବିକାଶ ମନ୍ତ୍ରୀ କେ.ଟି. ରାମାରାଓ କହିଛନ୍ତି।
