ରଘୁନାଥପୁର,୨।୨ (ରାଜେନ୍ଦ୍ର ନାରାୟଣ ସିଂହ): ରଘୁନାଥପୁର ବ୍ଲକ ରେଢ଼ୁଆସ୍ଥିତ କୃଷି ସେବା ସମବାୟ ସମିତିରେ ଗତ ଏକମାସ ଧରି ଅବ୍ୟବସ୍ଥା ଲାଗି ରହିଛି। ସମିତିରେ ବହୁ ଗୁରୁତ୍ୱପୂର୍ଣ୍ଣ ରେକର୍ଡ ପତ୍ର ଉପଲବ୍ଧ ନ ଥିବାରୁ ଚାଷୀମାନେ ଜମା ରଖିଥିବା ଟଙ୍କା ଉଠାଇ ନପାରି ଅସୁବିଧାର ସମ୍ମୁଖୀନ ହେଉଛନ୍ତି।
ସୂଚନାଯୋଗ୍ୟ, ଦୁର୍ନୀତି ଅଭିଯୋଗରେ ଏହି ସମିତିର ସମ୍ପାଦକ ସୁରେନ୍ଦ୍ରନାଥ ଦାଶ ଓ ସହ ସମ୍ପାଦକ ପ୍ରକାଶ ମହାପାତ୍ରଙ୍କୁ ନିଲମ୍ବନ କରାଯାଇଥିଲା। ଏହି ସମିତି ଅଫିସ କାର୍ଯ୍ୟ ସମ୍ପାଦନ ପାଇଁ ଏହି ବ୍ଲକ ଅଧୀନ ରାଢ଼ଙ୍ଗ ଓ ଜିରା କୃଷି ସେବା ସମବାୟ ସମିତି ଦାୟିତ୍ୱରେ ଥିବା ସମ୍ପାଦକ ଭଗବାନ ପ୍ରସାଦ ସ୍ବାଇଁଙ୍କୁ ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଥିଲା। ଏକସଙ୍ଗେ ୩ ସମିତି କାର୍ଯ୍ୟ ଚଳାଇବା କଷ୍ଟକର ହେଉଥିବାରୁ ସ୍ବାଇଁ ଚାଷୀଙ୍କ ଆକ୍ରୋଶର ସମ୍ମୁଖୀନ ହେଉଛନ୍ତି। ଅପରପକ୍ଷେ ନିଲମ୍ବିତ ସମ୍ପାଦକ ଦାଶ କ୍ୟାଶ୍ବୁକ ଭଳି ଅନେକ ରେକର୍ଡ ଅଦ୍ୟାବଧି ହସ୍ତାନ୍ତର କରି ନ ଥିବାରୁ ରେଢୁଆ ସମିତିରେ ସ୍ଥିତି ଜଟିଳ ହୋଇଛି ବୋଲି ଦାୟିତ୍ୱରେ ଥିବା ସମ୍ପାଦକ ସ୍ବାଇଁ ପ୍ରକାଶ କରିଛନ୍ତି। ସମିତି ସଭାପତି ପ୍ରଦୀପ୍ତ ମହାନ୍ତି ଏ ସମ୍ପର୍କରେ ବିଭାଗୀୟ ଅଧିକାରୀଙ୍କୁ ଲିଖିତ ଭାବେ ଅବଗତ କରାଇବା ପରେ ନିଲମ୍ବିତ ସମ୍ପାଦକଙ୍କ ଅଫିସ କିମ୍ବା ଘରୁ ରେକର୍ଡପତ୍ର ଜବତ କରିବା ପାଇଁ ଉପଜିଲାପାଳ ଚିଠି (ନଂ .୧୭୫୫୮-୩୦/୧୨/୨୦୨୩)ରେ ପୋଲିସକୁ ଆଦେଶ ଦେଇଥିଲେ। ଏହାପରେ ରଘୁନାଥପୁର ପୋଲିସ ଗତ ୧୫ ଦିନ ତଳେ ସମିତି କାର୍ଯ୍ୟାଳୟରେ ଥିବା ଗୋଦ୍ରେଜ ଆଲମିରା ଭାଙ୍ଗି ତନଖି କରିଥିଲେ ସୁଦ୍ଧା ସେଥିରୁ ଅଧିକାଂଶ କାଗଜ ମିଳି ନ ଥିଲା। ଅଦ୍ୟାବଧି ସମ୍ପାଦକଙ୍କ ଘର ତନଖି ହୋଇ ନ ଥିବାରୁ ଜରୁରୀ ରେକର୍ଡପତ୍ର ମିଳିବା ନେଇ ସନ୍ଦେହ ଉପୁଜିଛି। ଅନ୍ୟପକ୍ଷେ ମେଡିକାଲ କ୍ଷେତ୍ରରେ ହେଉ କିମ୍ବା ଝିଅ ବିବାହ ପାଇଁ ହେଉ ଜରୁରୀ ସମୟରେ ଲୋକେ ସମିତିରେ ରଖିଥିବା ଟଙ୍କା ଉଠାଇପାରୁ ନାହାନ୍ତି। ଏପରି ଅବ୍ୟବସ୍ଥା ଲାଗି ରହିଥିବା ବେଳେ ସମିତି ସଭାପତି ନାଚାର ଥିବା କହିଛନ୍ତି। ସ୍ଥାନୀୟ ଅଧିବାସୀ ଦିଲୀପ ରଥ ସମିତିରୁ ଟଙ୍କା ଉଠାଇବା ପାଇଁ ବାରମ୍ବାର ଦୌଡି ନିରାଶ ହେବା ପରେ ଏଭଳି ସମ୍ବେଦନଶୀଳ ଘଟଣାରେ ପ୍ରଶାସନ ନିରବ ରହିବା ଆଦୌ ଗ୍ରହଣୀୟ ନୁହେଁ ବୋଲି ସେ ଅଭିଯୋଗ କରିଛନ୍ତି। ପୂର୍ବତନ ସମ୍ପାଦକଙ୍କଠାରୁ ତୁରନ୍ତ ରେକର୍ଡ ପତ୍ର ଉଦ୍ଧାର କରି ସମିତିକୁ ସ୍ବାଭାବିକ କରିବା ପାଇଁ ସଭାପତି ମହାନ୍ତି ଓ ଅଞ୍ଚଳବାସୀଙ୍କ ପକ୍ଷରୁ ଜିଲାପାଳଙ୍କୁ ଅନୁରୋଧ କରିଛନ୍ତି।
