ନୂଆଦିଲ୍ଲୀ,୧୮।୭ : ଅଲ୍ଟ ନ୍ୟୁଜ ସହ-ପ୍ରତିଷ୍ଠାତା ତଥା ଫ୍ୟାକ୍ଟ ଚେକର୍ ମହମ୍ମଦ ଜୁବେରଙ୍କ ଏଫଆଇଆର୍ ରଦ୍ଦ କରିବାକୁ ଆବେଦନ ଉପରେ ସୁପ୍ରିମକୋର୍ଟରେ ଶୀଘ୍ର ଶୁଣାଣି ପାଇଁ ଦାବି ହୋଇଛି। ଏହା ଉପରେ ପ୍ରଧାନ ବିଚାରପତି (ସିଜେଆଇ) ଏନ.ଭି ରମନା ଜୁବେରଙ୍କ ଆଇନଜୀବୀଙ୍କୁ ଜଷ୍ଟିସ ଡିଓ୍ବାଇ ଚନ୍ଦ୍ରଚୂଡ଼ଙ୍କ ବେଞ୍ଚରେ ଏହାକୁ ଉଲ୍ଲେଖ କରିବାକୁ କହିଛନ୍ତି। ଯେଉଁଠାରେ ଏହି ମାମଲାର ଶୁଣାଣି ହୋଇସାରିଛି। ଜୁବେରଙ୍କ ଆଇନଜୀବୀ ବୃନ୍ଦା ଗ୍ରୋଭର ସିଜେଆଇଙ୍କୁ କହିଛନ୍ତି ଯେ ଆଜି ଏହି ମାମଲାର ଶୁଣାଣି ହେବା ଉଚିତ।
ମହମ୍ମଦ ଜୁବେର ଉତ୍ତରପ୍ରଦେଶ ପୋଲିସ ଦ୍ୱାରା ପଞ୍ଜିକୃତ ହୋଇଥିବା ୬ ଟି ଏଫଆଇଆର ରଦ୍ଦ କରିବାକୁ ସୁପ୍ରିମକୋର୍ଟରେ ଏକ ଆବେଦନ କରିଛନ୍ତି। ତାଙ୍କ ବିରୋଧରେ ଯାଞ୍ଚ ପାଇଁ ଗଠିତ ଏସଆଇଟିର ସାମ୍ବିଧାନିକତାକୁ ମଧ୍ୟ ଚ୍ୟାଲେଞ୍ଜ କରାଯାଇଛି। ଉତ୍ତରପ୍ରଦେଶର ମୁଜାଫରନଗର, ଗାଜିଆବାଦ, ସୀତାପୁର, ଲକ୍ଷ୍ମପୁର ଏବଂ ହାଥରସରେ ଜୁବେରଙ୍କ ବିରୋଧରେ ମୋଟ ୬ଟି ଏଫଆଇଆର୍ ପଞ୍ଜିକୃତ ହୋଇଛି।
ତାଙ୍କ ଆବେଦନରେ ଜୁବେର ଏହି ଏଫଆଇଆରଗୁଡ଼ିକର ତଦନ୍ତ ପାଇଁ ଏକ ସ୍ବତନ୍ତ୍ର ଅନୁସନ୍ଧାନକାରୀ ଦଳ (ଏସଆଇଟି) ଗଠନକୁ ବିରୋଧ କରିଛନ୍ତି। ଉତ୍ତରପ୍ରଦେଶ ପୋଲିସର ଇନ୍ସପେକ୍ଟର ଜେନେରାଲଙ୍କ ନେତୃତ୍ୱରେ ୟୁପି ସରକାର ନିକଟରେ ଏକ ଏସଆଇଟି ଗଠନ କରିବାକୁ ଘୋଷଣା କରିଛନ୍ତି। ଜୁବେରଙ୍କୁ ସୀତାପୁର ମାମଲାରେ ମଧ୍ୟବର୍ତ୍ତୀକାଳୀନ ଜାମିନ ମିଳି ସାରିଛି। ସେହିପରୀ ଦିଲ୍ଲୀ ମାମଲାରେ ଶୁକ୍ରବାର ପଟିଆଲା ହାଉସ୍ କୋର୍ଟ ଜୁବେରଙ୍କୁ ଜାମିନ ପ୍ରଦାନ କରିଛନ୍ତି।
