ନୂଆଦିଲ୍ଲୀ, ୪।୧୨ : ଭାରତରେ ଓମିକ୍ରନ୍ ଭାରିଆଣ୍ଟ ଚିହ୍ନଟ ହେବା ପରେ ଏହାକୁ ନେଇ ଚିନ୍ତା ବଢ଼ିଯାଇଛି। ଏହି ଚିନ୍ତାଜନକ ଭାରିଆଣ୍ଟ ସଂକ୍ରମଣରୁ ରକ୍ଷା ପାଇବା ଲାଗି ୪୦ ବର୍ଷ ଓ ତଦୂର୍ଦ୍ଧ୍ୱ ବୟସ(୪୦+)ର ଲୋକଙ୍କୁ ବୁଷ୍ଟର ଡୋଜ୍ ଦେବା ଲାଗି ଜିନୋମ ପରୀକ୍ଷା କରୁଥିବା ୨୮ ଲାବରେଟୋରିର ସଂଘ ପକ୍ଷରୁ ସରକାରଙ୍କୁ ସୁପାରିସ କରାଯାଇଛି। ଟିକା ନେଇ ନ ଥିବା ଲୋକଙ୍କୁ ପ୍ରଥମେ ଟିକା ଦେବା ସହ ୪୦+ ଏବଂ ସଂକ୍ରମଣ ଆଶଙ୍କା ଥିବା ଲୋକମାନଙ୍କୁ ବୁଷ୍ଟର ଡୋଜ୍ ଦେବା ନେଇ ବିଚାର କରାଯାଉ। ବର୍ତ୍ତମାନର ଟିକାରୁ ମିଳୁଥିବା ଆଣ୍ଟିବଡି ସ୍ତର ନିମ୍ନ ହୋଇଥିବାରୁ ଏହା ଓମିକ୍ରନ୍କୁ ନିଷ୍କ୍ରିୟ କରିବା ପାଇଁ ଯଥେଷ୍ଟ ନୁହେଁ ବୋଲି ଆଇଏନ୍ଏସ୍ଏସିଓଜି କହିଛି। ଏହି ସଂସ୍ଥା କୋଭିଡ୍-୧୯ର ବିଭିନ୍ନ ଭାରିଆଣ୍ଟ ଯାଞ୍ଚ କରୁଛି। ନୂଆ ଭାରିଆଣ୍ଟ କିଭଳି ସଂକ୍ରମଣ କରୁଛି ଓ ଏଥିରୁ ସୁରକ୍ଷା ପାଇଁ ସମ୍ଭାବ୍ୟ ଚିକିତ୍ସା ବ୍ୟବସ୍ଥା ସମ୍ପର୍କରେ ଏହି ସଂସ୍ଥା ଜଣାଇଥାଏ। ନୂଆ ଭାରିଆଣ୍ଟଗୁଡ଼ିକର ଉପସ୍ଥିତି ଚିହ୍ଟ କରିବାକୁ ହେଲେ ଜିନୋମ ସିକ୍ୱେନ୍ସିଂ ଜରୁରୀ।
ଆମେରିକା ଓ ବ୍ରିଟେନରେ ୪୦ ବର୍ଷରୁ ଊର୍ଦ୍ଧ୍ୱଙ୍କୁ ବୁଷ୍ଟର ଡୋଜ୍ ଦେବା ପାଇଁ ମଞ୍ଜୁରୀ ମିଳିସାରିଲାଣି। କୋଭିଡ୍ ଟିକାର ଦୁଇଟି ଡୋଜ୍ ନେଇଥିବା ଲୋକଙ୍କୁ ନୂଆ ଭାରିଆଣ୍ଟରୁ ସୁରକ୍ଷା ଦେବାକୁ ହେଲେ ବୁଷ୍ଟର ଦିଆଯିବା ଆବଶ୍ୟକ ବୋଲି ଆମେରିକାର ସଂକ୍ରାମକ ରୋଗ ବିଶେଷଜ୍ଞ ଆନ୍ଥୋନି ଫୌସି କହିଛନ୍ତି। ଭୂତାଣୁର ମ୍ୟୁଟେଶନ ଯୋଗୁ ଏହାର ଢାଞ୍ଚା ବଦଳିଯାଇଛି। ନୂଆ ଭାରିଆଣ୍ଟ ଦ୍ରୁତ ବେଗରେ ସଂକ୍ରମଣ କରିପାରେ ବୋଲି ପ୍ରାଥମିକ ପ୍ରମାଣ ମିଳିଥିବା ଆଇଏନ୍ଏସ୍ଏସିଓଜି କହିଛି। ଓମିକ୍ରନ୍ ପ୍ରଥମେ ଚିହ୍ନଟ ହୋଇଥିବା ଦକ୍ଷିଣ ଆଫ୍ରିକାରେ ସଂକ୍ରମଣ ଦିନକରେ ଦୁଇଗୁଣା ବଢ଼ିଯାଇଛି। ଲୋକ ସଭାରେ ଶୁକ୍ରବାର କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡ. ମନସୁଖ ମାଣ୍ଡବ୍ୟ କହିଛନ୍ତି ବୈଜ୍ଞାନିକ ପରାମର୍ଶ ପରେ ବୟସ୍କମାନଙ୍କୁ ବୁଷ୍ଟର ଡୋଜ୍ ଏବଂ ପିଲାମାନଙ୍କୁ ଟିକାକରଣ ସମ୍ପର୍କରେ ନିଷ୍ପତ୍ତି ନିଆଯିବ। ବୈଜ୍ଞାନିକମାନଙ୍କ ଉପରେ ଭରସା ରଖିବା ଲାଗି ସେ ବିରୋଧୀ ସଦସ୍ୟମାନଙ୍କୁ କହିଥିଲେ। କୋଭିଡ୍ ମୃତ୍ୟୁ ସମ୍ପର୍କରେ ସରକାର ତଥ୍ୟ ଲୁଚାଉଛନ୍ତି ବୋଲି ବିରୋଧୀ ଅଭିଯୋଗ କରିବାରୁ ମାଣ୍ଡବ୍ୟ କହିଥିଲେ, ସମସ୍ତ ରାଜ୍ୟଙ୍କୁ ମୃତ୍ୟୁ ସଂଖ୍ୟା ଜଣାଇବାକୁ କୁହାଯାଇଥିଲା। ୧୯ ରାଜ୍ୟ ରିପୋର୍ଟ ଦେଇଥିବାବେଳେ କେବଳ ପଞ୍ଜାବରେ ଅକ୍ସିଜେନ ଅଭାବରୁ ୪ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ଓମିକ୍ରନ ବିପଦ ଥିବା ଦେଶରୁ ଏପର୍ଯ୍ୟନ୍ତ ଭାରତକୁ ୧୬,୦୦୦ରୁ ଊର୍ଦ୍ଧ୍ୱ ଯାତ୍ରୀ ଆସିଛନ୍ତି। ସେମାନଙ୍କ ମଧ୍ୟରୁ ୧୮ ଜଣ କୋଭିଡ୍ ପଜିଟିଭ୍ ଚିହ୍ନଟ ହୋଇଛନ୍ତି ଓ ନମୁନା ଜିନୋମ ସିକ୍ୱେନ୍ସିଂ ପାଇଁ ପଠାଯାଇଛି ବୋଲି ସ୍ବାସ୍ଥ୍ୟମନ୍ତ୍ରୀ କହିଛନ୍ତି।
