ଭୁବନେଶ୍ୱର,୧୨ା୮(ବ୍ୟୁରୋ): ଗତବର୍ଷ ପରି ଏବର୍ଷ ମଧ୍ୟ ରାଜ୍ୟରେ କଟକଣାରେ ପାଳିତ ହେବ ରାଜ୍ୟ ସ୍ତରୀୟ ୭୫ତମ ସ୍ବାଧୀନତା ଦିବସ। ଭୁବନେଶ୍ୱର ପ୍ରଦର୍ଶନୀ ପଡିଆରେ ଅନୁଷ୍ଠିତ ହେବାକୁ ଯାଉଥିବା ଏହି ସମାରୋହରେ ମୁଖ୍ୟମନ୍ତ୍ରୀ ପତାକା ଉତ୍ତୋଳନ କରିବେ। ଏନେଇ ବୁଧବାର ପୋଲିସ ବିଭାଗ ପକ୍ଷରୁ ରିହର୍ସାଲ୍ ଆରମ୍ଭ ହୋଇଛି। କରୋନା ସ୍ଥିତିକୁ ଦୃଷ୍ଟିରେ ରଖି ଏଥର ପରେଡ଼ ହେବ ନାହିଁ କି କୌଣସି ଛାତ୍ରୀଛାତ୍ର ଅଂଶଗ୍ରହଣ କରିବେ ନାହିଁ। ଜାତୀୟ ପତାକାକୁ କେବଳ ସଲାମୀ ଦିଆଯିବ। ଏସ୍ଏସ୍ବିଏନ୍, ଓଏସ୍ଏପି ଓ ଓଡ୍ରାଫର ୩ ପ୍ଲାଟୁନ ସହ ଓଡିଶା ଷଷ୍ଠ ଓ ୭ମ ବାଟାଲିୟନର ଷ୍ଟେଟ୍ ବ୍ୟାଣ୍ଡ୍ ଏହି ସମାରୋହରେ ଯୋଗଦେଇ ସଲାମୀ ଦେବେ। ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ଓ ଡିସିପି ଉମାଶଙ୍କର ଦାସ ରିହର୍ସାଲ ସମୟରେ ଉପସ୍ଥିତ ରହି ଏହାର ସମୀକ୍ଷା କରିଥିଲେ।
